നരോദ ഗാം കൂട്ടക്കൊലക്കേസില്‍ പ്രതികളെ വെറുതെ വിട്ട നടപടി: എസ്ഐടി ഹൈക്കോടതിയെ സമീപിക്കും

ന്യൂഡല്‍ഹി: 2002ലെ നരോദ ഗാം കൂട്ടക്കൊലക്കേസില്‍ എല്ലാ പ്രതികളെയും വെറുതെ വിട്ട അഹമ്മദാബാദ് പ്രത്യേക കോടതിക്കെതിരെ സുപ്രീം കോടതി നിയോഗിച്ച പ്രത്യേക അന്വേഷണ സംഘം (എസ്ഐടി) ഗുജറാത്ത് ഹൈക്കോടതിയെ സമീപിക്കും. 11 ന്യൂനപക്ഷ സമുദായാംഗങ്ങള്‍ കൊല്ലപ്പെട്ട കേസില്‍ മുന്‍ ബിജെപി എംഎല്‍എ മായ കോഡ്‌നാനി, മുന്‍ ബജ്‌റംഗ് ദള്‍ നേതാവ് ബാബു ബജ്‌റംഗി, വിശ്വഹിന്ദു പരിഷത്ത് നേതാവ് ജയദീപ് പട്ടേല്‍ എന്നിവരുള്‍പ്പെടെ 67 പ്രതികളെയാണ് അഹമ്മദാബാദ കോടതി വെറുതെവിട്ടത്.

നരോദ ഗാം കേസിലെ കീഴ്ക്കോടതി ഉത്തരവിനെതിരെ എസ്ഐടി തീര്‍ച്ചയായും ഗുജറാത്ത് ഹൈക്കോടതിയില്‍ അപ്പീല്‍ നല്‍കും. എസ്ഐടി കോടതിയുടെ വിധിയുടെ പകര്‍പ്പ് കാത്തിരിക്കുന്നതിനാല്‍, വിധി പഠിച്ചതിന് ശേഷം അന്തിമ തീരുമാനം എടുക്കും, ”എസ്ഐടിയിലെ വൃത്തങ്ങള്‍ പറഞ്ഞു.

നരോദ ഗാമിലെ കൂട്ടക്കൊല 2002-ലെ ഒമ്പത് പ്രധാന വര്‍ഗീയ കലാപ കേസുകളില്‍ ഒന്നാണ്, എസ്സി നിയോഗിച്ച എസ്ഐടി അന്വേഷിക്കുകയും പ്രത്യേക കോടതികള്‍ കേള്‍ക്കുകയും ചെയ്തു. 2008ല്‍ ഗുജറാത്ത് പൊലീസില്‍ നിന്ന് എസ്‌ഐടി അന്വേഷണം ഏറ്റെടുക്കുകയും 30-ലധികം പേരെ അറസ്റ്റ് ചെയ്യുകയും ചെയ്തു.

കേസില്‍ കോഡ്‌നാനി (67), ബജ്രംഗി എന്നിവരെ കൂടാതെ മുന്‍ വിഎച്ച്പി നേതാവ് ജയദീപ് പട്ടേലിനെയും പ്രത്യേക കോടതി വെറുതെവിട്ടു. കേസില്‍ ആകെ 86 പ്രതികളുണ്ടായിരുന്നു, അതില്‍ 18 പേര്‍ വിചാരണ നടക്കുന്നതിനിടെ മരിച്ചു, അതേസമയം ഒരാളെ സിആര്‍പിസി (ക്രിമിനല്‍ നടപടിച്ചട്ടം) 169-ാം വകുപ്പ് പ്രകാരം കോടതി നേരത്തെ വെറുതെ വിട്ടിരുന്നു.

പ്രത്യേക കോടതിയുടെ വിധിയെ ഹൈക്കോടതിയില്‍ ചോദ്യം ചെയ്യുമെന്ന് ഇരകളുടെ കുടുംബാംഗങ്ങളുടെ അഭിഭാഷകര്‍ നേരത്തെ പറഞ്ഞിരുന്നു. 2002 ഫെബ്രുവരി 27-ന് ഗോധ്രയില്‍ സബര്‍മതി എക്‌സ്പ്രസ് കത്തിച്ചതിനെത്തുടര്‍ന്ന് ഗുജറാത്തില്‍ നടന്ന ഒമ്പത് പ്രധാന കലാപങ്ങളിലൊന്നാണ് നരോദ ഗാം കേസ്. കേസ് ദ്രുത വിചാരണയ്ക്കായി ഉത്തരവിട്ടിരുന്നു.