ബെംഗളൂരു: ഐഎസ്ആര്‍ഒയുടെ നാല്‍പ്പതാമത് വാര്‍ത്താവിനിമയ ഉപഗ്രഹമായ ജിസാറ്റ്-31 വിജയകരമായി വിക്ഷേപിച്ചു. ഫ്രഞ്ച് ഗയാനയില്‍ നിന്നും എരിയാനെ-5 എന്ന റോക്കറ്റാണ് ഉപഗ്രഹം ഭ്രമപണപഥത്തില്‍ എത്തിച്ചത്. ഇന്ത്യന്‍ സമയം പുലര്‍ച്ചെ 2.30നായിരുന്നു വിക്ഷേപണം.
‘2019ല്‍ ഐഎസ്ആര്‍ഒയുടെ മൂന്നാമത്തെ ദൗത്യമാണിത്. ജിസാറ്റ്-31ന്റെ വിജയകരമായ വിക്ഷേപണം എനിക്ക് ഏറെ സന്തോഷം തരുന്നുണ്ട്,’ ഇന്ത്യന്‍ സ്‌പേസ് റിസർച് സെന്റര്‍ ഓര്‍ഗനൈസേഷന്‍ സതീഷ് ധവാന്‍ സ്‌പേസ് സെന്റര്‍ ഡയറക്ടര്‍ എസ്.പാണ്ഡ്യന്‍ പറഞ്ഞു.
ഐഎസ്ആര്‍ഒയുടെ മുന്‍ ഉപഗ്രഹങ്ങളായ ഇന്‍സാറ്റ്/ജിസാറ്റ് എന്നിവയുടെ പിന്തുടര്‍ച്ചയാണ് ജിസാറ്റ്-31 എന്ന് അധികൃതര്‍ പറയുന്നു. നിലവില്‍ പ്രവര്‍ത്തിക്കുന്ന മറ്റ് വാര്‍ത്താവിനിമയ ഉപഗ്രഹങ്ങള്‍ക്ക് ജിസാറ്റ്-31 സഹായകമാവും. 2,535 കിലോഗ്രാം ഭാരമുള്ള ഉപഗ്രഹത്തിന്റെ കാലാവധി 15 വര്‍ഷമാണ്.
ടെലിവിഷന്‍, ഡിജിറ്റല്‍ സാറ്റലൈറ്റ് വാര്‍ത്താശേഖരണം, വിസാറ്റ് നെറ്റ്‌വര്‍ക്ക്. ഡിടിഎച്ച് ടെലിവിഷന്‍ സേവനം തുടങ്ങിയ കാര്യങ്ങള്‍ക്കാണ് ഉപഗ്രഹം പ്രയോജനപ്പെടുത്തുക. ഇന്ത്യയൊട്ടാകെയും അറബിക്കടല്‍, ബംഗാള്‍ ഉള്‍ക്കടല്‍, ഇന്ത്യന്‍ മഹാസമുദ്രം എന്നിവിടങ്ങളിലും കവറേജ് ലഭിക്കും. ജിസാറ്റ്-31ന് പുറമെ ഏരിയൻ -5 സൗദി ജിയോസ്റ്റേഷണൽ സാറ്റലൈറ്റ് 1 / ഹെല്ലസും വഹിച്ചുകൊണ്ടാണ് യാത്ര തിരിച്ചത്.
Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook
