കൊമേഡിയന്‍ വേദിയിൽ കുഴഞ്ഞു വീണു മരിച്ചു; അഭിനയമെന്ന് കരുതി കാണികൾ

ദുബായ്: സ്‌റ്റേജില്‍ പരിപാടി അവതരിപ്പിച്ചുകൊണ്ടിരിക്കെ സ്റ്റാന്‍ഡ് അപ് കൊമേഡിയന്‍ കുഴഞ്ഞു വീണു മരിച്ചു. ഇന്ത്യന്‍ വംശജനായ മഞ്ജുനാഥ് നായിഡു (36) ആണ് മരിച്ചത്. ഹൃദയസ്തംഭനമായിരുന്നു മരണകാരണം.

വെള്ളിയാഴ്ചകളില്‍ പതിവായി മഞ്ജുനാഥ് പതിവായി പരിപാടി അവരിപ്പിക്കാറുണ്ടായിരുന്നു. പരിപാടിക്കിടെ തളര്‍ച്ച തോന്നിയ മഞ്ജുനാഥ് വേദിയിലിട്ടിരുന്ന ഒരു ബെഞ്ചില്‍ ആദ്യം ഇരുന്നു. പിന്നീട് നിലത്തേക്ക് വീഴുകയും ചെയ്തു. ആളുകളെ ചിരിപ്പിക്കാനായി തമാശ കാണിക്കുകയാണെന്ന് കരുതി കാണികള്‍ ആദ്യമത് കാര്യമാക്കിയില്ലെന്ന് ഖലീജ് ടൈംസ് റിപ്പോര്‍ട്ട് ചെയ്യുന്നു. കാര്യത്തിന്റെ ഗൗരവം തിരിച്ചറിഞ്ഞതോടെ മഞ്ജുനാഥിനെ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല.

കുടുംബത്തെക്കുറിച്ചും പിതാവിനെയും കുറിച്ച് സംസാരിക്കുകയായിരുന്നു വേദിയില്‍ മഞ്ജുനാഥ്. വിഷാദത്തെ അതിജീവിച്ച കഥ തമാശരൂപേണ കാണികളോട് മഞ്ജുനാഥ് പങ്കുവയ്ക്കുകയായിരുന്നു. കഥ പറഞ്ഞു തുടങ്ങി ഒരു നിമിഷത്തിനുള്ളില്‍ തന്നെ അദ്ദേഹം കുഴഞ്ഞുവീഴുകയായിരുന്നുവെന്ന് അദ്ദേഹത്തിന്റെ സുഹൃത്ത് മിഖ്ദാദ് ദോഹദ്വാലയെ ഉദ്ധരിച്ച് ഖലീജ് ടൈംസ് റിപ്പോര്‍ട്ട് ചെയ്തു.

അബുബാദിയില്‍ ജനിച്ച മഞ്ജുനാഥ് കുറേക്കാലമായി ദുബായിലാണ് ജീവിച്ചുവന്നത്. മാതാപിതാക്കള്‍ നേരത്തെ തന്നെ മരിച്ചു. ഒരു സഹോദരന്‍ മാത്രമാണുള്ളത്. മറ്റ് ബന്ധുക്കളൊന്നും ഇവിടെയില്ലെങ്കിലും അവിടുത്തെ കലാകേന്ദ്രത്തിലുള്ളവരെല്ലാം മഞ്ജുനാഥിന് സ്വന്തം ബന്ധുക്കൾ തന്നെ ആയിരുന്നു എന്നും സുഹൃത്ത് പറഞ്ഞതായി ഖലീജ് ടൈംസ് റിപ്പോർട്ട് ചെയ്യുന്നു.