മുഴുവന്‍ കെപിസിസി ഭാരവാഹികളേയും ഒരുമിച്ച് പ്രഖ്യാപിക്കില്ല; ജംബോ പട്ടികയെന്ന് ആരോപണം

ന്യൂഡല്‍ഹി: പുതിയ കെപിസിസി ഭാരവാഹികളെ ഒരുമിച്ച് പ്രഖ്യാപിക്കില്ലെന്ന് സൂചന. ഘട്ടം ഘട്ടമായി പ്രഖാപിക്കുമെന്നാണ് റിപ്പോര്‍ട്ട്. കെപിസിസിയുടേത് ജംബോ പട്ടികയാണെന്ന ആക്ഷേപത്തെ തടയാനാണ് നീക്കം. ജനറല്‍ സെക്രട്ടറിമാര്‍, വര്‍ക്കിങ് പ്രസിഡന്റുമാര്‍, ഖജാന്‍ജി എന്നിവരെ ആദ്യ ഘട്ടത്തില്‍ പ്രഖ്യാപിച്ചേക്കും.

കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ 126 പേരുടെ പട്ടികയുമായാണ് ദേശീയ നേതൃത്വത്തെ സമീപിച്ചത്. ജംബോ പട്ടികയാണെന്ന ആക്ഷേപം ഉയര്‍ന്നതിനാല്‍ ഭാരവാഹികളുടെ കാര്യത്തില്‍ കെപിസിസി അധ്യക്ഷന് അന്തിമ തീരുമാനമെടുക്കാന്‍ കഴിഞ്ഞിരുന്നില്ല.

ആദ്യഘട്ടത്തില്‍ 30 ജനറല്‍ സെക്രട്ടറിമാരെയും അഞ്ച് വര്‍ക്കിങ് പ്രസിഡന്റുമാരേയും ഖജാന്‍ജിയേയും മാത്രമായിരിക്കും പ്രഖ്യാപിക്കുക. ഇന്ന് വൈകിട്ടോ നാളെയോ പട്ടിക എഐസിസിയുടെ ഔദ്യോഗിക വെബ് സൈറ്റില്‍ പ്രസിദ്ധീകരിക്കുന്നതായിരിക്കും.