ന്യൂഡല്‍ഹി: ഉത്തര്‍പ്രദേശിലെ ഹത്രാസില്‍ ദലിത് പെണ്‍കുട്ടി കൂട്ട ബലാത്സംഗത്തിന് ഇരയായി കൊല്ലപ്പെട്ട കേസില്‍ ഒരാള്‍ കുറ്റക്കാരനെന്ന് ഹത്രാസ് സ്പെഷ്യല്‍ കോടതി. കേസിലെ മറ്റ് മൂന്ന് പേരെ കോടതി കുറ്റവിമുക്തരാക്കി. ഐപിസി സെക്ഷന്‍ 304 പ്രകാരം എസ്സി/എസ്ടി നിയമത്തിലെ വകുപ്പുകള്‍ പ്രകാരമാണ് കേസിലെ മുഖ്യപ്രതി സന്ദീപ് സിങ് കുറ്റക്കാരനാണെന്ന് കോടതി കണ്ടെത്തിയത്.
കേസില്‍ പ്രതികളായിരുന്ന രവി, ലവ് കുഷ്, രാമു എന്നിവരെ കോടതി വെറുതെ വിട്ടതായി അഭിഭാഷകന്‍ മുന്ന സിങ് ദി ഇന്ത്യന്‍ എക്‌സ്പ്രസിനോട് പറഞ്ഞു. അതേസമയം, വിധിക്കെതിരെ ഹൈക്കോടതിയില്‍ അപ്പീല്‍ നല്‍കാന്‍ ശ്രമിക്കുമെന്ന് ഇരയുടെ കുടുംബത്തിന് വേണ്ടി ഹാജരായ അഭിഭാഷക സീമ കുശ്വാഹ പറഞ്ഞു.
വിധിയുടെ വിശദാംശങ്ങള്‍ പുറത്തുവന്നതിന് പിന്നാലെ മുഖ്യപ്രതി സന്ദീപിന്റെ കുടുംബാംഗങ്ങള്‍ കോടതിമുറിക്ക് പുറത്ത് പൊട്ടിത്തെറിച്ചു. ”ഞാന്‍ ഈ വിധിയെ സ്വാഗതം ചെയ്യുന്നു, എന്നാല്‍ എന്തുകൊണ്ടാണ് സന്ദീപ് മാത്രം ശിക്ഷിക്കപ്പെട്ടത്? ഈ വിചാരണ മുഴുവന്‍ രാഷ്ട്രീയക്കാരും മാധ്യമ പ്രവര്‍ത്തകരും ചേര്‍ന്ന് തകര്‍ത്തു.” സന്ദീപിന്റെ അമ്മാവന്‍ രാജേന്ദര്‍ സിങ് ആരോപിച്ചു. വിധിയെ സ്വാഗതം ചെയ്യുന്നതായി ലവ് കുഷിന്റെ അമ്മ മുന്നി പറഞ്ഞു. ജുഡീഷ്യറിയില്‍ എനിക്ക് പൂര്‍ണ വിശ്വാസമുണ്ടായിരുന്നു. എന്റെ മകന്‍ മടങ്ങിവരണമെന്ന് ഞാന്‍ ആഗ്രഹിക്കുന്നു. അവന്റെ ഭാവിയെക്കുറിച്ച് എനിക്ക് ഇപ്പോള്‍ ആശങ്കയുണ്ടെന്നും അവര്‍ പറഞ്ഞു.
2020 സെപ്റ്റംബര്‍ 14നാണ് രാജ്യത്തെ നടുക്കിയ സംഭവം നടന്നത്. പത്തൊന്‍പതുകാരിയായ പെണ്‍കുട്ടിയെ കൂട്ട ബലാത്സംഗം ചെയ്തതിന് ശേഷം, വയലില്‍ ഉപേക്ഷിക്കുകയായിരുന്നു. ഗുരുതരമായി പരുക്കേറ്റ പെണ്‍കുട്ടി പിന്നീട് ആശുപത്രിയില്‍ ചികിത്സയിലിരിക്കെ മരിച്ചു. പെണ്‍കുട്ടിയുടെ മൃതദേഹം അര്‍ധരാത്രിയില്‍ സംസ്‌കരിച്ചത് അടക്കം യുപി പൊലീസിന്റെ സമീപനങ്ങള്‍ക്ക് എതിരെ രൂക്ഷ പ്രതിഷേധം ഉയര്‍ന്നിരുന്നു.
Follow the Assembly Election Results 2023 Live today as they unfold
How will the results pan out in the 3 Northeast states? Track live here
Will the BJP cross the half-way mark in Tripura? Get real-time updates
With no alliance, who will form govt in Meghalaya? Live Updates here
Is NDPP set for a second term in Nagaland? Find out here
