ശ്രീനഗർ: ജമ്മു കശ്മീരിൽ 8 ഭീകരരെ സുരക്ഷാ ഉദ്യോഗസ്ഥർ വധിച്ചു. തെക്കൻ കശ്മീരിലെ ഷോപ്പിയാൻ, അനന്ത്നാഗ് എന്നീ ജില്ലകളിൽ മൂന്നിടങ്ങളിലായി നടന്ന വെടിവയ്പിലാണ് ഭീകരർ കൊല്ലപ്പെട്ടത്. ഭീകരരുമായുളള ഏറ്റുമുട്ടലിൽ 3 സൈനികർക്കും പരുക്കേറ്റിട്ടുണ്ട്.

ഷോപ്പിയാൻ, അനന്ത്നാഗ് ജില്ലകളിൽ ഭീകരർ ഒളിഞ്ഞിരിപ്പുണ്ടെന്ന രഹസ്യവിവരത്തെ തുടർന്ന് ശനിയാഴ്ച രാത്രി സൈന്യവും ജമ്മു കശ്മീർ പൊലീസും സിആർപിഎഫും ചേർന്ന് തിരച്ചിൽ നടത്തുകയായിരുന്നു. ഇതിനിടെ ഭീകരർ വെടിവയ്ക്കുകയായിരുന്നു. തുടർന്ന് സുരക്ഷാ ഉദ്യോഗസ്ഥരും ശക്തമായി തിരിച്ചടിച്ചു. വെടിവയ്പിൽ ഷോപ്പിയാനിൽ 7 ഭീകരരും അനന്ത്നാഗിൽ ഒരു ഭീകരനും കൊല്ലപ്പെട്ടു. അനന്ത്നാഗിൽനിന്നും ഒരു ഭീകരനെ പിടികൂടുകയും ചെയ്തതായി പൊലീസ് അറിയിച്ചു.

ഷോപ്പിയാനിലെ ദുഗ്റാദിലും കാഞ്ചിദോരയിലും വെടിവയ്പ് തുടരുകയാണ്. ജമ്മു കശ്മീരിൽ ഭീകരാക്രമണം ശക്തമായതിനെ തുടർന്ന് കഴിഞ്ഞ 3 ദിവസങ്ങളായി കശ്മീരിന്റെ പല ഭാഗത്തും സൈന്യം ഭീകരർക്കായുളള തിരച്ചിൽ ശക്തമാക്കിയിരുന്നു.

Get Malayalam News and latest news update from India and around the world. Stay updated with today's latest News news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