ഗ്യാന്‍വാപി: ശാസ്ത്രീയ സര്‍വേ തടഞ്ഞു, ഹര്‍ജിക്കാര്‍ക്ക് ഹൈക്കോടതിയെ സമീപിക്കാമെന്ന് സുപ്രീം കോടതി

ന്യൂഡല്‍ഹി: വാരാണസിയിലെ ഗ്യാന്‍വാപി പള്ളി പരിസരം ആര്‍ക്കിയോളജിക്കല്‍ സര്‍വേ ഓഫ് ഇന്ത്യ (എഎസ്ഐ) ശാസ്ത്രീയമായി സര്‍വേ നടത്തണമെന്ന ഉത്തരവിനെതിരെ ഹൈക്കോടതിയെ സമീപിക്കാമെന്ന് സുപ്രീം കോടതി. വാരാണസി കോടതിയുടെ ഉത്തരവിനെതിരെ അലഹബാദ് ഹൈക്കോടതിയെ സമീപിക്കാന്‍ ഹര്‍ജിക്കാര്‍ക്ക് സുപ്രീം കോടതി അനുമതി നല്‍കി.

ജൂലായ് 26 ന് വൈകിട്ട് 5 മണി വരെ വിചാരണക്കോടതി ഉത്തരവ് നടപ്പാക്കരുതെന്ന് ചീഫ് ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള ബെഞ്ച് ഉത്തരവിട്ടു. കുറഞ്ഞത് ഒരാഴ്ചയെങ്കിലും മസ്ജിദ് പരിസരത്ത് ഖനനം നടത്തരുതെന്ന സോളിസിറ്റര്‍ ജനറലിന്റെ വാദങ്ങളും സിജെഐ പരിഗണിച്ചു.

'ഞങ്ങള്‍ കോടതി ഉത്തരവ് പാലിക്കും,'' ഗ്യാന്‍വാപി മസ്ജിദ് സമുച്ചയത്തിന്റെ എഎസ്ഐ സര്‍വേയില്‍ എസ്സിയുടെ സ്റ്റേ ഉത്തരവിനോട് പ്രതികരിച്ചുകൊണ്ട് വാരണാസി ഡിഎം പറഞ്ഞു

ഇന്ന് രാവിലെയാണ് എഎസ്‌ഐ സംഘം സര്‍വേ നടത്താനായി പള്ളി പരിസരത്തെത്തിയത്. വെള്ളിയാഴ്ച, വാരണാസി കോടതി സ്ഥലത്ത് എആര്‍ക്കിയോളജിക്കല്‍ സര്‍വേ ഓഫ് ഇന്ത്യ ശാസ്ത്രീയ അന്വേഷണം,സര്‍വേ,ഖനനം എന്നിവ നടത്തുന്നതിന് നിര്‍ദ്ദേശം നല്‍കിയിരുന്നു. ഡിസ്ട്രിക്ട് ആന്‍ഡ് സെഷന്‍സ് ജഡ്ജി അജയ കൃഷ്ണ വിശ്വേശ എഎസ്‌ഐയോട് പ്രശ്‌നത്തിലുള്ള കെട്ടിടത്തിന്റെ മൂന്ന് താഴികക്കുടങ്ങള്‍ക്ക് തൊട്ടുതാഴെയായി ഗ്രൗണ്ട് പെനട്രേറ്റിംഗ് റഡാര്‍ സര്‍വേ നടത്താനും ആവശ്യമെങ്കില്‍ ഖനനം നടത്താനും നിര്‍ദ്ദേശിച്ചിരുന്നു.

പള്ളി പരിസരത്ത് സര്‍വേ നടത്താന്‍ വാരണാസി കോടതി അനുമതി നല്‍കിയിരുന്നു. നേരത്തെ സീല്‍ ചെയ്ത പ്രദേശം ഒഴികെയുള്ള സ്ഥലങ്ങളിലാണ് സര്‍വേക്ക് കോടതി അനുമതി നല്‍കിയത്. കോടതി നിര്‍ദ്ദേശിച്ച വീഡിയോഗ്രാഫി സര്‍വേയില്‍ ‘ശിവലിംഗം’ കണ്ടെത്തിയതായി പറയപ്പെടുന്ന പള്ളി സമുച്ചയത്തിലെ സ്ഥലം സീല്‍ ചെയ്യാന്‍ കോടതി നേരത്തെ ജില്ലാ ഭരണകൂടത്തോട് നിര്‍ദ്ദേശിച്ചിരുന്നു.

യഥാര്‍ത്ഥ കാശി വിശ്വനാഥ ക്ഷേത്രം നിലനിന്നിരുന്ന സ്ഥലത്താണ് മസ്ജിദ് നിര്‍മ്മിച്ചതെന്നാണ് ഹിന്ദു വിഭാഗം വാദിക്കുന്നത്. വഖഫ് വളപ്പിലാണ് പള്ളി പണിതതെന്നും 1947 ഓഗസ്റ്റ് 15ന് മുമ്പ് നിലവിലുണ്ടായിരുന്ന ആരാധനാലയങ്ങളുടെ സ്വഭാവം മാറ്റുന്നത് 1991ലെ ആരാധനാലയങ്ങള്‍ (പ്രത്യേക വ്യവസ്ഥകള്‍) നിയമം വിലക്കിയിട്ടുണ്ടെന്നും മുസ്ലീം വിഭാഗം പറയുന്നു.