scorecardresearch

യുക്രൈനില്‍നിന്ന് റഷ്യ നയതന്ത്ര ഉദ്യോഗസ്ഥരെ ഒഴിപ്പിക്കാന്‍ തുടങ്ങിയതായി റിപ്പോര്‍ട്ട്

ഉക്രെയ്‌നിനെതിരായ വലിയ ആക്രമണമുണ്ടാകാനുള്ള സാധ്യതയാണ് രാജ്യത്തിന് പുറത്ത് സൈനിക ശേഷി ഉപയോഗിക്കാനുള്ള അനുമതി സൂചിപ്പിക്കുന്നത്

Putin, Ukraine-Russia Conflict

മോസ്‌കോ: യുക്രൈനില്‍നിന്ന് റഷ്യ നയതന്ത്ര ഉദ്യോഗസ്ഥരെ ഒഴിപ്പിക്കാന്‍ തുടങ്ങിയതായി റിപ്പോര്‍ട്ട്. റഷ്യയുടെ ഔദ്യോഗിക വാര്‍ത്താ ഏജന്‍സിയായ ടാസാണ് ഇക്കാര്യം റിപ്പോര്‍ട്ട് ചെയ്തത്്. റഷ്യയ്ക്കു യുക്രൈനിലെ കീവില്‍ എംബസിയും ഖാര്‍കിവ് ഒഡെസയിലും എല്‍വിവിലും കോണ്‍സുലേറ്റുകളുമുണ്ട്. ഒഴിപ്പിക്കല്‍ ആരംഭിച്ച കാര്യം കീവിലെ എംബസി സ്ഥിരീകരിച്ചതായി ടാസ് റിപ്പോര്‍ട്ടില്‍ പറയുന്നു.

യുക്രൈന്‍ അതിര്‍ത്തിക്കടുത്തുള്ള തെക്കന്‍ ബെലാറസില്‍ റഷ്യ നൂറിലധികം സൈനിക വാഹനങ്ങള്‍ വിന്യസിച്ചതായും ഡസന്‍ കണക്കിനു സൈനിക കൂടാരങ്ങള്‍ നിര്‍മിച്ചതായും ഉപഗ്രഹചിത്രങ്ങള്‍ വ്യക്തമാക്കുന്നു. പടിഞ്ഞാറന്‍ റഷ്യയിലെ സൈനിക വിന്യാസത്തിന്റെ ഭാഗമായി പുതിയ ഫീല്‍ഡ് ഹോസ്പിറ്റല്‍ നിര്‍മിച്ചതായും മാക്സര്‍ ടെക്നോളജീസാണു പുറത്തുവിട്ട ചിത്രങ്ങള്‍ വ്യക്തമാക്കുന്നു.

രാജ്യത്തിനു പുറത്ത് സൈനിക ശേഷി ഉപയോഗിക്കാന്‍ റഷ്യന്‍ പാര്‍ലമെന്റ് പ്രസിഡന്റ് വ്ളാഡിമിര്‍ പുടിന് അനുമതി നല്‍കിയിരുന്നു. ഉപരിസഭയില്‍ ചൊവ്വാഴ്ച നടന്ന വോട്ടെടുപ്പില്‍ ഐകകണ്‌ഠ്യേനയാണ് അംഗങ്ങള്‍ അനുമതി നല്‍കിയത്. യുക്രൈനെതിരായ വലിയ ആക്രമണമുണ്ടാകാനുള്ള സാധ്യതയാണ് രാജ്യത്തിന് പുറത്ത് സൈനിക ശേഷി ഉപയോഗിക്കാനുള്ള അനുമതി സൂചിപ്പിക്കുന്നത്. ഇതിനകം തന്നെ ഒരു അധിനിവേശം നടന്നുകൊണ്ടിരിക്കുകയാണെന്ന് റഷ്യന്‍ ഇടപെടലിനെക്കുറിച്ച് യുഎസ് പറഞ്ഞിരുന്നു.

നയതന്ത്രത്തിന് തന്റെ രാജ്യം എപ്പോഴും അവസരം തുറന്നിട്ടുണ്ടെന്ന് റഷ്യന്‍ പ്രസിഡന്റ് വ്ളാഡിമര്‍ പുടിന്‍ കഴിഞ്ഞ ദിവസം പറഞ്ഞിരുന്നു. എന്നിരുന്നാലും, അത് സ്വന്തം ദേശീയ സുരക്ഷാ താല്‍പ്പര്യങ്ങള്‍ക്കു മുന്‍ഗണന നല്‍കുകയും ‘വിഷമമായ ഒരു അന്താരാഷ്ട്ര സാഹചര്യത്തിന്റെ’ പശ്ചാത്തലത്തില്‍ സൈന്യത്തെ ശക്തിപ്പെടുത്തുന്നത് തുടരുകയും ചെയ്യുമെന്നും പുടിന്‍ കൂട്ടിച്ചേര്‍ത്തു.

അതിനിടെ, യുക്രൈന്‍ പൗരന്മാര്‍ക്കു് തോക്ക് കൈവശം വയ്ക്കാനും സ്വയം പ്രതിരോധിക്കാനും അനുമതി നല്‍കുന്ന കരട് നിയമത്തിന്റെ ആദ്യ വായനയില്‍ അംഗീകാരം നല്‍കാന്‍ ഉക്രെയ്ന്‍ പാര്‍ലമെന്റ് ബുധനാഴ്ച വോട്ട് ചെയ്തതായി വാര്‍ത്താ ഏജന്‍സി റോയിട്ടേഴ്സ് റിപ്പോര്‍ട്ട് ചെയ്തു. ”ഈ നിയമം സ്വീകരിക്കുന്നത് പൂര്‍ണമായും രാജ്യത്തിന്റെയും സമൂഹത്തിന്റെയും താല്‍പ്പര്യങ്ങളാണ്,” നിയമനിര്‍മാതാക്കള്‍ ഒരു കുറിപ്പില്‍ പറഞ്ഞു, ‘ഉക്രെയ്‌നിലെ പൗരന്മാര്‍ക്ക് നിലവിലുള്ള ഭീഷണികളും അപകടങ്ങളും’ കാരണം നിയമം ആവശ്യമാണെന്ന് അവര്‍ കൂട്ടിച്ചേര്‍ത്തു.

