കൊൽക്കത്ത: ബിജെപി പ്രവർത്തകർ ക്രൂരമായി മർദ്ദിച്ച് കൊലപ്പെടുത്താൻ ശ്രമിച്ച പോലീസ് ഉദ്യോഗസ്ഥന് രക്ഷയൊരുക്കി മാധ്യമപ്രവർത്തകർ. കൊൽക്കത്ത ലാൽബസാറിലെ പോലീസ് ആസ്ഥാനത്തേക്ക് ബിജെപി പ്രവർത്തകർ നടത്തിയ മാർച്ച് അക്രമാസക്തമായതിനെ തുടർന്ന് നടത്തിയ ലാത്തിച്ചാർജിനിടെയായിരുന്നു സംഭവം.
പ്രതിഷേധവുമായി മൂന്നു റാലികളാണ് പോലീസ് ആസ്ഥാനത്തേക്ക് എത്തിയിരുന്നത്. ഇവരെ പോലീസ് ബാരിക്കേഡുയർത്തി തടഞ്ഞു. ബിജെപി പ്രവർത്തകർ കല്ലെറ് തുടങ്ങിയതിനെ തുടർന്ന് പോലീസ് ലാത്തിച്ചാർജ് നടത്തി. ഇതിനിടയിലാണ് ഈ പൊലീസുകാരൻ ഒറ്റപ്പെട്ടുപോയത്. ഇയാളെ ബിജെപി പ്രവർത്തകർ വളഞ്ഞിട്ട് ആക്രമിക്കുകയായിരുന്നു എന്ന് റിപ്പോർട്ടിൽ പറയുന്നു.
അടിച്ചുനിലത്തുവീഴ്ത്തിയ പോലീസുകാരന്റെ നെഞ്ചിൽ കയറിയിരുന്ന് പ്രവർത്തകർ അദ്ദേഹത്തെ മർദിക്കുകയും വടികൊണ്ട് അടിക്കുകയും ചെയ്യുകയായിരുന്നു. ഇതു ശ്രദ്ധയിൽപ്പെട്ട മാധ്യമപ്രവർത്തകർ ഓടിയെത്തി പ്രവർത്തകരെ തള്ളിമാറ്റി പോലീസുകാരനെ രക്ഷപ്പെടുത്തി. മാധ്യമപ്രവർത്തകർ എത്തുന്പോൾ അടിയേറ്റ് അബോധാവസ്ഥയിലായിരുന്നു പൊലീസുകാരൻ. ഇദ്ദേഹം ഇപ്പോൾ ആശുപത്രിയിൽ ചികിത്സയിലാണ്.
അതേസമയം, മാധ്യമപ്രവർത്തർക്ക് നന്ദി അറിയിച്ച് കൊൽക്കത്ത പൊലീസ് രംഗത്തെത്തി. രക്ഷാപ്രവർത്തനത്തിന് മാധ്യമപ്രവർത്തകരോടു പൊലീസ് നന്ദിയുള്ളവരായിരിക്കുമെന്ന് കോൽക്കത്ത ജോയിന്റ് കമ്മിഷണർ സുപ്രാതിം സർക്കാർ അറിയിച്ചതായും എൻഡിടിവി റിപ്പോർട്ട് ചെയ്യുന്നു.
Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook
