scorecardresearch

Latest News

മുസ്ലിം വിലക്ക്: അസംതൃപ്തി പ്രകടിപ്പിച്ച് കർണാടകയിലെ ക്ഷേത്ര കമ്മിറ്റികളും കച്ചവടക്കാരും

“ക്ഷേത്ര ഭരണകൂടത്തിന്റെ ഭാഗമായി ഞങ്ങൾ ഒരു മുസ്ലീമിനെയും ഉത്സവത്തിൽ നിന്ന് വിലക്കിയിട്ടില്ല. പക്ഷേ മുസ്ലീങ്ങളെ കച്ചവടം ചെയ്യാൻ അനുവദിക്കരുതെന്ന് വിഎച്ച്പിക്കാർ ഞങ്ങളോട് ആവശ്യപ്പെട്ടു,” ഒരു ക്ഷേത്ര ഭരണ സമിതി പ്രതിനിധി പറഞ്ഞു

ബെംഗളൂരു: കർണാടകയിൽ ക്ഷേത്ര പരിസരങ്ങളിലോ ഉത്സവങ്ങളിലോ മുസ്ലീം വ്യാപാരികൾ സ്റ്റാളുകൾ സ്ഥാപിക്കുന്നതിനുള്ള വിലക്ക് സംസ്ഥാനത്തുടനീളം വ്യാപിക്കുമ്പോൾ, വിലക്കിനെതിരെ ക്ഷേത്ര കമ്മിറ്റികളിലും വ്യാപാരികളിലും അസംതൃപ്തി വർദ്ധിക്കുന്നു. തിങ്കളാഴ്ച രണ്ട് ബി.ജെ.പി നേതാക്കൾ ഈ നീക്കത്തിനെതിരെ പ്രതിഷേധവുമായി രംഗത്തെത്തിയിരുന്നു, സംസ്ഥാന സർക്കാർ ഇതിൽ നടപടിയെടുക്കണമെന്ന് അവർ ആവശ്യപ്പെട്ടു.

ഹിജാബ് കോടതി ഉത്തരവിനെതിരെ പ്രതിഷേധിച്ച് തീരദേശ കർണാടകയിലെ മുസ്ലീം വ്യാപാരികൾ കടകളടച്ചതിന് ശേഷമാണ് ആദ്യം ബഹിഷ്കരണ ആഹ്വാനം വന്നത്. അന്നുമുതൽ, അവരെ ക്ഷേത്രപരിസരങ്ങളിൽ നിന്നും ഉത്സവങ്ങളിൽ നിന്നും ഒരു പഴയ നിയമത്തിന്റെ പേര് പറഞ്ഞ് മാറ്റി നിർത്തി.

ദക്ഷിണ കന്നഡയിലെ ബപ്പനാട് ദുർഗാപരമേശ്വരി, മംഗളാദേവി, പുത്തൂർ മഹാലിംഗേശ്വര ക്ഷേത്രങ്ങൾ എന്നിവയും വാർഷിക ഹൊസ മാർഗുടി, കൊല്ലൂർ മൂകാംബിക ക്ഷേത്രങ്ങളും ഇത്തരത്തിൽ ഉത്സവങ്ങളിൽ മുസ്ലീം വ്യാപാരികളെ ഒഴിവാക്കിയതിൽ ഉൾപ്പെടുന്നു.

മംഗലാപുരത്തിനടുത്തുള്ള ഒരു ദേവാലയമായ ബപ്പനാട് സാമുദായിക സൗഹാർദ്ദത്തിന്റെ പ്രതീകമായി കണക്കാക്കപ്പെടുന്നു. അവിടെയുള്ള ദുർഗാപരമേശ്വരി ക്ഷേത്രം മുസ്ലീം വ്യാപാരിയായ ബാപ്പ എന്നയാളുടെ സംഭാവനകൾ കൊണ്ടാണ് നിർമ്മിച്ചതെന്ന് പറയപ്പെടുന്നു. മുസ്ലീം വ്യാപാരികളെ ഒഴിവാക്കണമെന്ന വിഎച്ച്പിയുടെ ആവശ്യം താൻ നിരസിച്ചതായും എന്നാൽ സമ്മർദ്ദം മൂലം തങ്ങൾ വിട്ടുനിൽക്കുകയായിരുന്നെന്നും അതിന്റെ മാനേജ്‌മെന്റ് കമ്മിറ്റി മേധാവി പറഞ്ഞു.

