രാജ്യത്ത് 31,382 പുതിയ കോവിഡ് കേസുകള്‍, 318 മരണം; മൂന്ന് ലക്ഷം പേര്‍ ചികിത്സയില്‍

ന്യൂഡല്‍ഹി: രാജ്യത്ത് 31,382 പേര്‍ക്കു കൂടി കോവിഡ് സ്ഥിരീകരിച്ചു. 32,542 പേർ രോഗമുക്തരായി. രോഗം ഭേദമായവരുടെ ആകെ എണ്ണം 3.28 കോടിയായി. രോഗമുക്തി നിരക്ക് 97.78 ശതമാനമായി ഉയര്‍ന്നു.

വിവിധ സംസ്ഥാനങ്ങളിലായി മൂന്ന് ലക്ഷം പേരാണ് ചികിത്സയില്‍ കഴിയുന്നത്. ഇതില്‍ 50 ശതമാനത്തിലധികവും രോഗവ്യാപനം ശമിക്കാതെ തുടരുന്ന കേരളത്തിലാണ്. സംസ്ഥാനത്ത് ഇന്നലെയും പുതിയ കേസുകള്‍ ഇരുപതിനായിരത്തിന് അടുത്താണ്.

രാജ്യത്ത് പുതുതായി 318 മരണവും കോവിഡ് മൂലം സംഭവിച്ചു. മൊത്തം മരണ സംഖ്യ 4.46 ലക്ഷമായി വര്‍ധിച്ചു. ഇന്നലെ കൂടുതല്‍ മരണങ്ങള്‍ റിപ്പോര്‍ട്ട് ചെയ്തിരിക്കുന്നതും കേരളത്തിലാണ്, 152 പേര്‍.

അതേസമയം, സംസ്ഥാനങ്ങള്‍ക്കും കേന്ദ്ര ഭരണ പ്രദേശങ്ങള്‍ക്കുമായി 72.20 ലക്ഷം വാക്സിന്‍ ഡോസുകള്‍ കൂടി വിതരണം ചെയ്തതായി കേന്ദ്ര ആരോഗ്യ മന്ത്രാലയം അറിയിച്ചു. 84.15 കോടി ആളുകള്‍ ഒരു ഡോസ് വാക്സിനെങ്കിലും ഇതിനോടകം സ്വീകരിച്ചതായും മന്ത്രാലയം വ്യക്തമാക്കി.

Also Read: വാക്സിന്‍ ഇടവേളയില്‍ ഇളവ്; കേന്ദ്രത്തിന്റെ അപ്പീല്‍ ഹൈക്കോടതി ഇന്ന് പരിഗണിക്കും