ചണ്ഡിഗഡ്: ഹരിയാനയിലെ ഗുഡ്‌ഗാവിലെ റയാൻ ഇന്റർനാഷണൽ സ്കൂളിൽ രണ്ടാം ക്ലാസുകാരൻ കൊല്ലപ്പെട്ട സംഭവത്തിൽ പിടിയിലായ പ്ലസ് വണ്‍ വിദ്യാര്‍ത്ഥിയെ സിബിഐ തെളിവെടുപ്പിന് കൊണ്ടുവന്നു. 16കാരന്‍ കത്തി വാങ്ങിയ കട തിരിച്ചറിയാന്‍ നിരവധി കടകളില്‍ സിബിഐ കുട്ടിയേയും കൊണ്ട് കയറി ഇറങ്ങി.
കുറ്റാരോപിതനായ കൗമാരക്കാരനെ കോടതി മൂന്ന് ദിവസത്തെ സിബിഐ കസ്റ്റഡിയില്‍ വിട്ടിരുന്നു.

കൗമാരക്കാരനെ സോനയിലെ വീട്ടില്‍ നിന്നും സിബിഐ പിടികൂടിയതിന് പിന്നാലെയാണ് ഗുഡ്ഗാവ് കോടതി കസ്റ്റഡിയില്‍ വിട്ടത്. വരുന്ന രണ്ട് ദിവസങ്ങളില്‍ കുട്ടിയെ സ്കൂളിലെത്തിച്ച് തെളിവെടുപ്പ് നടത്തും.
നേരത്തെ പീഡനത്തിന് ഇരയാക്കിയ ശേഷം സ്കൂൾ ബസ് ഡ്രൈവർ കുട്ടിയെ കൊലപ്പെടുത്തിയതാണെന്നായിരുന്നു പൊലീസ് അന്വേഷണത്തിൽ കണ്ടെത്തിയത്.

ഇതിനെതിരെ മരിച്ച കുട്ടിയുടെ അച്ഛൻ കോടതിയെ സമീപിച്ചു. കേസ് വഴിതിരിച്ചുവിടാൻ അന്വേഷണ സംഘം ശ്രമിക്കുന്നുവെന്ന് ആരോപിച്ചായിരുന്നു ഇദ്ദേഹം കോടതിയെ സമീപിച്ചത്.കോടതി വിധിയുടെ അടിസ്ഥാനത്തിൽ സിബിഐ സംഘം കേസന്വേഷണം ഏറ്റെടുക്കുകയായിരുന്നു. പരീക്ഷയും രക്ഷിതാക്കളുടെ യോഗവും മാറ്റി വെയ്ക്കാന്‍ വേണ്ടിയാണ് പതിനൊന്നാം ക്ലാസുകാരന്‍ കുറ്റം ചെയ്തതെന്നാണ് സിബിഐയുടെ കണ്ടെത്തല്‍.

സെപ്റ്റംബര്‍ എട്ടിനാണ് റയാന്‍ സ്‌കൂളിലെ ശുചിമുറിയില്‍ പ്രഥ്യുമന്‍ ഠാക്കൂര്‍ എന്ന രണ്ടാം ക്ലാസുകാരനെ കഴുത്തറുത്ത് കൊലചെയ്യപ്പെട്ട നിലയിൽ കണ്ടെത്തിയത്. കൊലപാതകിയെ തൂക്കിലേറ്റണമെന്ന് പ്രഥ്യുമന്റെ കുടുംബവും അഭിഭാഷകനും ആവശ്യപ്പെട്ടു. കോടതിയെ ഇത് അറിയിക്കുമെന്നും അഭിഭാഷകന്‍ സുശീല്‍ തേക്രിവാള്‍ അറിയിച്ചു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook