ഇന്ത്യ-പാക് സംഘർഷങ്ങൾക്ക് മധ്യസ്ഥത വഹിച്ചു; അവകാശവാദവുമായി ചൈനീസ് വിദേശകാര്യ മന്ത്രി

ബീജിംഗ്: ഇന്ത്യ- പാക്കിസ്ഥാൻ സംഘർഷങ്ങൾ പരിഹരിക്കുന്നതിൽ ചൈന മധ്യസ്ഥത വഹിച്ചെന്ന അവകാശവാദവുമായി ചൈനീസ് വിദേശകാര്യ മന്ത്രി വാങ് യി. ബീജിംഗിൽ രാജ്യാന്തര സാഹചര്യങ്ങളെക്കുറിച്ചും ചൈനയുടെ വിദേശ ബന്ധങ്ങളെ കുറിച്ചും നടന്ന സിമ്പോസിയത്തിൽ സംസാരിക്കവേയാണ് വിദേശകാര്യ മന്ത്രിയുടെ വാദം.

ഇന്ത്യ-പാക് സംഘർഷങ്ങൾ ഉൾപ്പെടെ ലോകത്തിന്റെ വിവിധ ഭാഗങ്ങളിലുണ്ടായ പ്രശ്നങ്ങളിൽ ചൈന ക്രിയാത്മകമായി ഇടപെട്ടുവെന്നാണ് വാങ് യി അവകാശപ്പെട്ടത്. മ്യാൻമർ, ഇറാൻ ആണവ കരാർ, പലസ്തീൻ-ഇസ്രയേൽ, കംബോഡിയ-തായ്‌ലൻഡ് അതിർത്തി തർക്കം തുടങ്ങിയ വിഷയങ്ങളിലും ചൈന മധ്യസ്ഥത വഹിച്ചതായി അദ്ദേഹം കൂട്ടിച്ചേർത്തു.

Also Read: 200 കിലോ കഞ്ചാവ് എലി തിന്നെന്ന് പൊലീസ്; മയക്കുമരുന്ന് കേസിലെ പ്രതിയെ വെറുതെ വിട്ട് കോടതി

ഇന്ത്യയും പാക്കിസ്ഥാനും തമ്മിലുള്ള വിഷയങ്ങളിൽ മൂന്നാം കക്ഷിയുടെ ഇടപെടൽ ആവശ്യമില്ലെന്ന ഇന്ത്യയുടെ നിലപാടിന് വിരുദ്ധമാണ് ചൈനയുടെ പ്രസ്താവന. ഈ വർഷം മെയ് മാസത്തിൽ ഇന്ത്യയും പാകിസ്ഥാനും തമ്മിലുണ്ടായ അതിർത്തി സംഘർഷം ഇരു രാജ്യങ്ങളിലെയും സൈനിക ഉദ്യോഗസ്ഥർ നേരിട്ട് നടത്തിയ ചർച്ചകളിലൂടെയാണ് പരിഹരിച്ചതെന്നാണ് ഇന്ത്യ ഔദ്യോഗികമായി വ്യക്തമാക്കിയിട്ടുള്ളതാണ്. മെയ് 10-ന് നടന്ന ഫോൺ സംഭാഷണത്തിലൂടെയാണ് വെടിനിർത്തൽ ധാരണയിലെത്തിയതെന്ന് വിദേശകാര്യ മന്ത്രാലയം നേരത്തെ പ്രഖ്യാപിച്ചിരുന്നു.

Also Read: ഉത്തർപ്രദേശിൽ എസ്ഐആർ കരട് വോട്ടർ പട്ടിക പ്രസിദ്ധീകരിക്കുന്നത് മൂന്നാം തവണയും നീട്ടി

അതേസമയം, ഇന്ത്യ-ചൈന ബന്ധത്തിൽ ഗുണപരമായ മാറ്റങ്ങൾ ഉണ്ടാകുന്നുണ്ടെന്നും വാങ് യി സൂചിപ്പിച്ചു. ഓഗസ്റ്റിൽ നടന്ന ഷാങ്ഹായ് കോപ്പറേഷൻ ഓർഗനൈസേഷൻ ഉച്ചകോടിയിലേക്ക് പ്രധാനമന്ത്രി നരേന്ദ്ര മോദിയെ ക്ഷണിച്ചതും ഇരു രാജ്യങ്ങളും തമ്മിലുള്ള സൗഹൃദത്തിന്റെ സൂചനയാണെന്ന് അദ്ദേഹം പറഞ്ഞു.

Also Read: പുടിന്റെ വസതിക്ക് നേരെ ഡ്രോൺ ആക്രമണം: ആശങ്ക രേഖപ്പെടുത്തി പ്രധാനമന്ത്രി മോദി; നയതന്ത്ര ചർച്ചകൾക്ക് ആഹ്വാനം

പാക്കിസ്ഥാന് വൻതോതിൽ ആയുധങ്ങൾ നൽകുന്ന ചൈനയുടെ നടപടിയെ നേരത്തെ വിമർശിച്ചിട്ടുള്ള രാജ്യമാണ് ഇന്ത്യ. സംഘർഷ സമയത്ത് പാക്കിസ്ഥാന് ചൈന നൽകിയ സൈനിക സഹായം ഇന്ത്യ-ചൈന നയതന്ത്ര ബന്ധത്തിൽ വിള്ളലുകൾ വീഴ്ത്തുകയും ചെയ്തിരുന്നു. ഈ പശ്ചാത്തലത്തിലാണ് മധ്യസ്ഥത അവകാശപ്പെട്ടുകൊണ്ടുള്ള ചൈനയുടെ പുതിയ നീക്കം ശ്രദ്ധേയമാകുന്നത്.

Read More: വിഘടനവാദികൾക്ക് ആയുധമെത്തിച്ചു: യെമനിൽ ബോംബാക്രമണം നടത്തി സൗദി അറേബ്യ