പട്ടാളവേഷമണിഞ്ഞ് പാര്‍ട്ടി റാലിയില്‍ പങ്കെടുത്ത് ബിജെപി എം.പി മനോജ് തിവാരി

ന്യൂഡല്‍ഹി: സൈനിക വേഷത്തില്‍ പാര്‍ട്ടി റാലിയില്‍ പ്രത്യക്ഷപ്പെട്ട ബിജെപി നേതാവ് മനോജ് തിവാരിക്കെതിരെ പ്രതിപക്ഷം രംഗത്തെത്തി. ഇന്ത്യയും പാക്കിസ്ഥാനും തമ്മില്‍ ബന്ധം വഷളായിരിക്കെയാണ് മനോജ് തിവാരി സൈനിക വേഷത്തില്‍ റാലിക്കെത്തിയത്. ഇന്ത്യന്‍ സൈന്യം ജീവന്‍ ത്യജിച്ച സംഭവത്തെ രാഷ്ട്രീയവത്കരിക്കുകയാണ് ബിജെപിയെന്ന് തൃണമൂല്‍ നേതാവ് ഡെറിക് ഒബ്രിയെന്‍ കുറ്റപ്പെടുത്തി.

'നാണക്കേട്, നാണക്കേട്. ബിജെപി എംപിയായ മനോജ് തിവാരി വോട്ടിന് വേണ്ടി സൈനിക വേഷം ഇട്ടിരിക്കുകയാണ്. നമ്മുടെ സൈനികരെ വോട്ടിന് വേണ്ടി മോദിയും അമിത് ഷായും രാഷ്ട്രീയവത്കരിക്കുകയാണ്. എന്നിട്ടാണ് രാജ്യസ്നേഹത്തെ കുറിച്ച് ക്ലാസ് എടുക്കുന്നത്, വില കുറഞ്ഞ ജീവിതം,' ഡെറിക് ട്വീറ്റ് ചെയ്തു.

ഡല്‍ഹിയില്‍ ബിജെപിയുടെ വിജയ് സങ്കല്‍പ് റാലിയില്‍ പങ്കെടുക്കുമ്പോഴാണ് മനോജ് തിവാരി പട്ടാള വേഷം അണിഞ്ഞത്. നാഷണല്‍ കോണ്‍ഫറന്‍സ് നേതാവ് ഒമര്‍ അബ്ദുളളയും തിവാരിക്കെതിരെ രംഗത്തെത്തി. 'പ്രതിപക്ഷം സൈനിക നടപടികള്‍ രാഷ്ട്രീയവത്കരിക്കുകയാണെന്ന് പറയുന്ന മോദിയും സംഘവും ചെയ്യുന്നത് എന്താണെന്ന് കാണു' എന്ന് പറഞ്ഞാണ് അദ്ദേഹം ചിത്രം ട്വീറ്റ് ചെയ്തത്.