ബെംഗളൂരു: കർണ്ണാടക നിയമസഭ തിരഞ്ഞെടുപ്പിൽ കോൺഗ്രസിനും ബിജെപിക്കും എതിരെ ജനതാദൾ എസുമായി സഖ്യമുണ്ടാക്കാൻ ഇടതുനീക്കം. ഇക്കാര്യത്തിൽ സിപിഎം ജനറൽ സെക്രട്ടറി സീതാറാം യെച്ചൂരിക്കും സിപിഐ അഖിലേന്ത്യ സെക്രട്ടറി സുധാകർ റെഡ്ഡിക്കും ഒരേ അഭിപ്രായമാണ്.

ജനതാദൾ എസുമായി സഖ്യവിഷയം ചർച്ച ചെയ്യാനാണ് ഇരു നേതാക്കളും ആലോചിക്കുന്നത്. “ഞാൻ ഇക്കാര്യം സീതാറാം യെച്ചൂരിയുമായി സംസാരിച്ചിരുന്നു. ഞങ്ങൾ ഇരുവരും ജനതാദൾ എസുമായി കൂടിയാലോചിക്കാനുളള തീരുമാനത്തിലാണ്”, സുധാകർ റെഡ്ഡി വ്യക്തമാക്കി.

ഇക്കാര്യത്തിൽ സംസ്ഥാനത്തെ സിപിഎം നേതാക്കളുമായി കൂടിയാലോചിക്കാൻ സിപിഐ സംസ്ഥാന കമ്മിറ്റിക്ക് സുധാകർ റെഡ്ഡി നിർദ്ദേശം നൽകി. മുൻ പ്രധാനമന്ത്രി ദേവ ഗൗഡ നേരത്തേ തന്നെ ഇടതുപക്ഷവുമായി സഖ്യത്തിന് താൽപര്യമുണ്ടെന്ന് പറഞ്ഞിരുന്നു.

മായാവതിയുടെ ബഹുജൻ സമാജ്‌വാദി പാർട്ടിയുമായി നേരത്തേ തന്നെ ജനതാദൾ എസ് സഖ്യതീരുമാനത്തിലേക്ക് എത്തിയിരുന്നു. 2019 ലോക്‌സഭ തിരഞ്ഞെടുപ്പിലും ഈ സഖ്യം തുടരുമെന്നാണ് ദേവ ഗൗഡ വ്യക്തമാക്കിയത്. സംസ്ഥാനത്തെ 14 ജില്ലകളിലായി 12 പൊതുമണ്ഡലങ്ങളിലും എട്ട് സംവരണ മണ്ഡലങ്ങളിലും ബിഎസ്‌പി മൽസരിക്കും.

Get Malayalam News and latest news update from India and around the world. Stay updated with today's latest News news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