scorecardresearch
Latest News
ദക്ഷിണാഫ്രിക്കയ്ക്ക് ആറ് വിക്കറ്റ് നഷ്ടം; കാര്യവട്ടത്ത് കത്തിക്കയറി പേസര്‍മാര്‍

എൻഡിഎ ഭരണകാലത്തെ പ്രതിപക്ഷ നേതാക്കള്‍ക്കെതിരായ സി ബി ഐ കേസുകള്‍: പൂര്‍ണ പട്ടിക

കഴിഞ്ഞ 18 വര്‍ഷത്തിനിടയില്‍, കോണ്‍ഗ്രസ്, ബി ജെ പി സര്‍ക്കാരുകള്‍ക്കിടയില്‍, സി ബി ഐ കേസെടുക്കുകയോ അറസ്റ്റ് ചെയ്യുകയോ റെയ്ഡ് ചെയ്യുകയോ ചോദ്യം ചെയ്യുകയോ ചെയ്ത ഇരുന്നൂറോളം പ്രധാന രാഷ്ട്രീയക്കാരില്‍ 80 ശതാനമെങ്കിലും പ്രതിപക്ഷ പാര്‍ട്ടികളില്‍ നിന്നുള്ളവരാണ്. കോടതി രേഖകള്‍, ഔദ്യോഗിക രേഖകള്‍, സി ബി ഐ സ്റ്റേറ്റ്‌മെന്റുകള്‍ എന്നിവയെ അടിസ്ഥാനമാക്കി ഇന്ത്യന്‍ എക്‌സ്പ്രസ് നടത്തിയ അന്വേഷണങ്ങളുടെ വിവരങ്ങള്‍

എൻഡിഎ ഭരണകാലത്തെ പ്രതിപക്ഷ നേതാക്കള്‍ക്കെതിരായ സി ബി ഐ കേസുകള്‍: പൂര്‍ണ പട്ടിക

എൻഡിഎ സര്‍ക്കാരുകളുടെ കാലത്ത് (2014 മുതൽ ഇതുവരെ) സിബിഐ നിരീക്ഷണത്തിനു പരിധിയില്‍ വന്ന രാഷ്ട്രീയ നേതാക്കളുടെയും അവരുടെ അടുത്ത ബന്ധുക്കളുടെയും പേരുകള്‍ കോടതി രേഖകളില്‍നിന്നും സി ബി ഐ സ്റ്റേറ്റ്‌മെന്റുകളില്‍നിന്നും റിപ്പോര്‍ട്ടുകളില്‍നിന്നും സമാഹരിച്ചതാണ്. ചില കേസുകളിലും പേരുകളിലും ഒന്നിലധികം നേതാക്കളുടെ പേരുകള്‍ ഉള്‍പ്പെടുത്തിയിട്ടുണ്ട്. സി ബി ഐ അവര്‍ക്കെതിരെ നടപടിയെടുക്കുമ്പോള്‍ അവര്‍ ഉള്‍പ്പെട്ടിരുന്ന പാര്‍ട്ടികളുടെ കീഴിലാണു നേതാക്കളെ തരംതിരിച്ചിരിക്കുന്നത്. പൂര്‍ണമായ ലിസ്റ്റ് ഇങ്ങനെ.

കോൺഗ്രസ്

പി ചിദംബംരം, കാർത്തി ചിദംബരം

ഐഎൻഎക്‌സ് മീഡിയ, എയർസെൽ-മാക്‌സിസ് ഇടപാടുകളിലെ നേരിട്ടുള്ള വിദേശ നിക്ഷേപ (എഫ്ഡിഐ) അനുമതികളിൽ മുൻ കേന്ദ്രമന്ത്രി പി ചിദംബരം, മകൻ കാർത്തി ചിദംബരം എന്നിവർക്കെതിരെ സിബിഐയും എൻഫോഴ്‌സ്‌മെന്റ് ഡയറക്ടറേറ്റും (ഇഡി) അന്വേഷണം നടക്കുന്നു. കാർത്തി കൈക്കൂലി വാങ്ങിക്കൊണ്ട് നിയമവിരുദ്ധമായും വഞ്ചനാപരമായും എഫ്ഡിഐ അനുമതികൾ നൽകിയതായി അന്വേഷണ ഏജൻസികൾ ആരോപിക്കുന്നു. എയർസെൽ-മാക്‌സിസ് കേസ്, 2ജി അന്വേഷണത്തിന്റെ ഭാഗമാണ്, 2012 മുതൽ ഇതിൽ അന്വേഷണം നടക്കുന്നുണ്ടെങ്കിലും അന്ന് ചിദംബരം ഈ അന്വേഷണപരിധിയിൽ ഉൾപ്പെട്ടിരിന്നില്ല. ഐഎൻഎക്‌സ് മീഡിയ കേസ് 2018ൽ സിബിഐയും ഇഡിയും രജിസ്റ്റർ ചെയ്തു. ഒരു വർഷത്തിന് ശേഷം ചിദംബരത്തെ ഈ രണ്ട് അന്വേഷണ ഏജൻസികളും അറസ്റ്റ് ചെയ്തു. രണ്ട് കേസുകളിലും ഏജൻസികൾ കുറ്റപത്രം സമർപ്പിച്ചു. വിചാരണ തുടങ്ങിയിട്ടില്ല.

ഡി കെ ശിവകുമാർ

കള്ളപ്പണം വെളുപ്പിക്കൽ ആരോപിച്ച് കോൺഗ്രസ് നേതാവും മുൻ കർണാടക മന്ത്രിയുമായ ഡി കെ ശിവകുമാറിനെതിരെ ഇഡി കേസെടുത്തിട്ട് രണ്ട് വർഷത്തിലേറെയായി, 2020 ഒക്ടോബറിൽ സിബിഐ അദ്ദേഹത്തിനെതിരെ അനധികൃത സ്വത്ത് സമ്പാദനത്തിന് കേസ് രജിസ്റ്റർ ചെയ്തു. നിലവിലെ കർണാടക കോൺഗ്രസ് പ്രസിഡന്റാണ് ശിവകുമാർ. കേസിൽ ശിവകുമാറുമായി ബന്ധമുണ്ടെന്ന് ആരോപിക്കപ്പെടുന്ന സ്ഥലങ്ങൾ ഉൾപ്പെടെ 14 സ്ഥലങ്ങളിലും അന്വേഷണ സംഘം റെയ്ഡ് നടത്തി. അറിയപ്പെടുന്ന വരുമാനത്തിൽ കവിഞ്ഞ് 75 കോടി രൂപയുടെ സ്വത്ത് ശിവകുമാർ സമ്പാദിച്ചതായി അന്വേഷണ ഏജൻസി ആരോപിച്ചു. അന്വേഷണം നടക്കുന്നു, ഇതുവരെ കുറ്റപത്രം സമർപ്പിച്ചിട്ടില്ല.

ഭൂപീന്ദർ ഹൂഡ

ഹരിയാന മുൻ മുഖ്യമന്ത്രിക്കെതിരെ ഒന്നിലധികം കേസുകളാണ് സിബിഐ അന്വേഷിക്കുന്നത്. മനേസറിൽ ബിൽഡർമാർ ഭൂമി തട്ടിയെടുത്തെന്നാരോപിച്ചുള്ള കേസുമായി ബന്ധപ്പെട്ട് 2015 സെപ്തംബറിൽ, ഹൂഡക്കെതിരെ കേസെടുത്തു. 2017 ഏപ്രിലിൽ, ദി നാഷണൽ ഹെറാൾഡ് ദിനപത്രത്തിന്റെ പ്രസാധകനും ഗാന്ധി കുടുംബവുമായി ബന്ധമുള്ളതുമായ അസോസിയേറ്റ് ജേണൽസ് ലിമിറ്റഡിന് (എജെഎൽ) പഞ്ച്കുളയിൽ പ്ലോട്ട് അനുവദിച്ചതിൽ ക്രമക്കേട് ആരോപിച്ച് ഹൂഡയ്ക്കും മറ്റുള്ളവർക്കുമെതിരെ എഫ്ഐആർ രജിസ്റ്റർ ചെയ്തു. 2019 ജനുവരിയിൽ, ഗുഡ്ഗാവിലെ ഭൂമി ഏറ്റെടുക്കലുമായി ബന്ധപ്പെട്ട വിഷയത്തിൽ ഹൂഡയ്‌ക്കെതിരെ അഴിമതിക്ക് കേസ് രജിസ്റ്റർ ചെയ്തതിന് ശേഷം സിബിഐ ഹൂഡയുടെ റോത്തക്കിലെ വസതിയിൽ പരിശോധന നടത്തി. മനേസർ, എജെഎൽ കേസുകളിൽ അന്വേഷണ സംഘം കുറ്റപത്രം സമർപ്പിച്ചിട്ടുണ്ട്.

ഭൂപേഷ് ബാഗേൽ

2018-ൽ, ഛത്തീസ്ഗഢിലെ നിയമസഭാ തിരഞ്ഞെടുപ്പിന് മുമ്പ്, അന്നത്തെ സംസ്ഥാന കോൺഗ്രസ് അധ്യക്ഷൻ ഭൂപേഷ് ബാഗേലിനെ “സെക്‌സ് സിഡി” കേസിൽ സിബിഐ പ്രതിയാക്കി. ഇപ്പോൾ ഛത്തീസ്ഗഢ് മുഖ്യമന്ത്രിയായ ബാഗേൽ, സിഡി പ്രചരിപ്പിച്ചതായി സിബിഐ ആരോപിച്ചിരുന്നു. കേസിൽ ബാഗേലിനെതിരെ സിബിഐ കുറ്റപത്രം സമർപ്പിച്ചു, വിചാരണ നടക്കുന്നു.

അശോക് ഗെലോട്ട്, സച്ചിൻ പൈലറ്റ്, കാർത്തി ചിദംബരം

“രാജസ്ഥാൻ ആംബുലൻസ് അഴിമതി” എന്ന് വിളിക്കപ്പെടുന്ന കേസിൽ മൂന്ന് കോൺഗ്രസ് നേതാക്കളും പ്രതികളാണ്. ഗെലോട്ട് ഇതിന് മുൻപത്തെ ടേമിൽ മുഖ്യമന്ത്രിയായിരുന്നപ്പോൾ രാജസ്ഥാൻ സർക്കാർ ആരംഭിച്ച ആംബുലൻസ് പദ്ധതിയുടെ കരാറിന്റെ ടെൻഡറുകൾ 2010-ൽ പൈലറ്റും കാർത്തി ചിദംബരവും ഡയറക്ടർമാരായിരുന്ന സിക്കിറ്റ്‌സ ഹെൽത്ത്‌കെയറിന് അനുകൂലമായി വഞ്ചനാപരമായ രീതിയിൽ മാറ്റിയെന്ന ആരോപണത്തിന്റെ അടിസ്ഥാനത്തിലാണ് 2015-ൽ കേസ് രജിസ്റ്റർ ചെയ്തത്. , സംസ്ഥാനത്ത് ‘108’ ആംബുലൻസ് സേവനത്തിന്റെ പ്രവർത്തനത്തിനായി പെരുപ്പിച്ച് കാണിച്ച ഇൻവോയ്‌സുകൾ സമർപ്പിച്ചതായാണ് ആരോപണം. 2018ൽ സിബിഐ കുറ്റപത്രം സമർപ്പിച്ചെങ്കിലും മൂന്നുപേരിൽ ആരെയും പ്രതികളാക്കിയില്ല. എന്നാൽ, മുൻ മന്ത്രിയും കേരളത്തിൽ നിന്നുള്ള മുതിർന്ന കോൺഗ്രസ് നേതാവുമായ വയലാർ രവിയുടെ മകൻ രവികൃഷ്ണയെ കുറ്റപത്രത്തിൽ ഉൾപ്പെടുത്തി.

ജയന്തി നടരാജൻ

വ്യവസായങ്ങൾ സ്ഥാപിക്കുന്നതിന് പരിസ്ഥിതി അനുമതി നൽകാൻ കൈക്കൂലി വാങ്ങിയെന്ന കേസിൽ 2017ൽ മുൻ കേന്ദ്ര പരിസ്ഥിതി മന്ത്രി ജയന്തി നടരാജനെതിരെ സിബിഐ കേസെടുത്തു. ഡൽഹിയിലും ചെന്നൈയിലും നടരാജനുമായി ബന്ധമുണ്ടെന്ന് പറയപ്പെടുന്ന സ്ഥലങ്ങളിലും സിബിഐ പരിശോധന നടത്തി. വനം (സംരക്ഷണം) നിയമം ലംഘിച്ചുവെന്നാരോപിച്ച് ജാർഖണ്ഡിലെ സിംഗ്ഭും ജില്ലയിലെ വനഭൂമി ഖനന കമ്പനിയായ ഇലക്‌ട്രോസ്റ്റീലിന് തിരിച്ചുനൽകുന്നതിന് 2012-ൽ അനുമതി നൽകിയതുമായി ബന്ധപ്പെട്ടതാണ് കേസ്. 2015ൽ കോൺഗ്രസ് വിട്ട നടരാജൻ, വേദാന്ത, അദാനി ഗ്രൂപ്പുകളുടെ പദ്ധതികൾ നിർത്തിവയ്ക്കാൻ പാർട്ടി നേതാവ് രാഹുൽ ഗാന്ധി തന്നെ നിർബന്ധിച്ചെന്നും യുപിഎ സർക്കാരിന്റെ സാമ്പത്തിക പ്രശ്‌നങ്ങൾക്കായി തന്നെ “ബലിയാട്” ആക്കിയെന്നും ആരോപിച്ചു. കേസിൽ സിബിഐ ഇതുവരെ കുറ്റപത്രം സമർപ്പിച്ചിട്ടില്ല.

ഉമ്മൻ ചാണ്ടി

കേരളത്തിൽ സോളാർ പാനൽ അഴിമതിയുമായി ബന്ധപ്പെട്ട് പരാതിക്കാരിയായ സ്ത്രീയെ ലൈംഗികമായി പീഡിപ്പിച്ചെന്ന കേസിൽ മുൻ കേരള മുഖ്യമന്ത്രിയെയും മറ്റ് നിരവധി കോൺഗ്രസ് നേതാക്കൾക്കെതിരെയും സിബിഐ 2021 ഓഗസ്റ്റിൽ കേസെടുത്തു. എഐസിസി ജനറൽ സെക്രട്ടറി കെ സി വേണുഗോപാൽ, കോൺഗ്രസ് നിയമസഭാംഗം എപി അനിൽകുമാർ, കോൺഗ്രസ് എംപിമാരായ ഹൈബി ഈഡൻ, അടൂർ പ്രകാശ്, ബിജെപി ദേശീയ വൈസ് പ്രസിഡന്റ് എപി അബ്ദുള്ളക്കുട്ടി എന്നിവരാണ് മറ്റ് പ്രതികൾ.

സംസ്ഥാനത്തെ ക്രൈംബ്രാഞ്ചാണ് കേസ് ആദ്യം അന്വേഷിച്ചത്. കോൺഗ്രസ് നേതൃത്വത്തിലുള്ള യുഡിഎഫ് അധികാരത്തിലിരുന്നപ്പോൾ സോളാർ പാനൽ സംരംഭത്തിൽ തട്ടിപ്പ് നടത്തിയെന്ന പരാതിയുമായി ബന്ധപ്പെട്ട സോളാർ പാനൽ അഴിമതിക്കേസിലെ പ്രതിയാണ് പരാതിക്കാരി. ലൈംഗികാതിക്രമക്കേ സിൽ ഇതുവരെ കുറ്റപത്രം സമർപ്പിച്ചിട്ടില്ല.

വിനയ് കുൽക്കർണി, ഹനുമന്ത് കൊറാവർ

ബി.ജെ.പി നേതാവ് യോഗീഷ്ഗൗഡ ഗൗഡറിനെ കൊലപ്പെടുത്തിയ കേസിന്റെ അന്വേഷണവുമായി ബന്ധപ്പെട്ട് 2020 നവംബറിൽ കോൺഗ്രസ് നേതാവും കർണാടക മുൻ മന്ത്രിയുമായ വിനയ് കുൽക്കർണിയെ സിബിഐ അറസ്റ്റ് ചെയ്തു. കേസിൽ കർണാടകയിലെ കോൺഗ്രസ് നേതാവ് ഹനുമന്ത് കൊറാവാറിനെയും വിനയ്‌യുടെ ഇളയ സഹോദരൻ വിജയ് കുൽക്കർണിയെയും നേരത്തെ ചോദ്യം ചെയ്തിരുന്നു. 2016 ജൂണിൽ ധാർവാഡിലെ ജിംനേഷ്യത്തിൽ വെച്ച് ബിജെപി നേതാവും ജില്ലാ പഞ്ചായത്ത് അംഗവുമായിരുന്ന ഗൗഡർ വെട്ടേറ്റു മരിച്ചു. കേസ് സിബിഐക്ക് വിടാൻ അന്നത്തെ കോൺഗ്രസ് സർക്കാർ വിസമ്മതിച്ചു, എന്നാൽ ബിജെപി സർക്കാർ അധികാരത്തിൽ വന്നതിന് ശേഷം കേന്ദ്ര ഏജൻസിക്ക് കേസ് കൈമാറുകയായിരുന്നു. 2021 ജനുവരിയിൽ വിനയ് കുൽക്കർണിക്കെതിരെ സിബിഐ കുറ്റപത്രം സമർപ്പിച്ചു. കേസ് വിചാരണയ്ക്ക് വിട്ടു.

ഹിമന്ത ബിശ്വ ശർമ്മ

ഇപ്പോൾ അസം മുഖ്യമന്ത്രിയായ ഹിമന്ത ബിശ്വ ശർമ്മക്കെതിരെ ശാരദ ചിട്ടി തട്ടിപ്പ് കേസിൽ 2014ലും 2015ലും സിബിഐയുടെയും ഇഡിയുടെയും അന്വേഷണം നടത്തിയിരുന്നു. 2014ൽ ഹിമന്തയുടെ വീട്ടിലും ഓഫീസിലും സിബിഐ റെയ്ഡ് നടത്തുകയും ചോദ്യം ചെയ്യുകയും ചെയ്തിരുന്നു. 2016ലെ ശാരദ കേസിലെ പ്രധാന പ്രതിയായ സുദീപ്ത സെൻ ശർമ്മയുമായി ഇയാൾക്ക് സാമ്പത്തിക ഇടപാടുകൾ ഉണ്ടായിരുന്നുവെന്ന് ആരോപിക്കപ്പെടുന്നു. അസം തിരഞ്ഞെടുപ്പിന് തൊട്ടുമുമ്പ് ഹിമന്ത ബിശ്വ ശർമ്മ ബി ജെ പിയിൽ ചേർന്നു. കേസിൽ കാര്യമായ പുരോഗതിയുണ്ടായില്ല. ലൂയിസ് ബെർഗർ കേസിലും അദ്ദേഹത്തിന്റെ പേര് ഉയർന്നുവന്നിരുന്നു, എന്നാൽ ആ കേസിലും അദ്ദേഹത്തിനെതിരായ അന്വേഷണത്തിൽ പുരോഗതി ഉണ്ടായിട്ടില്ല. ഇതുവരെ അന്വേഷണ ഏജൻസികൾ കുറ്റപത്രം സമർപ്പിച്ചിട്ടില്ല.

നബാം തുകി

സർക്കാർ പദ്ധതിക്കായി 2003-ൽ 3.20 കോടി രൂപയുടെ കരാർ നൽകിയതിൽ ക്രമക്കേട് ആരോപിച്ച് 2019 ജൂലൈയിൽ, മുൻ അരുണാചൽ പ്രദേശ് മുഖ്യമന്ത്രിക്കെതിരെ സിബിഐ കേസെടുത്തു. അന്നത്തെ സംസ്ഥാന ഉപഭോക്തൃ കാര്യ, സിവിൽ സപ്ലൈസ് മന്ത്രി തുകി അദ്ദേഹവുമായി ഒത്തുകളിച്ചുവെന്നും ആരോപിച്ചു. യഥാക്രമം 61.43 ലക്ഷം രൂപയും 2.60 കോടി രൂപയും വിലമതിക്കുന്ന രണ്ട് പാർക്കിങ് ലൊക്കേഷനുകൾ വികസിപ്പിക്കുന്നതിന് നൽകിയ കരാറിന് ലഭിച്ച പണം സഹോദരൻ നബാം ടാഗം വകമാറ്റിയെടുത്തു എന്നാണ് ആരോപണം. 2011-16 കാലത്ത് അരുണാചൽ പ്രദേശ് മുഖ്യമന്ത്രിയായിരുന്നു തുകി. അന്വേഷണം തുടരുന്നു.

ഒക്രം ഇബോബി സിങ്

അഴിമതി ആരോപണവുമായി ബന്ധപ്പെട്ട് 2019 നവംബറിൽ മുതിർന്ന കോൺഗ്രസ് നേതാവും മണിപ്പൂർ മുൻ മുഖ്യമന്ത്രിയുയായ ഒക്രം ഇബോബി സിങ്ങിന്റെ വസതിയിൽ സിബിഐ റെയ്ഡ് നടത്തി. അദ്ദേഹത്തെയും സംസ്ഥാനത്തെ മൂന്ന് മുൻ ചീഫ് സെക്രട്ടറിമാരെയും കേസിൽ പ്രതിചേർത്തിട്ടുണ്ട്. ഇബോബി സിംഗ് ചെയർമാനായിരുന്ന മണിപ്പൂർ ഡെവലപ്‌മെന്റ് സൊസൈറ്റിയിൽ (എംഡിഎസ്) 332 കോടി രൂപയുടെ സംസ്ഥാന ഫണ്ട് ദുരുപയോഗം ചെയ്തുവെന്നാണ് കേസ്. അന്വേഷണം തുടരുന്നു.

വീർഭദ്ര സിങ്, പ്രതിഭ സിങ്

യുപിഎ സർക്കാരിൽ വീർഭദ്ര സിങ് കേന്ദ്ര മന്ത്രിയായിരുന്ന കാലത്ത് 10 കോടി രൂപയുടെ അനധികൃത സ്വത്ത് സമ്പാദിച്ചെന്നാരോപിച്ച് 2015 സെപ്തംബറിൽ വീർദമ്പതികൾക്കെതിരെ സിബിഐ കേസെടുത്തു. 2015ൽ മുഖ്യമന്ത്രിയായിരിക്കെ മകളുടെ വിവാഹം നടക്കാനിരിക്കെയാണ് അദ്ദേഹത്തിന്റെ വസതിയിൽ സിബിഐ റെയ്ഡ് നടത്തിയത്. ഇദ്ദേഹത്തെ ഒന്നിലധികം തവണ ചോദ്യം ചെയ്യുകയും കേസിൽ കുറ്റപത്രം സമർപ്പിക്കുകയും ചെയ്തു. കേസിൽ അദ്ദേഹത്തിന്റെ ഭാര്യയെയും പ്രതിയാക്കി. 2021 ജൂലൈയിൽ വീർഭദ്ര സിങ് മരിച്ചു. വിചാരണ നടക്കുന്നു.

ഹരീഷ് റാവത്ത്

വിമത കോൺഗ്രസ് എം‌എൽ‌എമാരുടെ പിന്തുണ ഉറപ്പാക്കാൻ കൈക്കൂലി കൊടുക്കാൻ ചർച്ച ചെയ്യുകയും കൈമാറ്റം ചെയ്യുകയും ചെയ്തുവെന്ന് ആരോപിച്ച് മുൻ ഉത്തരാഖണ്ഡ് മുഖ്യമന്ത്രി ഹരീഷ് റാവത്തിനും മുൻ ക്യാബിനറ്റ് മന്ത്രി ഹരക് സിങ് റാവത്തിനും സമാചാർ പ്ലസ് ന്യൂസ് ചാനൽ സിഇഒ ഉമേഷ് കുമാറിനുമെതിരെ 2019 ഒക്ടോബറിൽ സിബിഐ കേസെടുത്തു. 2016-ലെ നടത്തിയ സ്റ്റിങ് വീഡിയോയെ തുടർന്നാണ് എഫ്‌ഐആർ എടുത്തത്. കേസിൽ അന്വേഷണം നടക്കുന്നു. , കുറ്റപത്രം സമർപ്പിച്ചിട്ടില്ല.

ശങ്കർസിങ് വഗേല

മുൻ ഗുജറാത്ത് മുഖ്യമന്ത്രിയും കോൺഗ്രസ് നേതാവുമായ ശങ്കർസിങ് വഗേല കേന്ദ്ര ടെക്സ്റ്റൈൽ മന്ത്രിയായിരിക്കെ നാഷണൽ ടെക്സ്റ്റൈൽ കോർപ്പറേഷന്റെ (എൻടിസി) മുംബൈയിലെ കണ്ണായ ഭൂമി നിസ്സാരവിലയ്ക്ക് വിറ്റതിലൂടെ ഖജനാവിന് 709 കോടി രൂപ നഷ്ടം വരുത്തിയെന്ന കേസിൽ സിബിഐയുടെയും ഇഡിയുടെയും അന്വേഷണം നേരിടുകയാണ്. 2015ൽ സിബിഐ കേസെടുത്തു, 2016 ഓഗസ്റ്റിൽ ഇഡി കേസെടുത്തു. അന്വേഷണം തുടരുന്നു.

ആർ റോഷൻ ബെയ്ഗ്

ഐഎംഎ പോൺസി സ്കീം (നിക്ഷേപത്തട്ടിപ്പ്) സംബന്ധിച്ച് 2019 ഓഗസ്റ്റിൽ രജിസ്റ്റർ ചെയ്ത കേസിൽ കർണാടക മുൻ മന്ത്രിയായ ആർ റോഷൻ ബെയ്ഗിനെ 2020 നവംബറിൽ സിബിഐ അറസ്റ്റ് ചെയ്തു. കേസ് രജിസ്റ്റർ ചെയ്യുന്ന സമയത്ത്, ലോക്‌സഭാ തിരഞ്ഞെടുപ്പിലെ തോൽവിയെച്ചൊല്ലി സംസ്ഥാന നേതൃത്വത്തെ വിമർശിച്ചതിന് ബെയ്ഗിനെ കോൺഗ്രസിൽ നിന്ന് സസ്‌പെൻഡ് ചെയ്തിരുന്നു. വോട്ടെടുപ്പ് തോൽവി. ബെംഗളൂരുവിലെ ശിവാജിനഗറിൽ നിന്ന് ഏഴ് തവണ എംഎൽഎയായ അദ്ദേഹം തിരഞ്ഞെടുപ്പ് ചെലവുകൾക്കായി ഐഎംഎ ഫണ്ടിൽ നിന്ന് കോടിക്കണക്കിന് രൂപ കൈപ്പറ്റിയതായി സിബിഐ ആരോപിച്ചു. 2021-ൽ കേസിൽ സി ബി ഐ അദ്ദേഹത്തെ കുറ്റപത്രം സമർപ്പിച്ചു. 2019-ൽ ബി ജെ പിയിലേക്ക് കൂറ് മാറിയ 16 കോൺഗ്രസ്, ജെ.ഡി (എസ്) എം.എൽ.എമാരിൽ ബെയ്ഗും ഉൾപ്പെടുന്നു. അധികാരത്തിലെത്തിയ ഉടൻ തന്നെ ബി ജെ പി, ഐ എം എ അഴിമതി സിബിഐക്ക് കൈമാറി.

രഘുരാജ് സിങ് കൻസാന

ബാങ്ക് തട്ടിപ്പ് കേസുമായി ബന്ധപ്പെട്ട് മധ്യപ്രദേശ് കോൺഗ്രസ് എംഎൽഎയായ രഘുരാജ് സിങ് കൻസാനയുടെ മൊറേനയിലെ വീട്ടിൽ സിബിഐ റെയ്ഡ് നടത്തി. വ്യാജരേഖകൾ ചമച്ച് യൂക്കോ ബാങ്കിൽ നിന്ന് വായ്പയെടുത്ത് ബാങ്കിന് 8.08 കോടി രൂപ നഷ്ടമുണ്ടാക്കിയതിന് എംഎൽഎയുടെ അനന്തരവൻ കുശാൽ സിങ്ങിനെതിരെ കേസെടുത്തു. അന്വേഷണം നടക്കുന്നു,

അംപരീൻ ലിങ്ദോ

മേഘാലയയിലെ 2008-09 ലെ അധ്യാപക നിയമനത്തിൽ സ്കോർ ഷീറ്റിൽ കൃത്രിമം കാണിച്ചെന്ന കേസിൽ അന്ന് വിദ്യാഭ്യാസ മന്ത്രിയായിരുന്ന അംപരീൻ ലിങ്ദോയ്ക്കെതിരെ 2018 ജനുവരിയിൽ സിബിഐ കേസെടുത്തു. കേസെടുക്കുമ്പോൾ മേഘാലയ പൊതുമരാമത്ത് മന്ത്രിയായിരുന്നു. മേഘാലയ ഹൈക്കോടതിയുടെ ഉത്തരവിനെ തുടർന്നാണ് കേസെടുത്തത്. 2020 ജൂണിൽ, ഈ കേസിൽ അന്വേഷണ ഏജൻസി ലിങ്ദോയ്ക്കെതിരെ കുറ്റപത്രം സമർപ്പിച്ചു. 2022 ഫെബ്രുവരി 14-ന് ബിജെപി-സഖ്യകക്ഷിയായ എൻപിപി സംസ്ഥാന സർക്കാരിനെ പിന്തുണച്ചതിന് ലിങ്ദോയെയും മറ്റ് നാല് കോൺഗ്രസ് എംഎൽഎമാരെയും കോൺഗ്രസിൽ നിന്നും സസ്‌പെൻഡ് ചെയ്തു.

റോബർട്ട് വാദ്ര

കോൺഗ്രസ് അധ്യക്ഷ സോണിയാ ഗാന്ധിയുടെ മരുമകൻ റോബർട്ട് വാദ്ര രണ്ട് കേസുകളിലെങ്കിലും സിബിഐ നിരീക്ഷണത്തിലാണ്. റോബർട്ട് വാദ്രയുമായി ബന്ധമുള്ള കമ്പനികൾ ഉൾപ്പെടെ ബിക്കാനീറിലെ ഭൂമി ഇടപാടുകളിൽ ക്രമക്കേടുകൾ ആരോപിച്ച് രാജസ്ഥാൻ പൊലീസ് രജിസ്റ്റർ ചെയ്ത 18 എഫ്‌ഐആറുകൾ 2017 ഓഗസ്റ്റിൽ സിബിഐ ഏറ്റെടുത്തു. ആയുധ ഇടപാടുകാരൻ സഞ്ജയ് ഭണ്ഡാരി പ്രതിയായ 2020 ജൂണിൽ രജിസ്റ്റർ ചെയ്ത എഫ്‌ഐആറുമായി ബന്ധപ്പെട്ടതാണ് മറ്റൊരു കേസ്. രണ്ട് കേസുകളും അന്വേഷിക്കുന്ന ഇഡി, വാദ്രയെ ചോദ്യം ചെയ്തു. സിബിഐ വാദ്രയെ ചോദ്യം ചെയ്യുകയോ കുറ്റപത്രം സമർപ്പിക്കുകയോ ചെയ്തിട്ടില്ല.

ഗുർപാൽ സിങ്

സിംഭോലി ഷുഗേഴ്‌സിന്റെ 98 കോടി രൂപയുടെ വായ്പാ തട്ടിപ്പ് കേസിലാണ് അന്വേഷണത്തിലെ ഭാഗമായാണ് 2018 മാർച്ചിൽ, അന്നത്തെ പഞ്ചാബ് മുഖ്യമന്ത്രി ക്യാപ്റ്റൻ അമരീന്ദർ സിങ്ങിന്റെ മരുമകൻ ഗുർപാൽ സിങ്ങിനെ സിബിഐ ചോദ്യം ചെയ്തത്. ഗുർപാൽ സിങ് ആയിരുന്നു സിംഭോലി ഷുഗേഴ്സിലെ ഡെപ്യൂട്ടി ജനറൽ മാനേജർ.

ഓറിയന്റൽ ബാങ്ക് ഓഫ് കൊമേഴ്‌സിൽ വായ്പാ തട്ടിപ്പ് നടത്തിയതിനും മുൻ വായ്പാതുക തിരികെ അടയ്ക്കാൻ 110 കോടി രൂപ വായ്പയെടുത്തതിനും ഗുർപാലിനൊപ്പം മറ്റ് 12 പേർക്കെതിരെയും സിബിഐ കേസെടുത്തു. രാജ്യത്തെ ഏറ്റവും വലിയ പഞ്ചസാര മില്ലുകളിൽ ഒന്നാണ് സിംഭോലി ഷുഗേഴ്സ് ലിമിറ്റഡ്. അന്വേഷണം നടക്കുന്നു, കുറ്റപത്രം സമർപ്പിച്ചിട്ടില്ല.

അഗ്രസെൻ ഗെലോട്ട്

രാജസ്ഥാൻ മുഖ്യമന്ത്രി അശോക് ഗെലോട്ടിന്റെ സഹോദരൻ അഗ്രസെൻ ഗെലോട്ടിനെതിരെ കള്ളപ്പണം വെളുപ്പിക്കൽ കേസിൽ ഇഡി കേസെടുത്ത് ഏകദേശം രണ്ട് വർഷത്തിന് ശേഷം, 2022 ജൂണിൽ സിബിഐ അഴിമതി ആരോപണത്തിന് കേസെടുത്ത് അദ്ദേഹത്തിന്റെ വസതി റെയ്ഡ് ചെയ്യുകയും ചെയ്തു. 2007-09 കാലഘട്ടത്തിൽ കർഷകർക്കായി നൽകിയ രാസവളങ്ങൾ വിദേശത്തുള്ള ഡീലർമാർക്ക് വഴിതിരിച്ചുവിട്ടുവെന്നാരോപിച്ചാണ് കേസ്. 2020 ജൂലൈയിൽ, കേസുമായി ബന്ധപ്പെട്ട് അഗ്രസെന്നുമായി ബന്ധപ്പെട്ട സ്ഥലങ്ങളിൽ ഇഡി റെയ്ഡ് നടത്തി. അന്വേഷണം നടക്കുന്നു, കുറ്റപത്രം സമർപ്പിച്ചിട്ടില്ല.

രതുൽ പുരി

മധ്യപ്രദേശ് മുൻ മുഖ്യമന്ത്രി കമൽനാഥിന്റെ അനന്തരവൻ രതുൽ പുരിക്കെതിരെ വിവിഐപി ഹെലികോപ്റ്റർ കേസും രണ്ട് ബാങ്ക് വായ്പ തട്ടിപ്പ് കേസുകളും ഉൾപ്പെടെയുള്ള കേസുകളിൽ സിബിഐ അന്വേഷണം നടക്കുന്നു. വിവിഐപി ഹെലികോപ്റ്റർ കേസിൽ – 3,600 കോടി രൂപയുടെ അഗസ്റ്റ വെസ്റ്റ്‌ലാൻഡ് ഇടപാട് – ഇടപാടിൽ കൈക്കൂലി ഇടപാട് നടത്തിയെടന്ന് ആരോപിക്കപ്പെടുന്ന രാജീവ് സക്‌സേനയുമായി പുരിയുടെ കമ്പനിക്ക് ഇടപാടുകൾ ഉണ്ടായിരുന്നതായി ആരോപിക്കപ്പെടുന്നു. 2019-ൽ രതുൽ പുരിയുടെ കമ്പനിയായ മോസർ ബെയറുമായി ബന്ധപ്പെട്ട് 354 കോടി രൂപയുടെ ബാങ്ക് വായ്പാ തട്ടിപ്പ് കേസിൽ കേസെടുത്തിരുന്നു. 2020ൽ 787 കോടി രൂപയുടെ ബാങ്ക് വായ്പ തട്ടിപ്പ് നടത്തിയെന്ന മറ്റൊരു കേസിലും രതുൽപുരിക്കെതിരെ കേസെടുത്തിരുന്നു. അന്വേഷണം നടക്കുന്നു, കുറ്റപത്രം സമർപ്പിച്ചിട്ടില്ല.

cbi, cbi opposition leaders, indian express investigation

എൻ സി പി

അനിൽ ദേശ്‌മുഖ്

ബോംബെ ഹൈക്കോടതിയുടെ ഉത്തരവിനെത്തുടർന്ന്, 2021 ഏപ്രിലിൽ ഡാൻസ് ബാറുകളിൽ നിന്ന് കൈക്കൂലി വാങ്ങിയെന്ന ആരോപണത്തിൽ മഹാരാഷ്ട്ര മുൻ ആഭ്യന്തരമന്ത്രി അനിൽ ദേശ്‌മുഖിനെതിരെ സിബിഐ പ്രാഥമിക അന്വേഷണം ആരംഭിച്ചു. രണ്ടാഴ്ചയ്ക്ക് ശേഷം, അദ്ദേഹത്തെ ചോദ്യം ചെയ്തതിന് ശേഷം എഫ്‌ഐആർ രജിസ്റ്റർ ചെയ്തു. മുംബൈയിലെ ബാറുകളിൽ നിന്ന് 100 കോടി രൂപ കൈക്കൂലിയായി പിരിക്കാൻ ദേശ്‌മുഖ് ആവശ്യപ്പെട്ടെന്ന് ആരോപിച്ച് മുൻ മുംബൈ പൊലീസ് കമ്മീഷണർ പരം ബീർ സിംഗ് സമർപ്പിച്ച ഹർജിയുടെ അടിസ്ഥാനത്തിലാണ് കോടതി നിർദ്ദേശം നൽകിയത്. എന്നിരുന്നാലും, ഒരു വർഷത്തിനുശേഷം മാത്രമാണ് സി ബി ഐ ദേശ്‌മുഖിനെ അറസ്റ്റ് ചെയ്തത്. മുൻ മന്ത്രിയെ ഇഡി നേരത്തെ അറസ്റ്റ് ചെയ്ത് കുറ്റപത്രം സമർപ്പിച്ചിരുന്നു. ഈ വർഷം ജൂലൈയിൽ സിബിഐയും അദ്ദേഹത്തിനെതിരെ കുറ്റപത്രം സമർപ്പിച്ചു.

പ്രഫുൽ പട്ടേൽ

എയർ ഇന്ത്യ 111 വിമാനങ്ങൾ വാങ്ങിയതിലും ഇന്ത്യൻ എയർലൈൻസുമായി ലയിപ്പിച്ചതിലും അഴിമതി നടന്നുവെന്ന ആരോപണത്തിലാണ് മുൻ വ്യോമയാന മന്ത്രി പ്രഫുൽ പട്ടേലിനെതിരായ സിബിഐ കേസ്. ഒന്നാം യുപിഎ സർക്കാരിൽ വ്യോമയാന മന്ത്രിയായിരിക്കെ പട്ടേലെടുത്ത തീരുമാനങ്ങളെക്കുറിച്ചാണ് അന്വേഷണം. വിദേശ വിമാനക്കമ്പനികൾക്ക് ലാഭകരമായ റൂട്ടുകൾ വിട്ടുകൊടുത്തതുമായി ബന്ധപ്പെട്ട ആരോപണങ്ങൾ, വിദേശ നിക്ഷേപം ഉപയോഗിച്ച് പരിശീലന സ്ഥാപനങ്ങൾ തുറക്കുന്നതിലെ അഴിമതി, ഈ ഇടപാടുകളുടെ ഇടനിലക്കാരൻ എന്ന് സിബിഐ അവകാശപ്പെട്ട ലോബിയിസ്റ്റ് ദീപക് തൽവാറുമായി പട്ടേലിന് ബന്ധമുണ്ടെന്നുള്ള ആരോപണം എന്നിവ അന്വേഷണത്തിൽ ഉൾപ്പെടുന്നു. സിബിഐ രജിസ്റ്റർ ചെയ്ത എഫ്‌ഐആറുകളിൽ പട്ടേൽ പ്രതിയല്ല, എന്നാൽ 2019 ഓഗസ്റ്റിൽ തൽവാറിനെ ദുബായിൽ നിന്ന് ഇന്ത്യയിലേക്ക് കൊണ്ട് വന്ന് അറസ്റ്റുചെയ്‌ത് ദിവസങ്ങൾക്ക് ശേഷം കേസുമായി ബന്ധപ്പെട്ട് അദ്ദേഹത്തെ സി ബി ഐചോദ്യം ചെയ്തു. അന്വേഷണം നടക്കുന്നു, കുറ്റപത്രം സമർപ്പിച്ചിട്ടില്ല.

മുഹമ്മദ് ഫൈസൽ

ലക്ഷദ്വീപിലെ മത്സ്യത്തൊഴിലാളികളെ വഞ്ചിക്കാൻ കൊളംബോ ആസ്ഥാനമായുള്ള ഒരു കമ്പനിയുമായി ഒത്തുകളിച്ചുവെന്ന് ആരോപിച്ച് ലക്ഷദ്വീപ് എംപി മുഹമ്മദ് ഫൈസൽ പി പിക്കും ബന്ധു അബ്ദുൾ റാസിക്കുമെതിരെ ഈ വർഷം ജൂലൈയിൽ സിബിഐ കേസെടുത്തു. എംപിയുടെ ഡൽഹിയിലെ ഔദ്യോഗിക വസതിയിലും ലക്ഷദ്വീപിലെ വസതിയിലും അന്വേഷണ സംഘം റെയ്ഡ് നടത്തി. ലങ്കൻ കമ്പനിയായ എസ്ആർടി ജനറൽ മർച്ചന്റ്സിന് ആവശ്യമായ ടെൻഡർ നടപടികളും മറ്റ് നടപടിക്രമങ്ങളും പാലിക്കാതെ ട്യൂണ കയറ്റുമതിയി വഴി ലക്ഷദ്വീപ് കോഓപ്പറേറ്റീവ് മാർക്കറ്റിംഗ് ഫെഡറേഷ(എൽ സി എം എഫ്)ന് നഷ്ടമുണ്ടാക്കിയെന്നാണ് ആരോപണം. എൽ സി എം എഫ് ചില ഉദ്യോഗസ്ഥർ ഫൈസലുമായി ചേർന്നിരുന്നുവെന്നും സിബിഐ ആരോപിക്കുന്നു. കയറ്റുമതിക്കായി മത്സ്യത്തൊഴിലാളികളിൽ നിന്ന് നിരവധി ടൺ മത്സ്യം സംഭരിച്ചു, എന്നാൽ ലങ്കൻ കമ്പനി ഇടപാടിൽ നിന്ന് പിൻവാങ്ങിയത് വൻ നഷ്ടത്തിലേക്ക് നയിച്ചതായി സിബിഐ ആരോപിച്ചു. അന്വേഷണം നടക്കുന്നു, കുറ്റപത്രം സമർപ്പിച്ചിട്ടില്ല.

സി പി എം

കെ വി കുഞ്ഞിരാമൻ

കാസർഗോഡ് ജില്ലയിൽ 2019-ൽ രണ്ട് യൂത്ത് കോൺഗ്രസ് നേതാക്കളെ കൊലപ്പെടുത്തിയ കേസിൽ കേരളത്തിലെ ഭരണകക്ഷിയായ സി പി എമ്മിന്റെ നിയമസഭാംഗമായിരുന്ന കെ വി കുഞ്ഞിരാമനെ പ്രതിയാക്കി. സിബിഐ അറസ്റ്റ് ചെയ്തവരെല്ലാം സിപിഎം പ്രവർത്തകരാണ്. കുറ്റം ചെയ്തതിന് ശേഷം പ്രതികളിലൊരാളെ കുഞ്ഞിരാമൻ സഹായിച്ചെന്നാണ് സിബിഐയുടെ ആരോപണം. കേസിൽ കെ വി കുഞ്ഞിരാമനെതിരെ കുറ്റപത്രം സമർപ്പിച്ചിട്ടുണ്ട്.

പി. ജയരാജൻ

ആർഎസ്എസ് പ്രവർത്തകൻ കതിരൂർ മനോജിനെ 2014ൽ കൊലപ്പെടുത്തിയ കേസിൽ കേരളത്തിൽ നിന്നുള്ള മുതിർന്ന സിപിഎം നേതാവായ പി. ജയരാജനെതിരെ സിബിഐ കുറ്റപത്രം സമർപ്പിച്ചിരുന്നു. സംസ്ഥാന പൊലീസിൽ നിന്ന് കേസ് ഏറ്റെടുക്കുകയും കേസുമായി ബന്ധപ്പെട്ട് 2016 ൽ ജയരാജനെ സി ബി ഐ അറസ്റ്റ് ചെയ്യുകയും ചെയ്തു. കേസിൽ നിയമവിരുദ്ധ പ്രവർത്തനങ്ങൾ തടയൽ നിയമ( യു എ പി എ) പ്രകാരമാണ് സിബിഐ കുറ്റം ചുമത്തിയിരിക്കുന്നത്. 1999ലെ തിരുവോണദിനത്തിൽ ജയരാജന്റെ വീട്ടിൽ മനോജ് ഉൾപ്പടെയുള്ള ആർഎസ്എസ് പ്രവർത്തകർ അതിക്രമിച്ചുകയറി ജയരാജനെ വധിക്കാൻ ശ്രമിച്ചു. 2007ൽ ജയരാജൻ വധശ്രമ കേസിലെ അഞ്ചാം പ്രതി മനോജിനും മറ്റ് അഞ്ചുപേർക്കും ജില്ലാ സെഷൻസ് കോടതി 10 വർഷത്തെ കഠിനതടവിന് ശിക്ഷിച്ചിരുന്നു. പ്രതികൾ ഹൈക്കോടതിയിൽ അപ്പീൽ നൽകിയതിനാൽ ശിക്ഷ സ്റ്റേ ചെയ്തിരുന്നു.

ടി വി രാജേഷ്, പി ജയരാജൻ

മുസ്‌ലിം ലീഗ് (ഐയുഎംഎൽ) പ്രവർത്തകനായ അരിയിൽ ഷുക്കൂറിനെ 2012ൽ കൊലപ്പെടുത്തിയ കേസിൽ കല്ല്യാശേരിയിലെ സിപിഎം എംഎൽഎയായിരുന്ന ടി വി രാജേഷ്,പി ജയരാജൻ എന്നിവരെ പ്രതികളാക്കി 2019 ഫെബ്രുവരിയിൽ സിബിഐ കുറ്റപത്രം സമർപ്പിച്ചു. 2012 ഫെബ്രുവരി 20ന് കണ്ണൂരിലെ കീഴറയിൽ വെച്ചാണ് ഷുക്കൂറിനെ (21) സിപിഎം പ്രവർത്തകർ വെട്ടിക്കൊലപ്പെടുത്തിയത്. അരിയിൽ ജയരാജൻ സഞ്ചരിച്ച വാഹനത്തിന് നേരെയുണ്ടായ ആക്രമണത്തിന്റെ പ്രതികാരമായാണ് ഷുക്കൂർ കൊല്ലപ്പെടുത്തിയത് എന്നാണ് ആരോപണം.

തൃണമൂൽ കോൺഗ്രസ്

ശാരദാ ചിട്ട് ഫണ്ട് കുംഭകോണം

കോടികളുടെ ശാരദ ചിട്ടി ഫണ്ട് വെട്ടിപ്പിൽ 2014ജൂണിൽ 46 എഫ്‌ഐആറുകൾ രജിസ്റ്റർ ചെയ്ത് സിബിഐ അന്വേഷണം ആരംഭിച്ചു. വർഷങ്ങളായി, ഒന്നിലധികം തൃണമൂൽ കോൺഗ്രസ് (ടിഎംസി) നേതാക്കളും എംപിമാരും എംഎൽഎമാരും സംസ്ഥാന മന്ത്രിമാരും ഈ കേസിൽ ചോദ്യം ചെയ്യപ്പെടുകയോ അറസ്റ്റ് ചെയ്യപ്പെടുകയോ ചെയ്തു. കുനാൽ ഘോഷ്, സൃഞ്ജോയ് ബോസ്, മദൻ മിത്ര, രജത് മജുംദാർ എന്നിവരാണ് അറസ്റ്റിലായത്. സുവേന്ദു അധികാരി, മുകുൾ റോയ്, ആസിഫ് ഖാൻ, ഡെറക് ഒബ്രിയാൻ, ശതാബ്ദി റോയ്, സോവൻ ചാറ്റർജി, ശങ്കുദേബ് പാണ്ഡ എന്നിവരെ ചോദ്യം ചെയ്തു. സുവേന്ദു അധികാരി ഇപ്പോൾ ബിജെപിക്കൊപ്പമാണ്. അറസ്റ്റിലായ എല്ലാ പ്രതികൾക്കെതിരെയും കുറ്റപത്രം സമർപ്പിച്ചു. കേസിൽ അന്വേഷണം ഇപ്പോഴും തുടരുകയാണ്.

നാരാദ സ്റ്റിങ് ഓപ്പറേഷൻ

നാരദ സ്റ്റിങ് കേസിൽ 2017ൽ 12 ടിഎംസി നേതാക്കൾക്കെതിരെ സിബിഐ കേസെടുത്തിരുന്നു. അവരിൽ രാജ്യസഭാ എംപി മുകുൾ റോയ് (ബിജെപിയിലേക്ക് മാറിയെങ്കിലും കഴിഞ്ഞ വർഷത്തെ നിയമസഭാ തിരഞ്ഞെടുപ്പിന് ശേഷം തൃണമൂൽ കോൺഗ്രസിൽ തിരിച്ചെത്തി) ലോക്‌സഭാ എംപിമാരായ സൗഗത റോയ്, അപരൂപ പൊദ്ദാർ, സുൽത്താൻ അഹമ്മദ്, പ്രസൂൺ ബാനർജി, കക്കോളി ഘോഷ് ദസ്തിദാർ എന്നിവർ ഉൾപ്പെടുന്നു. പശ്ചിമ ബംഗാൾ മന്ത്രിമാരായ ഫിർഹാദ് ഹക്കിം (നഗരവികസനം), സുവേന്ദു അധികാരി (ഗതാഗതം; ഇപ്പോൾ ബിജെപിക്കൊപ്പം), സോവൻ ചാറ്റർജി (പരിസ്ഥിതി), സുബ്രത മുഖർജി (ഗ്രാമവികസനം) എന്നിവരുടെ പേരും എഫ്‌ഐആറിലുണ്ട്. മുൻ മന്ത്രി മദൻ മിത്ര (എംഎൽഎ), എംഎൽഎ ഇഖ്ബാൽ അഹമ്മദ്, ഐപിഎസ് ഉദ്യോഗസ്ഥൻ സെയാദ് മുസ്തഫ ഹുസൈൻ മിർസ എന്നിവർ നിരീക്ഷണത്തിലാണ്. ഒരു സാങ്കൽപ്പിക കമ്പനിയുടെ പ്രതിനിധികളിൽ നിന്ന് ആനുകൂല്യങ്ങൾ നൽകുന്നതിനായി ടിഎംസി നേതാക്കൾ പണം കൈപ്പറ്റിയതായി ആരോപിക്കപ്പെടുന്ന വീഡിയോ ക്ലിപ്പുകൾ സംബന്ധിച്ചാണ് കേസ്.

2021 മെയ് മാസത്തിൽ, അന്നത്തെ ഗതാഗത ഭവന മന്ത്രി ഫിർഹാദ് ഹക്കീം. പഞ്ചായത്ത് മന്ത്രി സുബ്രതാ മുഖർജി; കേസിൽ എംഎൽഎയും മുൻ മന്ത്രിയുമായ മദൻ മിത്രയും മുൻ കൊൽക്കത്ത മേയർ സോവൻ ചാറ്റർജിയും അറസ്റ്റ് ചെയ്യപ്പെട്ടു. നാല് പേർക്കെതിരെയും കുറ്റപത്രം സമർപ്പിച്ചു. മുകുൾ റോയ്, അധികാരി (അന്നത്തെ തൃണമൂൽ പിന്നീട് ബിജെപി നേതാക്കൾ), തൃണമൂൽ എംപിമാരായ സുൽത്താൻ അഹമ്മദ്, അപരൂപ പൊദ്ദാർ, സൗഗത റോയ്, കക്കോലി ഘോഷ് ദസ്തിദാർ, പ്രസൂൺ ബാനർജി, ഇഖ്ബാൽ അഹമ്മദ് (കൊൽക്കത്ത മുനിസിപ്പൽ കോർപ്പറേഷൻ) എന്നിവരുടെ പേരുകൾ കുറ്റപത്രത്തിൽ പരാമർശിച്ചു. അവരെ പ്രതികളാക്കാതെ തുടരന്വേഷണത്തിന് അനുമതി തേടി.

ആകസ്മികമായി, തൃണമൂൽ എംപിമാരെ പ്രോസിക്യൂട്ട് ചെയ്യുന്നതിനുള്ള അനുമതിക്കായി ലോക്‌സഭാ സ്പീക്കർക്ക്, 2019 ഏപ്രിൽ ആറിന് സിബിഐയുടെ അപേക്ഷ, അയച്ചു, അധികാരി, ഘോഷ് ദസ്തിദാർ, സൗഗത റോയ്, പ്രസൂൺ ബാനർജി, എന്നിവരുടെ പേര് ഉണ്ടായിരുന്നവെ്കിലും സി ബി ഐയുടെ എഫ് ഐ ആറിൽ കുറ്റാരോപിതനായ മുകുൾ റോയ് അല്ല. ഏജൻസിയുടെ എഫ്‌ഐആറിൽ കുറ്റാരോപിതരിൽ ആദ്യ പേരുകാരനായിരുന്ന മുകുൾ റോയിയുടെ പേര് ഇല്ലായിരുന്നു. ആ വർഷം പശ്ചിമ ബംഗാളിൽ ബിജെപിയുടെ ലോക്‌സഭാ തിരഞ്ഞെടുപ്പ് പ്രചാരണം നിയന്ത്രിക്കുന്നതിൽ റോയ് നിർണായക പങ്കാണ് വഹിച്ചത്. 2021 ജൂണിൽ റോയ് ടിഎംസിയിലേക്ക് മടങ്ങി.

അഭിഷേക് ബാനർജി

പശ്ചിമ ബംഗാൾ തിരഞ്ഞെടുപ്പിന് മാസങ്ങൾക്ക് മുമ്പ്, 2021 മാർച്ചിൽ, ഈസ്റ്റേൺ കോൾഫീൽഡ്‌സ് ലിമിറ്റഡിന്റെ പാട്ടത്തിനെടുത്ത പ്രദേശത്ത് നിന്ന് അനധികൃത ഖനനം, കൽക്കരി കൊള്ളയടിക്കൽ എന്നിവയിൽ അഴിമതി, ക്രിമിനൽ വിശ്വാസ ലംഘനം, കള്ളപ്പണം വെളുപ്പിക്കൽ തുടങ്ങിയ കേസുകൾ സിബിഐയും ഇഡിയും രജിസ്റ്റർ ചെയ്തു. അതിനുശേഷം, സി ബി ഐ കേസുമായി ബന്ധപ്പെട്ട് അഭിഷേകിനെയും ഭാര്യ റുജിറയെയും ചോദ്യം ചെയ്തു. റുജിറ പ്രമോട്ട് ചെയ്യുന്ന കമ്പനിയിലേക്ക് നയിക്കുന്ന സാമ്പത്തിക പാത കണ്ടെത്തിയതായി ഏജൻസി അവകാശപ്പെട്ടു, ലണ്ടനിലും തായ്‌ലൻഡിലും ഈ സ്ഥാപനത്തിന് പണം ലഭിച്ചുവെന്ന് ആരോപിക്കപ്പെടുന്നു. ടിഎംസി യുവനേതാവ് വിനയ് മിശ്ര, അറസ്റ്റിലായ സഹോദരൻ വികാസ് മിശ്ര എന്നിവരെയും അറസ്റ്റ് ചെയ്തിട്ടുണ്ട്. സെപ്തംബർ ഏഴിന്, കേസുമായി ബന്ധപ്പെട്ട് പശ്ചിമ ബംഗാൾ നിയമമന്ത്രി മൊളോയ് ഘട്ടക്കുമായി ബന്ധപ്പെട്ട സ്ഥാപനങ്ങളും റെയ്ഡ് ചെയ്യുകയും അദ്ദേഹത്തെ ചോദ്യം ചെയ്യുകയും ചെയ്തു. വിനയ്, വികാസ് മിശ്ര എന്നിവരെ പ്രതി ചേർത്ത കേസിൽ സിബിഐ ഒരു കുറ്റപത്രം സമർപ്പിച്ചു. മറ്റ് പ്രതികൾക്കെതിരെയും അന്വേഷണം തുടരുകയാണ്.

