ന്യൂഡല്‍ഹി: വാട്‌സ്ആപ്പിലൂടെ ചാര സോഫ്റ്റ് വെയര്‍ ഉപയോഗിച്ച് പലരുടേയും വിവരങ്ങള്‍ ചോര്‍ത്തിയെന്ന് വെളിപ്പെടുത്തല്‍ വലിയ വിവാദമായി മാറിയിരിക്കുകയാണ്. കേന്ദ്ര സര്‍ക്കാരിനെതിരെ പ്രതിപക്ഷം രംഗത്തെത്തിയിരിക്കുന്നത്. കോണ്‍ഗ്രസ് നേതാവ് പ്രിയങ്ക ഗാന്ധിയുടെ വിവരങ്ങളും ചോര്‍ത്തിയിട്ടുണ്ടെന്നാണ് കോണ്‍ഗ്രസ് ആരോപിക്കുന്നത്.

ഇസ്രായേല്‍ ചാര സോഫ്റ്റ് വെയര്‍ ഉപയോഗിച്ച് പ്രിയങ്കയുടെ വാട്‌സ് ആപ്പിലൂടെ വിവരങ്ങള്‍ ചോര്‍ത്തിയെന്നും ഇത് സംബന്ധിച്ച സന്ദേശം വാട്‌സ്ആപ്പ് ഫോണിലേക്ക് അയച്ചതായും കോണ്‍ഗ്രസ് പറയുന്നു. നരേന്ദ്രമോദി സര്‍ക്കാര്‍ തിരഞ്ഞെടുപ്പിന് മുമ്പായി പ്രതിപക്ഷ നേതാക്കളുടേയും പൗരന്മാരുടേയും വിവരങ്ങള്‍ ചോര്‍ത്തുകയായിരുന്നുവെന്നും കോണ്‍ഗ്രസ് വക്താവ് രണ്‍ദീപ് സിങ് സുര്‍ജെവാല ചോദിച്ചു.

Read More: വിവരചോർച്ച: സംഭവത്തെ കുറിച്ച് രണ്ടു തവണ സർക്കാരിനെ അറിയിച്ചിരുന്നുവെന്ന് വാട്സാപ്

സര്‍ക്കാരിന് മെയ് മാസം മുതല്‍ തന്നെ ഇതേ കുറിച്ച് അറിയാമായിരുന്നുവെന്നും അധികാരത്തിലിരിക്കുന്നവര്‍ ചെയ്തത് കടുത്ത ക്രിമിനല്‍ കുറ്റമാണെന്നും സുര്‍ജെവാല പ്രതികരിച്ചു. വിഷയത്തില്‍ സര്‍ക്കാര്‍ ഇപ്പോഴും മൗനം തുടരുകയാണെന്നും ഫോണ്‍ ചോര്‍ത്തുന്നതിനെ കുറിച്ച് അറിയാമായിരുന്നിട്ടും സര്‍ക്കാര്‍ ഒന്നും ചെയ്തില്ലെന്നും കോണ്‍ഗ്രസ് പറഞ്ഞു.

മാധ്യമപ്രവര്‍ത്തകരുടെയും ആക്ടിവിസ്റ്റുകളുടെയും വാട്‌സാപ്പ് സന്ദേശങ്ങള്‍ ചോര്‍ന്നത് അറിയില്ലെന്ന കേന്ദ്ര വാദം തള്ളി വാട്‌സആപ്പ് രംഗത്തെത്തിയിരുന്നു. ഇസ്രയേല്‍ ചാരസംഘടന വാട്‌സആപ്പ് സന്ദേശങ്ങള്‍ ചോര്‍ത്തിയെന്ന വിവരം കഴിഞ്ഞ മെയില്‍ കേന്ദ്ര സര്‍ക്കാരിനെ അറിയിച്ചതിന് പിന്നാലെ സെപ്റ്റംബറില്‍ 121 ഇന്ത്യക്കാരുടെ വാട്‌സആപ്പ് സന്ദേശങ്ങള്‍ ചോര്‍ന്നതായി ചൂണ്ടികാട്ടി കേന്ദ്ര സര്‍ക്കാരിന് കത്ത് നല്‍കിയിരുന്നതായും വാട്‌സആപ്പ്. ഐടി വകുപ്പിനെയാണ് ഫെയ്‌സ്ബുക്കിന്റെ ഉടമസ്ഥതയിലുള്ള വാട്‌സആപ്പ് മുന്നറിയിപ്പ് കത്ത് നല്‍കിയതെന്ന് സന്‍ഡേ എക്‌സ്പ്രസ് റിപ്പോര്‍ട്ട് ചെയ്യുന്നു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook