കര്‍ണാടക: വര്‍ഗീയ, പ്രതിഷേധ കേസുകളില്‍ കുറ്റം ഒഴിവാക്കി ബിജെപി സര്‍ക്കാര്‍

ബെംഗളൂരു: 2013 നും 2018 നും ഇടയില്‍, സിദ്ധരാമയ്യയുടെ നേതൃത്വത്തില്‍ കര്‍ണാടകയിലെ കോണ്‍ഗ്രസ് സര്‍ക്കാര്‍, എസ്ഡിപിഐയുടെയും പിഎഫ്‌ഐയുടെയും 1600 ഓളം പ്രവര്‍ത്തകര്‍ക്കെതിരായ 176 കേസുകള്‍ റദ്ദാക്കാന്‍ ഉത്തരവിട്ടിരുന്നു. അന്ന് ബിജെപി നടപടിയില്‍ ശക്തമായി എതിര്‍പ്പ് അറിയിച്ച് രംഗത്തെത്തിയിരുന്നു. എന്നാല്‍ ഇപ്പോള്‍ സമാനമായ നടപടിയുമായി ബിജെപി മുന്നോട്ട് പോകുന്നതായി റിപോര്‍ട്ട്.

2019 ല്‍ അധികാരത്തില്‍ വന്നതിന് ശേഷം കഴിഞ്ഞ ഒക്ടോബറില്‍ കര്‍ണാടകയിലെ ബിജെപി നേതൃത്വത്തിലുള്ള സര്‍ക്കാര്‍, വിദ്വേഷം ഉള്‍പ്പെടെയുള്ള 34 കേസുകളില്‍ പ്രതികളായ 341 പേരെ വെറുതെ വിടാന്‍ സഹായിക്കുന്നതിന് സംസ്ഥാന പൊലീസിന്റെയും സ്വന്തം നിയമ വകുപ്പിന്റെയും പ്രോസിക്യൂഷന്റെയും എതിര്‍പ്പുകള്‍ മറികടന്നു. വിവാദപ്രസംഗം, വര്‍ഗീയ കലാപങ്ങള്‍, കര്‍ഷക പ്രതിഷേധങ്ങള്‍ എന്നിവയും ഇതില്‍ ഉള്‍പ്പെടുന്നു.

നിലവിലെ സര്‍ക്കാര്‍ ചുമതലയേല്‍ക്കുന്നതിന് മുമ്പുള്ള 2009-2019 10 വര്‍ഷം കാലയളവിലെ 34 കേസുകള്‍, ഇന്ത്യന്‍ എക്സ്പ്രസ് അവലോകനം ചെയ്തു. ഇതില്‍ 16 കേസുകളില്‍ സംഘപരിവാറുമായി ബന്ധമുള്ള 113 യുവജന സംഘടനാ പ്രവര്‍ത്തകര്‍ ഉള്‍പ്പെടുന്നു: വിശ്വഹിന്ദു പരിഷത്തിന്റെ അനുബന്ധ സംഘടനയായ ഹിന്ദു ജാഗരണ്‍ വേദികെ, ബജ്റംഗ്ദളും ശ്രീരാമസേനയും. ബാക്കിയുള്ള 18 എണ്ണം 228 വ്യക്തികള്‍ ഉള്‍പ്പെടുന്ന കര്‍ഷകരുടെയും മറ്റ് ഗ്രൂപ്പുകളുടെയും പ്രതിഷേധവുമായി ബന്ധപ്പെട്ടിരിക്കുന്നു.

2022 ഒക്ടോബര്‍ 1 ന് ആഭ്യന്തര വകുപ്പ് പുറപ്പെടുവിച്ച ഉത്തരവില്‍ പരാമര്‍ശിച്ചിട്ടുള്ള 34 കേസുകള്‍ പിന്‍വലിക്കുന്നതിന് ആവശ്യമായ അപേക്ഷകള്‍ ബന്ധപ്പെട്ട കോടതികളില്‍ സമര്‍പ്പിക്കാന്‍ പ്രോസിക്യൂഷന്‍ വകുപ്പിന് നിര്‍ദ്ദേശം നല്‍കി. 2022 സെപ്തംബര്‍ 19-ന് അനുമതിക്കായി സംസ്ഥാന കാബിനറ്റ് മുമ്പാകെ സമര്‍പ്പിച്ച രേഖകള്‍ പ്രകാരം ഈ 34 കേസുകളില്‍ ഓരോന്നും പിന്‍വലിക്കാന്‍ സംസ്ഥാന പൊലീസും പ്രോസിക്യൂഷന്‍ വകുപ്പും നിയമവകുപ്പും എതിര്‍പ്പ് പ്രകടിപ്പിച്ചിരുന്നു. ആഭ്യന്തര മന്ത്രി അരഗ ജ്ഞാനേന്ദ്രയെ ബന്ധപ്പെട്ടപ്പോള്‍ പറഞ്ഞു: ‘ഇത് വലതുപക്ഷ പ്രവര്‍ത്തകര്‍ മാത്രമല്ല, കര്‍ഷക പ്രതിഷേധങ്ങളിലും ഭാഷാ പ്രതിഷേധങ്ങളിലും ഉള്‍പ്പെട്ടവരുണ്ട്… ഇതില്‍ പല കേസുകളും നിരപരാധികള്‍ക്കെതിരെയും അനാവശ്യമായും ഫയല്‍ ചെയ്യപ്പെട്ടതാണ്.’ നിയമമന്ത്രി ജെ സി മധു സ്വാമി 2022 ഓഗസ്റ്റില്‍ ഇത് വ്യക്തമാക്കിയിരുന്നു.