2000 ജിബി സ്റ്റോറേജ് വെറും 11 രൂപയ്ക്ക്; 'വെടിക്കെട്ട്' ദീപാവലി ഓഫറുമായി ഗൂഗിൾ

Google One Diwali Offer: ദീപാവലിയോട് അനുബന്ധിച്ച്, ഗൂഗിളിന്റെ ക്ലൗഡ് സ്റ്റോറേജ് സേവനമായ ഗൂഗിൾ വൺ സബ്സ്ക്രിപ്ഷനുകളിൽ വമ്പൻ ഓഫർ പ്രഖ്യാപിച്ച് കമ്പനി. പ്രതിമാസം 11 രൂപ നിരക്കിൽ, 2000 ജിബി (2 ടിബി) വരെ ക്ലൗഡ് സ്റ്റോറേജ് നൽകുന്നതാണ് ഓഫർ. ഈ ഉത്സവ സീസണിൽ, ലൈറ്റ്, ബേസിക്, സ്റ്റാൻഡേർഡ്, പ്രീമിയം തുടങ്ങി എല്ലാ ഗൂഗിൾ വൺ സബ്‌സ്‌ക്രിപ്‌ഷൻ പ്ലാനുകളും 11 രൂപയ്ക്ക് ലഭിക്കും. മൂന്നു മാസത്തേക്കാണ് ഓഫർ കാലാവധി. മൂന്നു മാസത്തിനു ശേഷം, പ്ലാനുകൾക്ക് സാധാരണ നിരക്ക് നൽകേണ്ടിവരും.

ഗൂഗിൾ ഡ്രൈവ്, ജിമെയിൽ, ഗൂഗിൾ ഫോട്ടോസ് തുടങ്ങിയ സേവനങ്ങൾക്കെല്ലാം 30 ജിബി ക്ലൗഡ് സ്റ്റോറേജ് ലഭിക്കുന്ന ഗൂഗിൾ ലൈറ്റ് പ്ലാനിന് സാധാരണയായി പ്രതിമാസം 30 രൂപയാണ് സബ്‌സ്‌ക്രിപ്‌ഷൻ ഫീസ് വരുന്നത്. ഓഫറിൽ ഈ പ്ലാൻ ഇപ്പോൾ, പ്രതിമാസം 11 രൂപ നിരക്കിൽ മൂന്നു മാസം വരെ ലഭിക്കും. 

Also Read: ഫോൺ നഷ്ടപ്പെട്ടാൽ എന്തു ചെയ്യും? നിർദേശവുമായി കേരള പൊലീസ്

100 ജിബി സ്റ്റോറേജ് പ്രതിമാസം 130 രൂപയ്ക്ക് ലഭിക്കുന്ന ബേസിക് പ്ലാൻ, 200 ജിബി സ്റ്റോറേജ് പ്രതിമാസം 210 രൂപയ്ക്ക് ലഭിക്കുന്ന സ്റ്റാൻഡേർഡ് പ്ലാൻ,  2 ടിബി വരെ സ്റ്റോറേജ് പ്രതിമാസം 650 രൂപയ്ക്ക് ലഭിക്കുന്ന ഗൂഗിൾ വൺ പ്രീമിയം പ്ലാൻ തുടങ്ങി എല്ലാ പ്ലാനുകളും 11 രൂപ പ്രതിമാസ നിരക്കിൽ ഉപയോക്താക്കൾക്ക് ലഭ്യമാകും. 

വാർഷിക ഗൂഗിൾ വൺ പ്ലാനുകളിലും ദീപാവലി ഓഫറുണ്ട്. 708 രൂപ സാധാരണ നിരക്കിൽ ലഭ്യമായിരുന്ന ലൈറ്റ് പ്ലാൻ (30 ജിബി) ഇപ്പോൾ 479 രൂപയ്ക്ക് ലഭിക്കും. 1,560 രൂപയുടെ ബേസിക് പ്ലാൻ (100 ജിബി) 1,000 രൂപയ്ക്കും, 2,520 രൂപയുടെ സ്റ്റാൻഡേർഡ് പ്ലാൻ (200 ജിബി) ഇപ്പോൾ 1,600 രൂപയ്ക്കും ലഭിക്കും. വാർഷിക  പ്രീമിയം പ്ലാൻ വാങ്ങുന്നവർക്ക് 2,900 രൂപ വരെ ലാഭിക്കാൻ കഴിയുമെന്ന് ഗൂഗിൾ പറയുന്നു. 7,800 രൂപ സാധാരണ നിരക്കായിരുന്ന പ്രീമിയം പ്ലാൻ ഇപ്പോൾ പ്രതിവർഷം 4,900 രൂപയ്ക്ക് ലഭ്യമാണ്. പ്രതിമാസം പ്ലാനുകളും, വാർഷിക പ്ലാനുകളും ഒക്ടോബർ 31 വരെ ഓഫർ വിലയിൽ സബ്‌സ്‌ക്രൈബ് ചെയ്യാൻ കഴിയും.

Read More: സ്‌മാർട്ഫോണിന്റെ ബാറ്ററി ലൈഫ് കൂട്ടാൻ അഞ്ച് വഴികൾ