തിരുവനന്തപുരം: മേഘാലയ സ്വദേശിയായ യുവതിയെ ട്രെയിനില്‍ പീഡിപ്പിക്കാന്‍ ശ്രമിച്ച സംഭവത്തില്‍ ഒരാള്‍ അറസ്റ്റില്‍. അമ്പലപ്പുഴ സ്വദേശിയായ സില്‍സണ്‍ ആണ് അറസ്റ്റിലായത്. അസാം റൈഫിള്‍സിലെ ഉദ്യോഗസ്ഥനായ അര്‍ദ്ധസൈനികനാണ് ഇയാളെന്നാണ് വിവരം. തിരുവനന്തപുരത്തെ പ്രഫസറുടെ വീട്ടിൽ ജോലിക്കു നിൽക്കുന്ന യുവതിയാണ് തമ്പാനൂർ പൊലീസിൽ പരാതി നൽകിയത്. കേരളത്തിലേക്കുള്ള യാത്രക്കിടെ ഫെബ്രുവരി 17ന് ഗുവാഹത്തി എക്സ്പ്രസിൽ വച്ച് ഉപദ്രവിക്കെപ്പട്ടുവെന്നാണ് യുവതിയുടെ പരാതി.
യാത്രയിൽ സെക്കൻറ് എ.സി കംപാർട്ട്മെൻറിൽ ഉറങ്ങുമ്പോൾ പുതപ്പുമാറ്റി സഹയാത്രികരായ മലയാളി യുവാക്കൾ കടന്നു പിടിച്ചുവെന്നും എഴുന്നേറ്റിരുന്നപ്പോൾ തന്റെ മടിയിൽ കയറി ഇരുന്നെന്നും ബഹളം വച്ചെങ്കിലും ആരും സഹായിച്ചില്ലെന്നും പരാതിയിൽ പറയുന്നു. രണ്ടു ദിവസത്തെ യാത്രയിലുടനീളം പീഡനം തുടർന്നതായും യുവതി അറിയിച്ചു.
ജോലി ചെയ്യുന്ന വീട്ടിലെത്തിയ ശേഷം വീട്ടുകാരുെട സഹായത്തോെടയാണ് തമ്പാനൂർ സ്റ്റേഷനിലെത്തി പരാതി നൽകിയത്. യുവാക്കൾ സഞ്ചരിച്ച ബെർത്ത് നമ്പർ ഉൾപ്പെടെയാണ് പരാതി നൽകിയത്. ഇവർ എറണാകുളത്ത് ഇറങ്ങിയെന്ന സംശയത്തെ തുടര്‍ന്ന് പൊലീസ് നടത്തിയ അന്വേഷണത്തിലാണ് ഒരാള്‍ അറസ്റ്റിലായത്.
