ജിഗ്നേഷ് മെവാനിക്കെതിരെ ജാമ്യമില്ലാ വാറന്റ്

അഹമ്മദാബാദ്: ദലിത് നേതാവ് ജിഗ്നേഷ് മെവാനിക്കെതിരെ ജാമ്യമില്ലാ വാറന്റ്. ഗുജറാത്തിലെ മെട്രോപോളിറ്റൻ കോടതിയാണ് ജിഗ്നേഷ് മെവാനിക്കെതിരെ ജാമ്യമില്ലാ വാറന്റ് പുറപ്പെടുവിച്ചത്. രാജധാനി എക്സ്പ്രസ് തടഞ്ഞതുമായി ബന്ധപ്പെട്ട കേസിൽ ഹാജരാകത്തതിനെത്തുടർന്നാണ് കോടതിയുടെ നടപടി.

എന്നാൽ തിരഞ്ഞെടുപ്പിൽ മത്സരിക്കുന്നതിനായി നോമിനേഷൻ നൽകുന്നതിന്റെ തിരക്ക് മൂലമാണ് കോടതിയിൽ ഹാജരാകാൻ കഴിയാതെ പോയത് എന്ന് ജിഗ്നേഷിന്റെ അഭിഭാഷകർ കോടതിയെ അറിയിച്ചു. എന്നാൽ മജിസ്ട്രേറ്റായ ആർ.എസ്.ലാംഗ ഈ​ വാദം അംഗീകരിച്ചില്ല. ജിഗ്നേഷ് മെവാനി ഉൾപ്പെടെ കേസിൽ പ്രതികളായ 12 പേർക്കെതിരെയും ജാമ്യമില്ലാ വാറന്റ് പുറപ്പെടുവിച്ചിട്ടുണ്ട്.

കഴിഞ്ഞ ജനുവരി 11നാണ് രാജധാനി എക്സ്പ്രസ് തടഞ്ഞ് സമരം നടത്തിയതിന് ജിഗ്നേഷ് മെവാനിയെ അറസ്റ്റ് ചെയ്തത്. ഈ കേസിൽ 40 പേരാണ് വിചാരണ നേരിടുന്നത്.