scorecardresearch

കെ.എം.ജോസഫിനോടുളള അനീതി: ജഡ്‌ജിമാരുടെ പ്രതിഷേധം, ഉചിതമായി ഇടപെടുമെന്ന് ചീഫ് ജസ്റ്റിസ്

കെ.എം.ജോസഫിന്റെ സീനിയോറിറ്റി മറികടന്ന കേന്ദ്രസർക്കാർ തീരുമാനമാണ് ജഡ്ജിമാരുടെ പ്രതിഷേധത്തിന് കാരണമായത്

Dipak Misra, Supreme Court collegium, Justice K M Joseph, SC Collegium, CJI Dipak Misra, SC Collegium meeting

ന്യൂഡൽഹി: ജഡ്‌ജി കെ.എം.ജോസഫിന്റെ സീനിയോറിറ്റി അട്ടിമറിച്ചതിലെ അതൃപ്തി സുപ്രീം കോടതിയിലെ മറ്റ് ജഡ്ജിമാർ ചീഫ് ജസ്റ്റിനെ കണ്ട് പ്രതിഷേധം അറിയിച്ചു. ജഡ്ജിമാരുടെ പ്രതിഷേധം ചർച്ച ചെയ്യാമെന്ന് ചീഫ് ജസ്റ്റിസ് അറിയിച്ചതായാണ് പുറത്തുവരുന്ന റിപ്പോർട്ടുകൾ. ജസ്റ്റിസ് കുര്യൻ ജോസഫ്, ജസ്റ്റിസ് മദൻ ബി.ലോക്കൂർ എന്നിവരാണ് ജഡ്ജിമാരുടെ പ്രതിഷേധം ചീഫ് ജസ്റ്റിസിനെ അറിയിച്ചത്. ജസ്റ്റിസ് രഞ്ജൻ ഗെഗോയിയുമായി വിഷയം ചർച്ച ചെയ്യാമെന്ന് ചീഫ് ജസ്റ്റിസ് അറിയിച്ചതായാണ് റിപ്പോർട്ടുകൾ സൂചിപ്പിക്കുന്നത്. വിഷയത്തിൽ ഉചിതമായ ഇടപെടൽ ഉണ്ടാകുമെന്നാണ് ചീഫ് ജസ്റ്റിസ് മുതിർന്ന ജഡ്ജിമാർക്ക് നൽകിയ ഉറപ്പെന്നാണ് സൂചന.

എന്നാൽ സത്യപ്രതിജ്ഞാ ക്രമത്തിൽ മാറ്റം വരുത്തിയതായി അറിവില്ല. സത്യപ്രതിജ്ഞ നാളെ രാവിലെ 10.30 നാണ് നടക്കുക.

സുപ്രീം കോടതിയിൽ പുതിയ ജഡ്ജിമാരെ നിയമിക്കുന്നവരുടെ പട്ടികയിൽ ജോസഫിനെ സീനിയോറിറ്റി മറികടന്നുവെന്നാണ് പരാതി. ആദ്യം കെ.എം.ജോസഫിന്റെ പേര് സുപ്രീം കോടതി കൊളീജിയം സർക്കാരിനോട് ആവശ്യപ്പെട്ടുവെങ്കിലും ആദ്യത്തെ തവണ കേന്ദ്ര സർക്കാർ ജോസഫിന്റെ പേര് അംഗീകരിച്ചില്ല. രണ്ടാമത്തെ തവണയും ജോസഫിന്റെ പേര് കൊളിജീയം നിർദ്ദേശിച്ചതിനെ തുടർന്നാണ് കേന്ദ്ര സർക്കാർ അംഗീകരിച്ചത്.

ജസ്റ്റിസ് ജോസഫിന്റെ സത്യപ്രതിജ്ഞ ആദ്യം നടത്തണമെന്ന്  സുപ്രീം കോടതി ജഡ്ജിമാർ  ചീഫ് ജസ്റ്റിനോട്  ആവശ്യപ്പെട്ടതായാണ് സൂചന. ചൊവ്വാഴ്ചയാണ് സത്യപ്രതിജ്ഞ. സുപ്രീം കോടതി ജഡ്ജിമാരില്‍ ഇന്ദിരാ ബാനര്‍ജിക്കും വിനീത് സരണിനും ശേഷമാണ് ജസ്റ്റിസ് ജോസഫിന്റെ പേരുള്ളത്. എന്നാല്‍ കെ.എം.ജോസഫിന്റെ പേരിന് പിന്നാലെയാണ് ഇന്ദിര ബാനര്‍ജിയുടെയും വിനീത് ശരണിന്റെയും പേര് കൊളീജിയം ശുപാര്‍ശ ചെയ്തതെന്ന് ജഡ്ജിമാര്‍ ചൂണ്ടിക്കാട്ടുന്നു. സീനിയോറിറ്റിയില്‍ ഇവര്‍ക്കു ശേഷം ജസ്റ്റിസ് ജോസഫിന്റെ പേര് കേന്ദ്രം പരിഗണിച്ചതാണ് ജഡ്ജിമാര്‍ക്കിടയില്‍ പ്രതിഷേധത്തിനിടയാക്കിയത്.

മുതിര്‍ന്ന അഭിഭാഷക ഇന്ദു മല്‍ഹോത്രയ്ക്കൊപ്പം കെ.എം.ജോസഫിനേയും നിയമിക്കാന്‍ ജനുവരി 10ന് കൊളീജിയം കേന്ദ്രത്തിന് ശുപാര്‍ശ നല്‍കിയിരുന്നു. എന്നാല്‍ കേന്ദ്രം ജോസഫിനെ തഴഞ്ഞു. പിന്നീട് ജൂലൈ 16ന് യോഗം ചേര്‍ന്ന് സുപ്രീം കോടതി കൊളീജിയം വീണ്ടും കെ.എം.ജോസഫിനെ ജഡ്ജിയാക്കാന്‍ ശുപാര്‍ശ നല്‍കി. കൊളീജിയം രണ്ടാം തവണയും ഒരേ പേര് നിര്‍ദ്ദേശിച്ചാല്‍ അംഗീകരിക്കാതെ കേന്ദ്രത്തിന് വേറെ വഴിയില്ലാതെ വന്നു.

2016ല്‍ ഉത്തരാഖണ്ഡില്‍ രാഷ്ട്രപതിഭരണം ഏര്‍പ്പെടുത്തിയതിനെതിരെ ജസ്റ്റിസ് ജോസഫ് അധ്യക്ഷനായ ബെഞ്ച് നല്‍കിയ വിധിയാണ് അദ്ദേഹത്തെ കേന്ദ്ര സര്‍ക്കാരിന് അപ്രിയനാക്കുന്നതെന്നാണ് വിലയിരുത്തപ്പെടുന്നത്. അതേസമയം, തങ്ങള്‍ ഹൈക്കോടതി ജഡ്ജിമാരുടെ സീനിയോറിറ്റി പട്ടികയനുസരിച്ചാണ് തീരുമാനമെടുത്തതെന്നും അതനുസരിച്ചാണ് ജസ്റ്റിസ് ജോസഫിനെ മൂന്നാമതാക്കിയതെന്നുമാണ് സര്‍ക്കാരിന്റെ വാദം.

Stay updated with the latest news headlines and all the latest News news download Indian Express Malayalam App.

Web Title: Km joseph supreme court judges meet chief justice