ന്യൂഡല്‍ഹി: രാജ്യത്ത് പുതിയ കോവിഡ് കേസുകളില്‍ നേരിയ വര്‍ധന. കഴിഞ്ഞ 24 മണിക്കൂറിനിടെ 3,377 പേര്‍ക്ക് രോഗം ബാധിച്ചു. ഇതോടെ വിവിധ സംസ്ഥാനങ്ങളിലായി ചികിത്സയില്‍ കഴിയുന്നവരുടെ എണ്ണം 17,801 ആയി ഉയര്‍ന്നു.
2,496 പേര്‍ കോവിഡില്‍ നിന്നും രോഗമുക്തി നേടി. കോവിഡ് മൂലം 60 മരണമാണ് ഇന്നലെ രാജ്യത്ത് സംഭവിച്ചത്. ഇതുവരെ 5.23 ലക്ഷം പേര്‍ക്ക് മഹാമാരി ബാധിച്ച് ജിവന്‍ നഷ്ടമായതായി കേന്ദ്ര ആരോഗ്യമന്ത്രാലയം അറിയിച്ചു.
രാജ്യത്തെ ടെസ്റ്റ് പോസിറ്റീവിറ്റി നിരക്കും (ടിപിആര്‍) ഉയര്‍ന്നു. 0.71 ശതമാനമാണ് രോഗ വ്യാപന നിരക്ക്. ഇന്നലെ ടിപിആര്‍ 0.66 ശതമാനം മാത്രമായിരുന്നു. രോഗവ്യാപനം കൂടിയതോടെ പരിശോധനകളുടെ എണ്ണവും വര്‍ധിപ്പിച്ചു.
ഡല്‍ഹിയിലാണ് കേസുകള്‍ ഉയരുന്നത്. ചികിത്സയിലുള്ളവരുടെ എണ്ണം 5,000 കടന്നു. കേരള (2,770), ഹരിയാന (2,238), കര്‍ണാടക (1,751), ഉത്തര്‍ പ്രദേശ് (1,394) എന്നിവയാണ് രോഗബാധിതര്‍ കൂടുതലുള്ള മറ്റ് സംസ്ഥാനങ്ങള്‍.
Also Read: Russia-Ukraine War News: യുഎന്‍ ജനറല്‍ സെക്രട്ടറിയുടെ സന്ദര്‍ശനത്തിനിടെ കീവില്‍ മിസൈല്‍ ആക്രമണം