കോവിഡിന് ശേഷമുള്ള വ്യാപാരം പ്രതീക്ഷിച്ച് നിൽക്കുമ്പോഴാണ് നിരോധനം മുസ്ലീം വ്യാപാരികളെ ബാധിച്ചത്. തീരദേശ കർണാടകത്തിൽ നവംബർ മുതൽ ഏപ്രിൽ വരെയുള്ള ആറ് മാസത്തെ ക്ഷേത്ര ഉത്സവ സീസൺ അവസാനത്തോട് അടുക്കുകയാണ്. ഈ കാലയളവിൽ, ഈ പ്രദേശത്ത് 40-50 വാർഷിക ഉത്സവങ്ങൾ നടക്കുന്നു. കർണാടകയ്ക്ക് പുറത്ത് നിന്നുള്ള വ്യാപാരികളും സ്റ്റാളുകൾ സ്ഥാപിക്കാൻ വരുന്നു.

ദക്ഷിണ കന്നഡ ജില്ലയിലെ ഹലേയങ്ങാടി ഗ്രാമത്തിൽ നിന്നുള്ള ഹുസൈൻ (54) 35 വർഷമായി തന്റെ പിതാവിന്റെ വ്യാപാരം ഏറ്റെടുത്ത് കളിപ്പാട്ടങ്ങൾ വിൽക്കുന്നു. “വാർഷിക ഉത്സവ സീസണും ഉറൂസും നവംബറിൽ ആരംഭിച്ച് ഏപ്രിലിൽ അവസാനിക്കും. ഈ വർഷങ്ങളിലെല്ലാം, ഞങ്ങൾ കുറഞ്ഞത് 40-50 സ്ഥലങ്ങളിൽ കച്ചവടം നടത്തും. മതം ഞങ്ങളെ ബഹിഷ്‌കരിക്കാനുള്ള ഒരു കാരണമായി മാറുമെന്ന് ഞങ്ങൾ ഒരിക്കലും കരുതിയിരുന്നില്ല,” ഹുസൈൻ പറഞ്ഞു.

ഹിന്ദുക്കളായ സഹ കടയുടമകൾക്കും സംഭവിക്കുന്ന കാര്യങ്ങളിൽ വിഷമമുണ്ടെന്ന് ഹുസൈൻ പറയുന്നു. “ഈ സമയത്ത് കുറഞ്ഞത് ആറുമാസമെങ്കിലും ഞങ്ങൾ ഒരുമിച്ചു ജീവിക്കുന്നു. ഞങ്ങൾ ഭക്ഷണം പങ്കിടുന്നു, പരസ്‌പരം ജോലി ചെയ്യുന്നു… ഈ കച്ചവടത്തിൽ ഏർപ്പെട്ടിരിക്കുന്നവർ ഒരിക്കലും ഈ മുസ്‌ലിം വിരുദ്ധ പ്രചാരണത്തിൽ ചേരില്ല, കാരണം അവർക്ക് ഞങ്ങളുടെ വേദന അറിയാം. പുറത്തുനിന്നുള്ളവരാണ് ക്ഷേത്രം അധികാരികളെ സമ്മർദ്ദത്തിലാക്കുന്നത്,” ഹുസൈൻ പറഞ്ഞു.

സ്റ്റാളുകൾ സ്ഥാപിക്കുന്നതിന് വാടകയും (8,000 മുതൽ 10,000 രൂപ വരെ) ജീവനക്കാർക്ക് ശമ്പളവും നൽകിയ ശേഷം, അവരുടെ ലാഭം വളരെ കുറവാണെന്നും കുറയുകയാണെന്നും അദ്ദേഹം പറയുന്നു. “ചില സ്ഥലങ്ങളിൽ, ഞങ്ങൾ 30,000 രൂപ വരെ സമ്പാദിക്കുന്നു, എന്നാൽ മറ്റുള്ളവയിൽ, ഞങ്ങൾ കഷ്ടിച്ച് മുന്നോട്ട് പോവുകയോ നഷ്ടത്തിൽ അവസാനിക്കുകയോ ചെയ്യുന്നു. പക്ഷേ, ഞങ്ങൾ നന്നായി പ്രവർത്തിക്കുകയാണെങ്കിൽ, ഈ ആറ് മാസത്തെ വരുമാനം ബാക്കിയുള്ള ആറ് മാസങ്ങളിൽ ഞങ്ങൾക്ക് സഹായകമാവുന്നു.

