ഒരു കോടി രൂപ വില വരുന്ന 2,000 എംഡിഎംഎ ഗുളികകള്‍ പിടിച്ചെടുത്തു; ആഫ്രിക്കന്‍ സ്വദേശി അറസ്റ്റില്‍

മുംബൈ: ഒരു കോടി രൂപ വിലമതിക്കുന്ന 2,000 എംഡിഎംഎ ഗുളികകളുമായി പിടികൂടി മുംബൈ നാര്‍ക്കോട്ടിക്സ് കണ്‍ട്രോള്‍ ബ്യൂറൊ. ഫോറിന്‍ പോസ്റ്റ് ഓഫിസിലെത്തിയ പാഴ്സലിലായിരുന്നു എംഡിഎംഎ. സംഭവവുമായി ബന്ധപ്പെട്ട് ഒരു ആഫ്രിക്കന്‍ സ്വദേശിയെ അറസ്റ്റ് ചെയ്തു.

പിങ്ക്, മഞ്ഞ, പച്ച എന്നീ നിറങ്ങളിലായിരുന്നു എംഡിഎംഎ ഗുളികകള്‍. ഏകദേശം ഒരു കിലോയോളമായിരുന്നു ഗുളികകളുടെ തൂക്കം. എന്‍സിബി മുംബൈ സോണല്‍ ഡയറക്ടര്‍ അമിത് ഖാവത്തിന്റെ നേതൃത്വത്തിലാണ് അന്വേഷണം.

പാഴ്സലിന്റെ സ്വീകര്‍ത്താവിനെയാണ് നിലവില്‍ അറസ്റ്റ് ചെയ്തിരിക്കുന്നത്. ജോണ്‍ സണ്‍ഡെ എന്നാണ് ഇയാളുടെ പേര്. നല്ലസോപാരയില്‍ നിന്നാണ് ജോണിനെ പിടികൂടിയത്. താമസ സ്ഥലത്ത് നിന്ന് വ്യാജ ഇന്ത്യന്‍ പാസ്പോര്‍ട്ടും കണ്ടെത്തി.

ഡൽഹി, മുംബൈ, ഗോവ, തുടങ്ങിയ നഗരങ്ങളില്‍ വിതരണം ചെയ്യുന്നതിനായാണ് എംഡിഎംഎ എത്തിച്ചതെന്നാണ് ചോദ്യം ചെയ്യലില്‍ ജോണ്‍ പറഞ്ഞതെന്ന് ഒരു ഉദ്യോഗസ്ഥന്‍ അറിയിച്ചു. ഇയാളുടെ പക്കൽ നിന്ന് പിടിച്ചെടുത്ത ഇന്ത്യൻ പാസ്പോർട്ട് പാഴ്സലുകൾ ബുക്ക് ചെയ്യുന്നതിനായി ഉണ്ടാക്കിയതാണെന്നും അദ്ദേഹം കൂട്ടിച്ചേര്‍ത്തു.