സംസ്ഥാനത്ത് നിന്ന് തിരുപ്പതിക്കും വേളാങ്കണ്ണിക്കും ആഴ്ചയില്‍ രണ്ട് ട്രെയിനുകള്‍ അനുവദിച്ച് റെയില്‍വെ

ന്യൂഡല്‍ഹി: സംസ്ഥാനത്തിന് രണ്ട് പുതിയ ട്രെയിനുകള്‍ കൂടെ അനുവദിച്ച് കേന്ദ്ര റെയില്‍വെ മന്ത്രാലയം. വേളാങ്കണ്ണി, തിരുപ്പതി എന്നിവിടങ്ങളിലേക്കാണ് പുതിയ സര്‍വീസുകള്‍. കൊല്ലത്ത് നിന്നാണ് തിരുപ്പതിയിലേക്കുള്ള ട്രെയിന്‍, വേളാങ്കണ്ണിക്ക് എറണാകുളത്ത് നിന്നും. ഇതിന് പുറമെ പാലക്കാട് - തിരുന്നല്‍വേലി എക്സ്പ്രസ് തൂത്തൂക്കുടിയിലേക്ക് നീട്ടാനും തീരുമാനമായി.

എറണാകുളം - വേളങ്കണ്ണി സര്‍വീസ് തിങ്കള്‍, ശനി ദിവസങ്ങളിലാണ്. ചൊവ്വ, ഞായര്‍ ദിവസങ്ങളിലാണ് തിരിച്ചുള്ള ട്രെയിനുകള്‍. 06361 എന്ന നമ്പറില്‍ പ്രത്യേക സര്‍വീസായിട്ടായിരുന്നു ട്രെയിന്‍ ഓടിക്കൊണ്ടിരുന്നത്. എന്നാല്‍ ഇനി മുതല്‍ 16361 എന്ന നമ്പറിലായിരിക്കും ട്രെയിന്‍.

ഉച്ച തിരിഞ്ഞ് 12.35-നാണ് എറണാകുളത്ത് നിന്ന് ട്രെയിന്‍. പുലര്‍ച്ചെ 5.50-ന് വേളാങ്കണ്ണയിലെത്തും. തിരിച്ചുള്ള ട്രെയിനിന്റെ നമ്പര്‍ 16362 ആണ്. വൈകുന്നേരം 6.30-ന് വേളാങ്കണ്ണിയില്‍ നിന്ന് പുറപ്പെടുന്ന ട്രെയിന്‍ അടുത്ത ദിവസം ഉച്ചയ്ക്ക് 12 മണിക്ക് എറണാകുളത്തെത്തും.

ചൊവ്വ, വെള്ളി ദിവസങ്ങളിലാണ് തിരുപ്പതിയില്‍ നിന്ന് കൊല്ലം വരെയുള്ള സര്‍വീസ്. ബുധന്‍, ശനി ദിവസങ്ങളിലാണ് തിരിച്ചുള്ള സര്‍വീസ്. തിരുപ്പതിയില്‍ നിന്ന് ഉച്ചതിരിഞ്ഞ് 2.40-ന് ആരംഭിക്കുന്ന യാത്ര അടുത്ത ദിവസം രാവിലെ 6.20-ന് കൊല്ലത്തെത്തും. സേലം, പാലക്കാട്, തൃശൂര്‍, കോട്ടയം വഴിയാണ് സര്‍വീസ്.

കൊല്ലത്ത് നിന്ന് രാവിലെ 10 മണിക്കാണ് ട്രെയിന്‍ യാത്ര ആരംഭിക്കുന്നത്. അടുത്ത ദിവസം പുലര്‍ച്ചെ 3.20 ട്രെയിന്‍ തിരുപ്പതിയിലെത്തും. സമയം സംബന്ധിച്ചുള്ള ഔദ്യോഗിക സ്ഥിരീകരണം റെയില്‍വെയില്‍ നിന്ന് ഉടനുണ്ടാകുമെന്നാണ് പ്രതീക്ഷിക്കുന്നത്.