റഷ്യയ്ക്കെതിരെ ഓസ്ട്രേലിയ കൂടുതല്‍ ഉപരോധം പ്രഖ്യാപിച്ചിരിക്കുകയാണ്. യുെൈക്രനെതിരായ റഷ്യന്‍ ആക്രമണത്തിന് മറുപടിയായി ലക്ഷ്യമിടുന്ന സാമ്പത്തിക ഉപരോധങ്ങളും യാത്രാ നിരോധനവും ആദ്യ ഘട്ട് നടപടികളായിരിക്കുമെന്ന് ഓസ്‌ട്രേലിയന്‍ പ്രധാനമന്ത്രി സ്‌കോട്ട് മോറിസണ്‍പറഞ്ഞു. 2014 മുതല്‍ ഓസ്ട്രേലിയയും റഷ്യയും പരസ്പരം ഉപരോധം ഏര്‍പ്പെടുത്തിയിട്ടുണ്ട്. റഷ്യന്‍ സുരക്ഷാ കൗണ്‍സിലിലെ എട്ട് അംഗങ്ങളെ ലക്ഷ്യമിട്ടുള്ള ഉപരോധങ്ങളും യാത്രാ നിരോധനവും മോറിസന്‍ മന്ത്രിസഭയുടെ ദേശീയ സുരക്ഷാ സമിതി അംഗീകരിച്ചു. മുന്‍ ഉപരോധങ്ങള്‍ വിപുലീകരിക്കാനും രണ്ട് റഷ്യന്‍ ബാങ്കുകളെ ലക്ഷ്യമിട്ട് അമേരിക്കയുമായും ബ്രിട്ടനുമായും ഒത്തുചേരാനും അവര്‍ സമ്മതിച്ചു.

Also Read: ‘സംഘർഷ സാധ്യത കൂടുന്നു’; യുക്രൈനിൽ നിന്ന് ഡൽഹിയിലെത്തിയ വിദ്യാർത്ഥികൾ പറയുന്നു

അതേസമയം, റഷ്യയ്ക്കെതിരായ ഏത് ഉപരോധത്തെയും എതിര്‍ക്കുന്നതായി ചൈനീസ് വിദേശകാര്യ മന്ത്രാലയം പറഞ്ഞു. പ്രശ്നങ്ങള്‍ പരിഹരിക്കാനുള്ള ഏറ്റവും നല്ല മാര്‍ഗം ഉപരോധമാണെന്ന് ഒരിക്കലും കരുതുന്നില്ലെന്നു മന്ത്രാലയം കൂട്ടിച്ചേര്‍ത്തു.

അതിനിടെ, യുക്രൈന്‍ പ്രതിസന്ധിയില്‍ ഇന്ത്യയുടെ ‘സ്വതന്ത്ര നിലപാടിനെ’ റഷ്യ സ്വാഗതം ചെയ്തു. യുഎന്‍ സുരക്ഷാ കൗണ്‍സിലിലെ തങ്ങളുടെ വീക്ഷണങ്ങള്‍ ഇരു രാജ്യങ്ങളും തമ്മിലുള്ള സവിശേഷവും പ്രത്യേകവുമായ തന്ത്രപരമായ പങ്കാളിത്തത്തിന്റെ പ്രതിഫലനമാണെന്നും റഷ്യ പറഞ്ഞു.

ഉത്തരവാദിത്തമുള്ള ആഗോള ശക്തിയെന്ന നിലയില്‍ ഇന്ത്യ സുപ്രധാന പങ്ക് വഹിക്കുന്നുണ്ടെന്നും ആഗോള കാര്യങ്ങളില്‍ സ്വതന്ത്രവും സന്തുലിതവുമായ സമീപനമാണ് സ്വീകരിക്കുന്നതെന്നും റഷ്യന്‍ ഡെപ്യൂട്ടി ചീഫ് ഓഫ് മിഷന്‍ റോമന്‍ ബാബുഷ്‌കിന്‍ പറഞ്ഞു.

സോവിയറ്റ് യൂണിയനുശേഷം ശേഷമുള്ള രാഷ്ട്രീയം, നാറ്റോയുടെ വികാസം, റഷ്യയും യൂറോപ്പും തമ്മിലുള്ള ചലനാത്മകത എന്നിവയിലാണ് യുക്രൈന്‍ സാഹചര്യത്തന്റെ വേരുകളെന്ന്് ഇന്ത്യന്‍ വിദേശകാര്യ മന്ത്രി എസ് ജയശങ്കര്‍ പാരീസില്‍ പറഞ്ഞിരുന്നു. 30 വര്‍ഷത്തെ സങ്കീര്‍ണമായ സാഹചര്യങ്ങളുടെ ഫലമാണ് ഉക്രെയ്‌നിലെ സ്ഥിതിയെന്നും ഇന്ത്യയും ഫ്രാന്‍സും പോലുള്ള മിക്ക രാജ്യങ്ങളും വളരെ സജീവമായി നയതന്ത്രപരമായ പരിഹാരം തേടുകയാണെന്നും അദ്ദേഹം പറഞ്ഞു.

Stay updated with the latest news headlines and all the latest News news download Indian Express Malayalam App.

Web Title: Russia ukraine news updates putin biden military nato us