“എനിക്ക് മറ്റ് ജോലിയോ ബിസിനസോ ഒന്നും അറിയില്ല… പക്ഷേ എന്റെ കുട്ടികൾ കളിപ്പാട്ട കച്ചവടത്തിൽ തുടരാൻ ഞാൻ ആഗ്രഹിക്കുന്നില്ല,” ഹുസൈൻ കൂട്ടിച്ചേർക്കുന്നു.

നിരോധനം അവസാനത്തെ കടമ്പയാണെന്നും 25 വർഷമായി തുടരുന്ന കളിപ്പാട്ട വിൽപ്പന വ്യവസായം ഉപേക്ഷിക്കാൻ തീരുമാനിച്ചതായും മംഗളൂരു സ്വദേശി സുലൈമാൻ (55) പറയുന്നു. “ഇത് സങ്കടകരമാണ്… ഞങ്ങൾ ക്ഷേത്ര കമ്മിറ്റി അംഗങ്ങളെ കാണുമ്പോൾ, അവർ സമ്മർദ്ദത്തിലാണെന്ന് പറഞ്ഞ് വിട്ടുനിൽക്കാൻ ഞങ്ങളോട് അഭ്യർത്ഥിക്കുന്നു. മുസ്ലീങ്ങളെ ഉത്സവങ്ങളിൽ കച്ചവടം ചെയ്യാൻ അനുവദിച്ചാൽ ഗുരുതരമായ പ്രത്യാഘാതങ്ങൾ നേരിടേണ്ടിവരുമെന്ന് ചില ഹിന്ദു സംഘടനകൾ അവരെ ഭീഷണിപ്പെടുത്തിയിട്ടുണ്ട്,” സുലൈമാൻ പറഞ്ഞു.

, കുറഞ്ഞത് 400 വർഷമെങ്കിലും പഴക്കമുള്ള ക്ഷേത്രത്തിലെ വാർഷിക ഉത്സവത്തിൽ ഇത്തരമൊരു സാഹചര്യം ഉണ്ടാകുന്നത് ആദ്യമാണെന്ന് ബപ്പനാട് ശ്രീ ദുർഗാപരമേശ്വരി ക്ഷേത്രത്തിന്റെ ഭരണത്തലവനായ മഹാവീർ പറയുന്നു.

“ക്ഷേത്ര ഭരണകൂടത്തിന്റെ ഭാഗമായി ഞങ്ങൾ ഒരു മുസ്ലീമിനെയും ഉത്സവത്തിൽ നിന്ന് വിലക്കിയിട്ടില്ല. കാരണം ഈ ക്ഷേത്രം സമുദായങ്ങൾ തമ്മിലുള്ള സൗഹാർദത്തെ പ്രതീകപ്പെടുത്തുന്നു. അതെ, മുസ്ലീങ്ങളെ കച്ചവടം ചെയ്യാൻ അനുവദിക്കരുതെന്ന് വിഎച്ച്പിക്കാർ ഞങ്ങളോട് ആവശ്യപ്പെട്ടു. പക്ഷേ ഞങ്ങൾ അത് നിരസിച്ചു. പക്ഷേ, സാഹചര്യം മനസ്സിലാക്കി മുസ്‌ലിം വ്യാപാരികൾക്ക് വിട്ടുനിൽക്കേണ്ടി വന്നു. രജിസ്റ്റർ ചെയ്തവരിൽ ചിലർ അപേക്ഷ പിൻവലിച്ചു, മറ്റുള്ളവർ അപേക്ഷിക്കാതിരുന്നു,”മഹാവീർ പറയുന്നു

കൊവിഡ് വന്നതിന് ശേഷമാണ് മുസ്ലീങ്ങളെ തടയാനുള്ള ആഹ്വാനങ്ങൾ ആദ്യം ആരംഭിച്ചതെന്ന് മഹാവീർ പറഞ്ഞു. വിദ്വേഷ സന്ദേശങ്ങൾ സോഷ്യൽ മീഡിയയിൽ പ്രചരിച്ചതോടെയാണ് ഇതെന്നും അദ്ദേഹം പറഞ്ഞു. “കഴിഞ്ഞ ജനുവരിയിൽ കട്ടീലിലെ ദുർഗാ പരമേശ്വരി ക്ഷേത്രത്തിൽ വച്ചാണ് ഞങ്ങൾ ഇത് ആദ്യമായി നേരിട്ടത്. അതിനുശേഷം അത് മറ്റ് ഭാഗങ്ങളിലേക്കും വ്യാപിച്ചു,” അദ്ദേഹം പറഞ്ഞു.

കർണാടക ഹിന്ദു റിലീജിയസ് ഇൻസ്റ്റിറ്റ്യൂഷൻ ആൻഡ് ചാരിറ്റബിൾ എൻഡോവ്‌മെന്റ് നിയമം, 2002 ലെ 12ാം ചട്ടമാണ് മുസ്ലിം വ്യാപാരികളെ വിലക്കുന്നതിനായി ചൂണ്ടിക്കാട്ടുന്നത്. ഇത്തരം സ്ഥാപനങ്ങളുടെ “സ്ഥലത്തിന് സമീപമുള്ള സ്ഥലമോ കെട്ടിടമോ സ്ഥലമോ ഉൾപ്പെടെയുള്ള ഒരു വസ്തുവും അഹിന്ദുക്കൾക്ക് പാട്ടത്തിന് നൽകില്ല,” എന്നാണ് ചട്ടത്തിൽ പറയുന്നത്.

ഹിജാബ് വിരുദ്ധ സമരത്തിന്റെ മുൻനിരയിലുള്ള ഹിന്ദു ജാഗരൺ വേദികെ നേതാവ് പ്രകാശ് കുക്കെഹള്ളി പറഞ്ഞത്, തങ്ങൾ സർക്കാർ നിശ്ചയിച്ചിട്ടുള്ള നിയമങ്ങൾ പാലിക്കുക മാത്രമാണ് ചെയ്യുന്നതെന്നാണ്. ഈ നിയമം പ്രകാരം അനുവദിക്കപ്പെടാത്ത ആളുകളെ ബിസിനസ്സ് ചെയ്യാൻ അനുവദിക്കാനാവില്ലെന്നും പ്രകാശ് കുക്കെഹള്ളി പറഞ്ഞു.

ഹിന്ദു അനുകൂല സംഘടനകളുടെ ഭീഷണിയിൽ എല്ലാവരും നിശബ്ദരായിരിക്കുകയാണെന്ന് ഈയിടെ സമാപിച്ച ബപ്പനാട് ശ്രീ ദുർഗാപരമേശ്വരി ക്ഷേത്രോത്സവത്തിൽ തന്റെ കളിപ്പാട്ടക്കട സ്ഥാപിച്ച ഒരു ഹിന്ദു കടയുടമ പറഞ്ഞു. “ഞാൻ അവർക്കെതിരെ സംസാരിച്ചാൽ, അവർ മറ്റ് ഉത്സവങ്ങളിൽ എനിക്ക് കടകൾ സ്ഥാപിക്കാൻ കഴിയാത്ത അവസ്ഥയിലേക്ക് എത്തിക്കും,” അദ്ദേഹം പറഞ്ഞു. വിദ്വേഷ പ്രചരണം നടത്തി പോസ്റ്ററുകൾ പതിച്ചവർക്കെതിരെ പൊലീസ് നടപടിയെടുക്കാത്തത് എന്തുകൊണ്ടാണെന്നും കടയുടമ ചോദിക്കുന്നു.

Stay updated with the latest news headlines and all the latest News news download Indian Express Malayalam App.

Web Title: Muslim ban unease grows temple committees traders admit pressure