ഡല്‍ഹി: ഉത്തരാഖണ്ഡ് മുന്‍ മുഖ്യമന്ത്രി എന്‍.ഡി തിവാരിയുടെ മകന്‍ രോഹിത് ശേഖറിനെ കഴിഞ്ഞ ദിവസമാണ് ഡല്‍ഹിയിലെ വീട്ടില്‍ മരിച്ച നിലയില്‍ കണ്ടെത്തിയത്. ദുരൂഹ സാഹചര്യത്തിലായിരുന്നു മൃതദേഹം കണ്ടെത്തിയത്. മൂന്ന് ദിവസം പിന്നിടുമ്പോള്‍ സംഭവം കൊലപാതകമാണെന്ന വിലയിരുത്തലിലെത്തിയിരിക്കുകയാണ് പൊലീസ്. കൊലപാതകത്തിന് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിരിക്കുകയാണ് ഡല്‍ഹി പൊലീസ്.

രോഹിത്തിന്റെ പോസ്റ്റ് മോര്‍ട്ടം റിപ്പോര്‍ട്ടിന്റെ അടിസ്ഥാനത്തിലാണ് കൊലപാതകമാണെന്ന നിഗമനത്തിലേക്ക് പൊലീസ് എത്തിച്ചേര്‍ന്നത്. തലയണ ഉപയോഗിച്ച് ശ്വാസം മുട്ടിച്ച് കൊന്നതാകാം എന്നാണ് പൊലീസ് നിഗമനം. ഡല്‍ഹി ഡിഫന്‍സ് കോളനിയിലെ വീട്ടില്‍ നിന്നുമാണ് രോഹിത്തിനെ മരിച്ച നിലയില്‍ കണ്ടെത്തിയത്.

വര്‍ഷങ്ങള്‍ നീണ്ട നിയമയുദ്ധത്തിനൊടുവിലാണ് തിവാരി രോഹിത്തിന്റെ പിതൃത്വം അംഗീകരിച്ചത്. 2014 ലായിരുന്നു തിവാരി രോഹിത്തിനെ മകനായി അംഗീകരിച്ചത്. ഡിഎന്‍എ ടെസ്റ്റിലൂടെയാണ് രോഹിത് തിവാരിയുടെ മകനാണെന്നത് തെളിഞ്ഞത്.

കേസിന്റെ അന്വേഷണം ഡല്‍ഹി ക്രൈം ബ്രാഞ്ചിന് കൈമാറിയിരിക്കുകയാണ്.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook