പാരിസിലെ വിനോദസഞ്ചാര കേന്ദ്രത്തിൽ ജയ് മഹാരാഷ്ട്ര വിളികളുമായി ഇന്ത്യൻ യുവാക്കൾ; വ്യാപക വിമർശനം

പാരിസ്: വിദേശ രാജ്യങ്ങളിലെത്തുന്ന ഇന്ത്യൻ വിനോദസഞ്ചാരികളുടെ പെരുമാറ്റം സംബന്ധിച്ച ചർച്ചകൾക്ക് വീണ്ടും തുടക്കമിട്ട് ഒരു വീഡിയോ സോഷ്യൽ മീഡിയയിൽ വൈറലാകുന്നു. ഫ്രാൻസിന്റെ തലസ്ഥാനമായ പാരിസിലെ ഒരു പ്രമുഖ വിനോദസഞ്ചാര കേന്ദ്രത്തിൽ വെച്ച് ഒരു കൂട്ടം ഇന്ത്യൻ യുവാക്കൾ 'ജയ് മഹാരാഷ്ട്ര' എന്ന് ഉച്ചത്തിൽ മുദ്രാവാക്യം വിളിക്കുന്നതാണ് വീഡിയോയിലുള്ളത്. ഇതിനെതിരെ വലിയ രീതിയിലുള്ള വിമർശനങ്ങളാണ് ഉയരുന്നത്.

Also Read:ഇറാനിൽ പുതിയ നേതൃത്വം വരേണ്ട സമയമായി: ഖമേനിയുടെ ആരോപണങ്ങൾക്ക് മറുപടിയുമായി ട്രംപ്

സോഷ്യൽ മീഡിയ പ്ലാറ്റ്ഫോമുകളിൽ പ്രചരിക്കുന്ന വീഡിയോയിൽ, പാരിസിലെ തിരക്കേറിയ ഒരു തെരുവിൽ ഒരുകൂട്ടം പുരുഷന്മാർ ഒത്തുചേർന്ന് ആവേശത്തോടെ മുദ്രാവാക്യം വിളിക്കുന്നത് കാണാം. തങ്ങളുടെ പ്രാദേശിക വികാരവും ഐക്യവും പ്രകടിപ്പിക്കാനാണ് ഇവർ ശ്രമിച്ചതെങ്കിലും, ഈ പ്രവർത്തി അവിടുത്തെ മറ്റ് വിനോദസഞ്ചാരികൾക്കും നാട്ടുകാർക്കും അലോസരമുണ്ടാക്കുന്നതായിരുന്നു എന്ന തരത്തിലാണ് വിമർശനങ്ങൾ വരുന്നത്.

വീഡിയോ വൈറലായതിന് പിന്നാലെ രൂക്ഷമായ പ്രതികരണങ്ങളാണ് നെറ്റിസൺസിൽ നിന്നും ഉണ്ടായത്. ഇത് അത്യന്തം അരോചകമായ പെരുമാറ്റമാണെന്നും ഇന്ത്യക്കാർക്ക് അന്താരാഷ്ട്ര തലത്തിൽ നാണക്കേടുണ്ടാക്കുന്ന പ്രവർത്തിയാണെന്നും പലരും കുറിച്ചു.

Also Read:ഇറാനിൽ ഇന്ത്യൻ കപ്പൽ ജീവനക്കാർ തടവിൽ; നയതന്ത്ര സഹായത്തിനായി ഇന്ത്യൻ എംബസി രംഗത്ത്

'സ്വന്തം നാടിനോടുള്ള സ്‌നേഹവും അഭിമാനവും പ്രകടിപ്പിക്കുന്നതിൽ തെറ്റില്ല, എന്നാൽ അത് മറ്റുള്ളവർക്ക് ബുദ്ധിമുട്ടുണ്ടാക്കുന്ന രീതിയിലോ പൊതുസ്ഥലത്തെ സമാധാനം കെടുത്തുന്ന രീതിയിലോ ആകരുത്,' എന്ന് ഒരു എക്‌സ് (ട്വിറ്റർ) ഉപയോക്താവ് അഭിപ്രായപ്പെട്ടു. വിദേശ രാജ്യങ്ങളിൽ പോകുമ്പോൾ അവിടുത്തെ സംസ്‌കാരത്തെയും രീതികളെയും ബഹുമാനിക്കാൻ ഇന്ത്യൻ സഞ്ചാരികൾ പഠിക്കണമെന്നും കമന്റുകൾ ഉയരുന്നുണ്ട്.

ഇന്ത്യൻ വിനോദസഞ്ചാരികൾ വിദേശങ്ങളിൽ ഇത്തരം അനാവശ്യ പ്രകടനങ്ങൾ നടത്തുന്നത് ഇതാദ്യമായല്ല. ഇതിനുമുൻപും സ്വിറ്റ്‌സർലൻഡിലും ലണ്ടനിലും സമാനമായ രീതിയിൽ ബഹളം വെക്കുന്ന ഇന്ത്യൻ സഞ്ചാരികളുടെ വീഡിയോകൾ വിവാദമായിരുന്നു. വിദേശ യാത്രകളിൽ പാലിക്കേണ്ട പ്രാഥമിക മര്യാദകളെക്കുറിച്ച് ഇന്ത്യക്കാർക്കിടയിൽ അവബോധം കുറവാണെന്ന ചർച്ചകൾക്കും ഈ സംഭവം വീണ്ടും തിരികൊളുത്തിയിരിക്കുകയാണ്.

Also Read:വെനസ്വേലയിലെ യുഎസ് വ്യോമാക്രമണത്തിൽ 40 മരണം; അപകടകരമായ കീഴ്‌വഴക്കമെന്ന് യുഎൻ

അതേസമയം, വീഡിയോയിലുള്ളവർ ഇത് കേവലം ആവേശത്തിന്റെ പുറത്ത് ചെയ്തതാണെന്നും ഇതിൽ ഇത്രമാത്രം പ്രതിഷേധിക്കേണ്ട കാര്യമില്ലെന്നും വാദിക്കുന്ന ഒരു വിഭാഗവും സോഷ്യൽ മീഡിയയിലുണ്ട്. എങ്കിലും, ഭൂരിഭാഗം പേരും ഇത്തരം പ്രവൃത്തികൾ വിദേശ രാജ്യങ്ങളിൽ ഇന്ത്യയുടെ പ്രതിച്ഛായയെ മോശമായി ബാധിക്കുമെന്ന പക്ഷക്കാരാണ്.

Read More: ഗ്രീൻലാൻഡ് ഏറ്റെടുക്കാനുള്ള യുഎസ് നീക്കം എതിർത്തു; ഏഴ് യൂറോപ്യൻ രാജ്യങ്ങൾക്ക് അധിക തീരുവ ഏർപ്പെടുത്തി ട്രംപ്