ന്യൂഡൽഹി: ബിജെപിയുടെ തിരഞ്ഞെടുപ്പ് പ്രചാരണത്തിനെതിരെ രൂക്ഷ വിമർശനവുമായി ബിഎസ്‌പി അധ്യക്ഷ മായാവതി. മോദിയാണ് ഇന്ത്യയെന്നും ഇന്ത്യ തന്നെയാണ് മോദിയെന്നുമുള്ള തരത്തിൽ പ്രചരണം ഇന്ത്യയ്ക്കും ജനാധിപത്യത്തിനും അപമാനമാണെന്ന് മായാവതി പറഞ്ഞു. കോൺഗ്രസ് ചെയ്ത തെറ്റ് ബിജെപി ആവർത്തിക്കുകയാണെന്നും അവർ കൂട്ടിച്ചേർത്തു.

“മോദിയാണ് ഇന്ത്യയെന്നും ഇന്ത്യയാണ് മോദിയെന്നും ചിത്രീകരിച്ചുകൊണ്ട് ബിജെപിയും ആർഎസ്എസും ആവർത്തിക്കുന്നത് കോൺഗ്രസ് ചെയ്ത പിഴവ് തന്നെയാണ്. ഇന്ത്യയെയും ജനാധിപത്യത്തെയും അപമാനിക്കുകയാണവർ. കോൺഗ്രസ് നേരത്തെ ചെയ്തത് പോലെ ഇന്ത്യയാണ് ഇന്ദിര, ഇന്ദിരയാണ് ഇന്ത്യ എന്ന നിലപാടാണ് ഇവരും തുടരുന്നത്. രാജ്യം അവരോട് പൊറുക്കില്ല.” മായാവതി ട്വിറ്ററിൽ കുറിച്ചു.

ഇന്ത്യൻ സൈന്യത്തെ മോദി സേനയെന്ന് യോഗി ആദിത്യനാഥ് വിശേഷിപ്പിച്ചിരുന്നു. തിരഞ്ഞെടുപ്പ് റാലിയിൽ സംസാരിക്കവേയാണ് ഉത്തർപ്രദേശ് മുഖ്യമന്ത്രി കൂടിയായ യോഗി ആദിത്യനാഥ് ഇന്ത്യൻ സൈന്യത്തെ മോദി ജി കാ സേന എന്ന് പറഞ്ഞത്. ഇത് ആയുധമാക്കി ബിജെപിയ്ക്കെതിരെ ആഞ്ഞടിക്കുകയാണ് പ്രതിപക്ഷ പാർട്ടികളും.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook