സർക്കാർ ഉദ്യോഗസ്ഥനെ കൊണ്ട് ഷൂ ലേസ് കെട്ടിച്ച ബിജെപി മന്ത്രി വിവാദത്തിൽ-വീഡിയോ

ലക്‌നൗ: യോഗാ ദിനത്തിൽ സര്‍ക്കാര്‍ ഉദ്യോഗസ്ഥനെ കൊണ്ട് ഷൂ ധരിപ്പിച്ച ബിജെപി മന്ത്രിയുടെ നടപടി വിവാദത്തില്‍. ഉത്തര്‍പ്രദേശിലെ ന്യൂനപക്ഷ വിഭാഗത്തിന്റെയും ക്ഷീരവികസന വകുപ്പിന്റെയും മന്ത്രിയായ ലക്ഷ്മി നാരായൺ ചൗധരിയാണ് ഉദ്യോഗസ്ഥനെ കൊണ്ട് തന്റെ കാലിലെ ഷൂ ലേസ് കെട്ടിച്ച് പുലിവാൽ പിടിച്ചത്.

ഉദ്യോഗസ്ഥനെ ക്കൊണ്ട് ഷൂ ധരിപ്പിക്കുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ വൈറലായതോടെയാണ് മന്ത്രിയുടെ നടപടി വിവാദമായിരിക്കുന്നത്. യോഗ ദിനത്തിലെ ആഘോഷങ്ങള്‍ക്ക് ശേഷം തിരികെ മടങ്ങുമ്പോഴാണ് ഉദ്യോഗസ്ഥന്‍ മന്ത്രിയുടെ കാലില്‍ ഷൂ ധരിപ്പിച്ചത്.

#WATCH: UP Minister Laxmi Narayan gets his shoelace tied by a government employee at a yoga event in Shahjahanpur, yesterday. pic.twitter.com/QbVxiQM7bI

— ANI UP (@ANINewsUP) June 22, 2019

സംഭവം വിവാദമായതോടെ വിശദീകരണവുമായി മന്ത്രി തന്നെ രംഗത്ത് എത്തിയിട്ടുണ്ട്. ആരെങ്കിലും നമ്മളെ ഷൂ ധരിപ്പിക്കാന്‍ സഹായിക്കുകയാണെങ്കില്‍ അവരെ അഭിനന്ദിക്കുകയാണ് ചെയ്യേണ്ടത് എന്നാണ് മന്ത്രി പറഞ്ഞത്.

മുൻപും പ്രവൃത്തികൾ കൊണ്ടും പ്രസ്താവനകൾ കൊണ്ടും വിവാദങ്ങളിൽ ഇടം പിടിച്ചിട്ടുള്ള ആളാണ് ലക്ഷ്മി നാരായൺ. ഇന്ത്യ ആഗോള ശക്തിയായി മാറിയത് ശ്രീരാമന്‍ കാരണമാണെന്ന് മുൻപ് ഇദ്ദേഹം പറഞ്ഞിട്ടുണ്ട്. മറ്റൊരിക്കൽ ഹനുമാൻ ജാട്ട് വിഭാഗത്തിൽ പെടുന്ന ആളാണ് എന്നു പറഞ്ഞുകൊണ്ടായിരുന്നു ലക്ഷ്മി നാരായൺ വിവാദത്തിന് തിരി കൊളുത്തിയത്.