ഹനുമാൻ സൂപ്പർമാനേക്കാൾ ശക്തൻ, അർജുനൻ അയൺമാനേക്കാൾ മികച്ചവൻ: സയൻസ് കോൺക്ലേവിൽ ചന്ദ്രബാബു നായിഡു

ഹൈദരബാദ്: ഇന്ത്യൻ ഇതിഹാസങ്ങൾ ഹോളിവുഡ് സൂപ്പർഹീറോകളേക്കാൾ എത്രയോ വലുതാണെന്നും യുവാക്കൾ രാമനെക്കുറിച്ചും കൃഷ്ണനെക്കുറിച്ചും രാമരാജ്യത്തെക്കുറിച്ചും പഠിക്കണമെന്നും ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു വെള്ളിയാഴ്ച പറഞ്ഞു.

തിരുപ്പതിയിലെ നാഷണൽ സംസ്‌കൃത സർവകലാശാലയിൽ നടന്ന ഭാരതീയ വിജ്ഞാന സമ്മേളനത്തിന്റെ ഉദ്ഘാടന സമ്മേളനത്തിൽ സംസാരിക്കുകയായിരുന്നു അദ്ദേഹം. 'ഹനുമാൻ സ്വാമിയുടെ കരുത്ത് സൂപ്പർമാനേക്കാൾ എത്രയോ മുകളിലാണ്. അർജുനൻ അയൺമാനേക്കാളും ബാറ്റ്മാനേക്കാളും മികച്ച പോരാളിയായിരുന്നു,' നായിഡു പറഞ്ഞു.

Also Read:റായ്‌പൂരിലെ മാളിൽ അതിക്രമം; ക്രിസ്മസ് അലങ്കാരങ്ങൾ തകർത്തു

വിവരസാങ്കേതിക വിദ്യയെക്കുറിച്ചും ആർട്ടിഫിഷ്യൽ ഇന്റലിജൻസിനെക്കുറിച്ചും ക്വാണ്ടം ടെക്‌നോളജിയെക്കുറിച്ചും സംസാരിക്കാറുള്ള നായിഡു, കുട്ടികൾക്കും യുവാക്കൾക്കും ഇടയിൽ പാശ്ചാത്യ സൂപ്പർഹീറോ കഥകൾക്ക് പകരം ഇന്ത്യയുടെ പുരാണ പൈതൃകത്തെയും ഇതിഹാസങ്ങളെയും കുറിച്ചുള്ള അറിവ് പകർന്നു നൽകാൻ മാതാപിതാക്കളോടും അധ്യാപകരോടും അഭ്യർത്ഥിച്ചു. സ്‌പൈഡർമാൻ, ബാറ്റ്മാൻ അല്ലെങ്കിൽ സൂപ്പർമാൻ തുടങ്ങിയ സാങ്കൽപ്പിക കഥാപാത്രങ്ങളേക്കാൾ വലിയ മൂല്യങ്ങളും കരുത്തും ആദർശങ്ങളുമാണ് ഇന്ത്യയുടെ പുരാണ നായകന്മാർ പ്രതിനിധീകരിക്കുന്നതെന്ന് അദ്ദേഹം പറഞ്ഞു.

Also Read:തമിഴ്‌നാട്ടിൽ ദേശീയപാതയിൽ അപകടം; ബസും കാറുകളും കൂട്ടിയിടിച്ച് ഒൻപത് മരണം

'ഭഗവാൻ രാമൻ ധർമ്മത്തിന്റെ പരമമായ പ്രതീകമായി നിലകൊള്ളുന്നു, രാമരാജ്യം മാതൃകാപരമായ ഭരണത്തെയാണ് പ്രതിനിധീകരിക്കുന്നത്,' എന്ന് പറഞ്ഞ അദ്ദേഹം, ഹൈന്ദവ ദൈവങ്ങളായ കൃഷ്ണന്റെയും ശിവന്റെയും മഹത്വത്തെക്കുറിച്ചും രാമായണം, മഹാഭാരതം എന്നിവയിൽ നിന്നുള്ള പാഠങ്ങളെക്കുറിച്ചും കുട്ടികളെ പഠിപ്പിക്കണമെന്ന് ആവശ്യപ്പെട്ടു. ഈ ഇതിഹാസങ്ങൾ 'അവതാർ' പോലുള്ള ജനപ്രിയ സിനിമകളേക്കാൾ അഗാധമായ അർത്ഥമുള്ളവയാണെന്നും അദ്ദേഹം കൂട്ടിച്ചേർത്തു.

ബകാസുരൻ, കംസൻ തുടങ്ങിയ കഥാപാത്രങ്ങളുടെ കഥകളിലൂടെ നന്മയും തിന്മയും തമ്മിലുള്ള വ്യത്യാസം കുട്ടികളെ പഠിപ്പിക്കേണ്ടതിന്റെ പ്രാധാന്യം മുഖ്യമന്ത്രി എടുത്തുപറഞ്ഞു. മുൻ മുഖ്യമന്ത്രി എൻ.ടി. രാമറാവു സിനിമകളിലൂടെ പൗരാണിക കഥകളെ ജനകീയമാക്കിയതും രാഷ്ട്രീയത്തിലും സിനിമയിലും അദ്ദേഹം പുലർത്തിയ മൂല്യങ്ങളെയും നായിഡു അനുസ്മരിച്ചു.

നവീകരണത്തിനും സർഗ്ഗാത്മക ചിന്തയ്ക്കും ആഹ്വാനം ചെയ്ത അദ്ദേഹം, ഭാവിയിൽ ഇന്ത്യ ഒരു ആഗോള വൻശക്തിയായി മാറുമെന്ന ആത്മവിശ്വാസവും പ്രകടിപ്പിച്ചു. മുൻ പ്രധാനമന്ത്രി അടൽ ബിഹാരി വാജ്പേയി രാജ്യത്തിന് ശക്തമായ അടിത്തറയിട്ടതിനും പ്രധാനമന്ത്രി നരേന്ദ്ര മോദി ഇന്ത്യയെ പുരോഗതിയിലേക്ക് നയിക്കുന്നതിനും അദ്ദേഹം കടപ്പാട് അറിയിച്ചു.

Also Read:കർണാടകയിൽ ബസ് ട്രക്കിൽ ഇടിച്ച് തീപിടിച്ചു; 10 മരണം

ഭാരതീയ വിജ്ഞാന സമ്മേളനത്തിന്റെ ഏഴാം പതിപ്പാണ് ഡിസംബർ 26 മുതൽ 29 വരെ തിരുപ്പതിയിൽ നടക്കുന്നത്. ഉദ്ഘാടന ചടങ്ങിൽ ആർഎസ്എസ് മേധാവി മോഹൻ ഭാഗവതും ചന്ദ്രബാബു നായിഡുവിനൊപ്പം പങ്കെടുത്തു. രാഷ്ട്രീയത്തിൽ ഇടപെടാതെ തന്റെ അനുഭവപരിചയത്തിലൂടെയും അർപ്പണബോധത്തിലൂടെയും സംഘടനയെ ശക്തിപ്പെടുത്തിയതിന് മോഹൻ ഭാഗവതിനെ നായിഡു പ്രശംസിച്ചു.

Read More:ബിജെപിയുടെ സംഭാവനകളിൽ വ്യക്തികളിൽ നിന്നുള്ളത് 6% താഴെ; കോൺഗ്രസിന് 26 ശതമാനം: റിപ്പോർട്ട് പുറത്ത്