നല്ലത് ഉടന്‍ സംഭവിക്കുമെന്ന് പനീര്‍സെല്‍വം; തമിഴകത്ത് ഗവര്‍ണര്‍ കേന്ദ്രസേനയെ ഇറക്കിയേക്കും

ചെന്നൈ: തമിഴ്നാട്ടില്‍ നല്ലത് ഉടന്‍ സംഭവിക്കുമെന്ന് കാവല്‍ മുഖ്യമന്ത്രി പനീര്‍സെല്‍വം. അണ്ണാ ഡിഎംകെയെ തകര്‍ക്കാന്‍ ആര്‍ക്കും സാധിക്കില്ലെന്നും ജയലളിത വളര്‍ത്തിയ പാര്‍ട്ടിയാണിതെന്നും അദ്ദേഹം പറഞ്ഞു. പ്രവര്‍ത്തകരുടെതാണ് പാര്‍ട്ടിയെന്നും അതിനെ കുടുംബവാഴ്ചയ്ക്ക് വിട്ടുകൊടുക്കില്ലെന്നും അദ്ദേഹം കൂട്ടിച്ചേര്‍ത്തു.

അതേസമയം, തമിഴ്‌നാട്ടിലെ ഭരണ പ്രതിസന്ധി ഒഴിവാക്കാന്‍ ഗവര്‍ണര്‍ ഉടന്‍ ഇടപെടണമെന്ന് എം.കെ സ്റ്റാലിന്‍ ആവശ്യപ്പെട്ടു. ഗവര്‍ണര്‍ വിദ്യാസാഗാര്‍ റാവുവിനെ കണ്ടശേഷം മാധ്യമങ്ങളോട് സംസാരിക്കുകയായിരുന്നു സ്റ്റാലിന്‍. തമിഴ്നാട്ടിലെ സ്ഥിതിഗതികള്‍ വഷളാകുന്ന സാഹചര്യത്തില്‍ ഗവര്‍ണര്‍ ഇടപെട്ട് കേന്ദ്രസേനയെ ഇറക്കിയേക്കുമെന്നാണ് സൂചന. ക്രമസമാധാന നില തകരുമെന്ന ആശങ്കിലാണ് ഗവര്‍ണര്‍ കേന്ദ്രസേനയെ വിളിക്കാന്‍ ആലോചിക്കുന്നത്.