ജമ്മുവിൽ 20 മണിക്കൂർ നീണ്ട ഏറ്റുമുട്ടൽ: ജെയ്‌ഷെ കമാൻഡർ ഉൾപ്പെടെ രണ്ട് പാക് ഭീകരരെ വധിച്ചു

ജമ്മു: ജമ്മു കശ്മീരിലെ ഉധംപൂർ ജില്ലയിലുണ്ടായ ശക്തമായ ഏറ്റുമുട്ടലിൽ ജെയ്‌ഷെ മുഹമ്മദ് കമാൻഡർ ഉൾപ്പെടെ രണ്ട് പാക്കിസ്ഥാൻ ഭീകരരെ സുരക്ഷാ സേന വധിച്ചു. ബസന്ത്ഗഢ് മേഖലയിലെ വനപ്രദേശത്ത് ബുധനാഴ്ച ഉച്ചയോടെയാണ് 20 മണിക്കൂറിലധികം നീണ്ടുനിന്ന സൈനിക നടപടി അവസാനിച്ചത്.

ജമ്മു കശ്മീർ പൊലീസിൽ നിന്ന് ലഭിച്ച രഹസ്യവിവരത്തിന്റെ അടിസ്ഥാനത്തിൽ സൈന്യത്തിന്റെ വൈറ്റ് നൈറ്റ് കോർപ്‌സും സി.ആർ.പി.എഫും സംയുക്തമായാണ് 'ഓപ്പറേഷൻ കിയ' എന്ന പേരിൽ ഈ ദൗത്യം നടത്തിയത്. കൊല്ലപ്പെട്ടവരിൽ ഒരാൾ കഴിഞ്ഞ ഏതാനും വർഷങ്ങളായി ഈ മേഖലയിൽ സജീവമായിരുന്ന ജെയ്‌ഷെ മുഹമ്മദ് ഉന്നത കമാൻഡർ അവു മായയാണെന്ന് തിരിച്ചറിഞ്ഞിട്ടുണ്ട്.

Also Read: മുംബൈ വിമാനത്താവളത്തിൽ വിമാനങ്ങളുടെ ചിറകുകൾ തമ്മിൽ ഉരസി; അന്വേഷണത്തിന് ഉത്തരവ്

ചൊവ്വാഴ്ച വൈകുന്നേരമാണ് ഭീകരരും സുരക്ഷാ സേനയും തമ്മിൽ ആദ്യമായി വെടിവയ്പ്പുണ്ടായത്. തുടർന്ന് ഭീകരർ രക്ഷപ്പെടാതിരിക്കാൻ സൈന്യം പ്രദേശം പൂർണ്ണമായും വളയുകയും പ്രത്യാക്രമണം ശക്തമാക്കുകയും ചെയ്തു. ബുധനാഴ്ചയോടെയാണ് രണ്ട് ഭീകരരെയും വധിക്കാൻ സൈന്യത്തിന് സാധിച്ചത്.

ദീർഘകാലമായി ഭീകരവാദികളുടെ നുഴഞ്ഞുകയറ്റ കേന്ദ്രമായി അറിയപ്പെടുന്ന മേഖലയാണ് ബസന്ത്ഗഢ്. കഴിഞ്ഞ രണ്ട് വർഷമായി ഇവിടെ ഭീകരരുടെ സാന്നിധ്യം വീണ്ടും വർദ്ധിച്ചതിനെത്തുടർന്ന് സൈന്യം തിരച്ചിൽ കർശനമാക്കിയിരുന്നു. കഴിഞ്ഞയാഴ്ച വൈറ്റ് നൈറ്റ് കോർപ്‌സ് കമാൻഡർ ലഫ്റ്റനന്റ് ജനറൽ പ്രസന്ന കിഷോർ മിശ്ര ഈ മേഖല സന്ദർശിച്ച് സുരക്ഷാ ക്രമീകരണങ്ങൾ വിലയിരുത്തിയിരുന്നു.

Also Read: വോട്ടർ പട്ടിക പരിഷ്കരണം: വാദിക്കാൻ സുപ്രീം കോടതിയിൽ നേരിട്ടെത്തി മമത ബാനർജി

ഭീകരവിരുദ്ധ പോരാട്ടത്തിലെ വലിയ വിജയമാണിതെന്നും മറ്റ് ഏജൻസികളുമായുള്ള കൃത്യമായ ഏകോപനമാണ് ഈ വിജയത്തിന് പിന്നിലെന്നും സൈന്യം വ്യക്തമാക്കി. നിലവിൽ പ്രദേശത്ത് കൂടുതൽ ഭീകരർ ഒളിച്ചിരിപ്പുണ്ടോ എന്നറിയാൻ ഡ്രോണുകളുടെയും സ്നിഫർ ഡോഗുകളുടെയും സഹായത്തോടെ തിരച്ചിൽ തുടരുകയാണ്.

Read More: ഓൺലൈൻ ഗെയിം മാതാപിതാക്കൾ വിലക്കി; ഉത്തർപ്രദേശിൽ മൂന്ന് സഹോദരിമാർ ആത്മഹത്യ ചെയ്തു