പാർത്ഥാ ചാറ്റർജി

ഈ വർഷം മേയിൽ പശ്ചിമ ബംഗാൾ സ്കൂൾ സർവീസ് കമ്മീഷനും പശ്ചിമ ബംഗാൾ പ്രൈമറി എജ്യുക്കേഷൻ ബോർഡും ഗ്രേഡ് സി തസ്തികകളിലേക്കുള്ള റിക്രൂട്ട്‌മെന്റിലെ ക്രമക്കേടുമായി ബന്ധപ്പെട്ട് സിബിഐ കേസ് രജിസ്റ്റർ ചെയ്തു. കേസിൽ സംസ്ഥാനത്തെ മുൻ വിദ്യാഭ്യാസ മന്ത്രി പാർത്ഥ ചാറ്റർജിയെയും രണ്ട് തവണ ചോദ്യം ചെയ്തു. ജൂലൈയിൽ ചാറ്റർജിയുടെ അടുത്ത സഹായി അർപ്പിത മുഖർജിയെ ഇഡി റെയ്ഡ് ചെയ്യുകയും 50 കോടി രൂപ കണ്ടെടുത്തതായി അവകാശപ്പെട്ടു. ഇരുവരെയും അറസ്റ്റ് ചെയ്യുകയും ചെയ്തു. കുറ്റപത്രം സമർപ്പിച്ചിട്ടില്ല, അന്വേഷണം തുടരുകയാണ്.

അനുബ്രത മൊണ്ടൽ

പശുക്കടത്ത് ആരോപണവുമായി ബന്ധപ്പെട്ട കേസിൽ ടിഎംസി നേതാവ് അനുബ്രത മൊണ്ഡലിനെ ഓഗസ്റ്റിൽ സിബിഐ അറസ്റ്റ് ചെയ്തിരുന്നു. 2020 സെപ്റ്റംബറിൽ അന്നത്തെ ബിഎസ്എഫ് കമാൻഡന്റും മറ്റ് മൂന്ന് വ്യക്തികളും കൂടാതെ “പൊതുസേവകർ / സ്വകാര്യ വ്യക്തികൾ” ഉൾപ്പെടെ നിരവധി പേർക്കെതിരെ അനധികൃത കന്നുകാലി വ്യാപാരം ആരോപിച്ച് സിബിഐ കേസെടുത്തിരുന്നു. കേസുമായി ബന്ധപ്പെട്ട് നേരത്തെ രാജ്യത്തിന്റെ വിവിധ ഭാഗങ്ങളിൽ തിരച്ചിൽ നടത്തിയിരുന്നു. കുറ്റപത്രം സമർപ്പിച്ചിട്ടില്ല, അന്വേഷണം തുടരുകയാണ്.

പരേഷ് പാൽ, അഭിജിത് സിൻഹ, ഷാനവാസ് ഹുസൈൻ, അവിജിത് റോയ്

2021ലെ തിരഞ്ഞെടുപ്പിന് ശേഷമുള്ള പശ്ചിമ ബംഗാളിലെ അക്രമസംഭവങ്ങളെക്കുറിച്ചുള്ള അന്വേഷണവുമായി ബന്ധപ്പെട്ട് ഈ വർഷം മെയ്, ജൂൺ മാസങ്ങളിൽ മൂന്ന് ടിഎംസി എംഎൽഎമാരെ സിബിഐ ചോദ്യം ചെയ്തിരുന്നു. ബിജെപി പ്രവർത്തകൻ അഭിജിത് സർക്കാരിന്റെ കൊലപാതകത്തിൽ അന്വേഷണം നേരിടുന്ന പരേഷ് പാൽ, വിവിധ അക്രമ സംഭവങ്ങളിൽ പങ്കുണ്ടെന്ന് ആരോപിച്ച് ചോദ്യം ചെയ്ത അഭിജിത് സിൻഹ, ഷാനവാസ് ഹുസൈൻ എന്നിവരും ഇവരിൽ ഉൾപ്പെടുന്നു. ടിഎംസി എംഎൽഎ അവിജിത് റോയിയെയും കഴിഞ്ഞ മാസം ചോദ്യം ചെയ്തിരുന്നു. 2021 ഓഗസ്റ്റിൽ, ബംഗാളിലെ തെരഞ്ഞെടുപ്പിന് ശേഷമുള്ള അക്രമങ്ങളുമായി ബന്ധപ്പെട്ട് എല്ലാ കൊലപാതക, ബലാത്സംഗ ആരോപണങ്ങളിലും സിബിഐ അന്വേഷണത്തിന് കൊൽക്കത്ത ഹൈക്കോടതി ഉത്തരവിട്ടു. കുറ്റപത്രം സമർപ്പിച്ചിട്ടില്ല, അന്വേഷണം തുടരുകയാണ്.

സുബോധ് അധികാരി, രാജു സഹാനി

2018 ലെ ചിട്ടി ഫണ്ട് അഴിമതി കേസിന്റെ അന്വേഷണവുമായി ബന്ധപ്പെട്ട് സെപ്തംബർ നാലിന് തൃണമൂൽ എംഎൽഎ സുബോധ് അധികാരിയുടെ വസതിയിൽ സിബിഐ പരിശോധന നടത്തി. നോർത്ത് 24 പർഗാനയിലെ ബരാക്‌പൂർ-ഹലിസഹാർ ഇൻഡസ്ട്രിയൽ ബെൽറ്റിലെ ശക്തനാണെന്ന് പറയപ്പെടുന്ന അധികാരി ബിജ്പൂരിൽ നിന്നുള്ള എംഎൽഎയും സഹോദരൻ കമൽ അധികാരി കാഞ്ചാരപാര മേയറുമാണ്. സന്മാർഗ് ചിട്ടി ഫണ്ട് അഴിമതിയുമായി ബന്ധപ്പെട്ട അന്വേഷണവുമായി ബന്ധപ്പെട്ട് തൃണമൂൽ കോൺഗ്രസ് നേതാവും ഹാലിസഹർ, തദ്ദേശ സ്ഥാപന ചെയർപേഴ്സനുമായ രാജു സഹാനി എന്നിവരെ സിബിഐ അറസ്റ്റ് ചെയ്ത് രണ്ട് ദിവസങ്ങൾക്ക് ശേഷമാണ് റെയ്ഡുകൾ നടന്നത്. ബിജ്പൂർ അസംബ്ലി മണ്ഡലത്തിന്റെ ഭാഗമാണ് ഹെയ്ൽസഹർ, സഹാനി അധികാരിയുടെ അടുത്ത അനുയായിയാണെന്ന് സിബിഐ ഉദ്യോഗസ്ഥർ പറയുന്നു.

ആർ ജെ ഡി

ലാലു പ്രസാദ് യാദവ്, റാബ്‌റി ദേവി, തേജസ്വി പ്രസാദ്

ബിഹാർ മുൻ മുഖ്യമന്ത്രി ലാലു പ്രസാദിന്റെ ഭാര്യ റാബ്‌റി ദേവിയും മകൻ തേജസ്വി യാദവും ഉൾപ്പെടെയുള്ള കുടുംബാംഗങ്ങൾ ഐആർസിടിസി അഴിമതിക്കേസിലെ പ്രധാന പ്രതികളാണ്. 2017ലെ സിബിഐ എഫ്‌ഐആർ അടിസ്ഥാനമാക്കിയുള്ള കേസ്, രണ്ട് ഐആർസിടിസി ഹോട്ടലുകളുടെ അറ്റകുറ്റപ്പണികൾക്കായി ഒരു കമ്പനിക്ക് കേന്ദ്ര റെയിൽവേ മന്ത്രിയായിരിക്കെ ലാലു നൽകിയ ആനുകൂല്യങ്ങൾ സംബന്ധിച്ചാണ്. ലാലുവിന്റെ കുടുംബത്തിന് ക്വിഡ് പ്രോ ക്വോ എന്ന നിലയിൽ പ്രധാന പ്ലോട്ടുകൾ ലഭിച്ചുവെന്നാണ് ആരോപണം. 2018 ഏപ്രിലിൽ ലാലു, റാബ്‌റി, തേജസ്വി എന്നിവർക്കെതിരെ സിബിഐ കുറ്റപത്രം സമർപ്പിച്ചു.

മിസാ ഭാരതി, സുനിൽ സിങ്, ഫയാസ് അഹമ്മദ് ഷഫാഖ് കരീം, സുബോധ് റായ്

ലാലു റെയിൽവേ മന്ത്രിയായിരിക്കെ റെയിൽവേ ജോലിക്ക് അപേക്ഷിച്ചവരിൽ നിന്ന് കുടുംബം ഭൂമി തട്ടിയെടുത്തെന്ന കേസിൽ ലാലു, റാബ്‌റി, തേജസ്വി, ലാലുവിന്റെ മകൾ മിസ ഭാരതി എന്നിവർക്കെതിരെ സിബിഐ ഈ മേയിൽ കേസെടുത്തിരുന്നു. “ജോലിക്കായുള്ള ഭൂമി” കുംഭകോണം എന്നറിയപ്പെടുന്ന ഈ കേസിൽ മറ്റ് നാല് ആർജെഡി നേതാക്കളായ സുനിൽ സിങ്, ഫയാസ് അഹമ്മദ്, ഷഫാഖ് കരീം, സുബോധ് റായ് എന്നിവരെ ഓഗസ്റ്റിൽ പുതുതായി രൂപീകരിച്ച ആർജെഡി-ജെഡിയു സഖ്യം ബീഹാർ നിയമസഭയിൽ വിശ്വാസവോട്ട് തേടിയ ദിവസം അന്വേഷണ ഏജൻസി റെയ്ഡ് നടത്തി. അന്വേഷണം തുടരുകയാണ്.

പ്രേംചന്ദ് ഗുപ്ത

കൽക്കരിപ്പാടം അനുവദിച്ചതിലെ ക്രമക്കേടുമായി ബന്ധപ്പെട്ട് 2014 ഓഗസ്റ്റിൽ അന്നത്തെ രാജ്യസഭാ എംപിയും മുൻ കേന്ദ്രമന്ത്രിയും ആർജെഡി തലവൻ ലാലു പ്രസാദിന്റെ അടുത്ത അനുയായിയുമായ പ്രേംചന്ദ് ഗുപ്തയ്ക്കും മകൻ ഗൗരവിനുമെതിരെ സിബിഐ കേസെടുത്തു. കേന്ദ്ര വിജിലൻസ് കമ്മീഷൻ അനുമതി നൽകിയതിനെ തുടർന്നാണ് സി ബി ഐയെ കേസ് രജിസ്റ്റർ ചെയ്തത്. കേസിൽ കുറ്റപത്രം സമർപ്പിച്ചു. ഐആർസിടിസി കേസിലും ഗുപ്ത പ്രതിയാണ്.

മുഹമ്മദ് ഷഹാബുദ്ദീൻ

മാധ്യമപ്രവർത്തകൻ രാജ്ദേവ് രഞ്ജനെ 2016ൽ കൊലപ്പെടുത്തിയ കേസിൽ ഒന്നിലധികം ക്രിമിനൽ കേസുകളിൽ ജയിലിൽ കഴിഞ്ഞിരുന്ന സിവാനിലെ അന്നത്തെ ആർജെഡി എംപി മുഹമ്മദ് ഷഹാബുദ്ദീനെതിരെ സിബിഐ കേസെടുത്തു. ബിഹാർ സർക്കാരിന്റെ ശുപാർശയുടെ അടിസ്ഥാനത്തിലാണ് കേസെടുത്തിരിക്കുന്നത്. തുടർന്ന് 2017ൽ ഷഹാബുദ്ദീനെതിരെ കുറ്റപത്രം സമർപ്പിച്ചു. വിചാരണ നടക്കുന്നതിനിടെ, കഴിഞ്ഞ വർഷം കൊവിഡ് മൂലം ഷഹാബുദ്ദീൻ മരിച്ചു.

എ എ പി

മനീഷ് സിസോദിയ

വിവിധ അഴിമതിക്കേസുകളിൽ ഡൽഹി ഉപമുഖ്യമന്ത്രി മനീഷ് സിസോദിയയെ സിബിഐ അന്വേഷണത്തിന് വിധേയനാക്കി. 2017 ജൂണിലെ പഞ്ചാബ് നിയമസഭാ തിരഞ്ഞെടുപ്പിന് മുന്നോടിയായി, സർക്കാരിന്റെ TalkToAK പ്രചാരണത്തിന്റെ പ്രമോഷനിലെ ക്രമക്കേടുകളെക്കുറിച്ചുള്ള പ്രാഥമിക അന്വേഷണവുമായി ബന്ധപ്പെട്ട് സിസോദിയയെ അദ്ദേഹത്തിന്റെ ഔദ്യോഗിക വസതിയിൽ വച്ച് സിബിഐ ചോദ്യം ചെയ്തു. ഈ കേസിൽ പ്രോസിക്യൂട്ട് ചെയ്യാനുള്ള തെളിവുകളൊന്നും അന്വേഷണ ഏജൻസിക്ക് കണ്ടെത്താനാകാത്തതിനാൽ പ്രാഥമിക അന്വേഷണം അവസാനിപ്പിച്ചു.

തുടർന്ന്, 2020 ഡൽഹി നിയമസഭാ തിരഞ്ഞെടുപ്പിന് മുമ്പ്, അഴിമതി ആരോപണത്തെ അടിസ്ഥാനമാക്കി സിസോദിയയുടെ ഓഫീസിലെ മുതിർന്ന ഉദ്യോഗസ്ഥൻ ഗോപാൽ കൃഷ്ണ മാധവിനെ സിബിഐ അറസ്റ്റ് ചെയ്തു. ജിഎസ്ടി ക്രമക്കേടുമായി ബന്ധപ്പെട്ട രണ്ട് ലക്ഷം രൂപ കൈക്കൂലി വാങ്ങിയെന്നാരോപിച്ചായിരുന്നു അറസ്റ്റ്. കേസിൽ ഉദ്യോഗസ്ഥനെതിരെ കുറ്റപത്രം സമർപ്പിച്ചിട്ടുണ്ട്.

ഡൽഹിയിലെ മദ്യനയത്തിലെ ക്രമക്കേടുമായി ബന്ധപ്പെട്ട കേസിലാണ് സിസോദിയയ്‌ക്കെതിരെ സിബിഐയുടെ ഏറ്റവും പുതിയ അന്വേഷണം. ഓഗസ്റ്റിൽ സിബിഐ എഫ്‌ഐആർ രജിസ്റ്റർ ചെയ്യുകയും സിസോദിയയുടെ വസതിയിലും ഓഫീസിലും റെയ്ഡ് നടത്തുകയും ചെയ്തു. അന്വേഷണം നടക്കുന്നു.

സത്യേന്ദർ ജെയിൻ

2010-12, 2015-16 വർഷങ്ങളിൽ 16 കോടിയിലധികം രൂപയുടെ കള്ളപ്പണം വെളുപ്പിച്ചെന്നാരോപിച്ച് 2017 ഓഗസ്റ്റിൽ ഡൽഹി ആരോഗ്യമന്ത്രി സത്യേന്ദർ ജെയിനെതിരെ സിബിഐ എഫ്‌ഐആർ രജിസ്റ്റർ ചെയ്തു. ഈ കാലയളവിൽ ജെയിൻ ഷെൽ കമ്പനികൾ വഴി അനധികൃതമായി പണം മാറ്റിയിട്ടുണ്ടോയെന്നും രാജ്യതലസ്ഥാനത്ത് കൃഷിഭൂമി വാങ്ങിയിട്ടുണ്ടോയെന്നും ഏജൻസി അന്വേഷിക്കുന്നുണ്ട്. എഎപി സർക്കാരിലെ മന്ത്രിയെന്ന നിലയിലുള്ള സ്വാധീനം ഉപയോഗിച്ച് ജെയിൻ ഈ ഭൂമി പാർപ്പിട പ്ലോട്ടാക്കി മാറ്റാൻ ശ്രമിച്ചതായും ആരോപണമുണ്ട്. ഇഡിയും ഈ കേസ് അന്വേഷിക്കുന്നുണ്ട്. 2018ലാണ് ജെയിൻ കേസിൽ കുറ്റപത്രം സമർപ്പിച്ചത്.

2018 മെയ് മാസത്തിൽ, ക്രിയേറ്റീവ് പ്രൊഫഷണലുകളെ വേണ്ടത്ര സൂക്ഷ്മത കൂടാതെയും മാനദണ്ഡങ്ങൾ പാലിക്കാതെയും നിയമിച്ചതുമായി ബന്ധപ്പെട്ട അഴിമതി ആരോപണത്തിൽ ജെയിനിനെതിരെ സിബിഐ കേസെടുത്തു. ജെയിൻ മറ്റ് പിഡബ്ല്യുഡി ഉദ്യോഗസ്ഥരുമായി ക്രിമിനൽ ഗൂഢാലോചനയിൽ ഏർപ്പെടുകയും പുതിയ വാസ്തുവിദ്യാ രൂപകല്പനകൾ നിർദ്ദേശിക്കുന്നതിനും ചെലവ് കുറയ്ക്കുന്നതിനുമായി പിഡബ്ല്യുഡിയിൽ 24 ക്രിയേറ്റീവ് പ്രൊഫഷണലുകളെ നിയമിക്കുന്നതിന് അനുമതി നൽകിയതായി ഏജൻസി ആരോപിച്ചു. ഐഐടി, ഐഐഎം, എൻഐടിഎസ്, എൻഐഡി തുടങ്ങിയ പ്രശസ്ത സ്ഥാപനങ്ങളിൽ നിന്നുള്ളവരായിരുന്നു ഈ പ്രൊഫഷണലുകളെന്നും എന്നാൽ പിന്നീട് ടെൻഡർ രേഖകളിൽ നിന്ന് ഈ നിബന്ധന ഒഴിവാക്കിയെന്നും അന്വേഷണ ഏജൻസി ആരോപിച്ചു. ഈ വർഷം മേയിൽ സിബിഐ കേസിൽ ക്ലോഷർ റിപ്പോർട്ട് സമർപ്പിച്ചു.

അമാനത്തുള്ള ഖാൻ

ഡൽഹി വഖഫ് ബോർഡിന്റെ പ്രവർത്തനങ്ങളിൽ ക്രമക്കേട് ആരോപിച്ച് 2016 നവംബറിൽ എഎപി എംഎൽഎ അമാനത്തുള്ള ഖാനെതിരെ സിബിഐ അഴിമതിക്കേസ് രജിസ്റ്റർ ചെയ്തു. അദ്ദേഹം ചെയർമാനായിരുന്ന കാലയളവിലാണ് ക്രമക്കേട് നടന്നുവെന്നാണ് ആരോപണം. നിലവിലുള്ള വഖഫ് ബോർഡ് ഡൽഹി സർക്കാർ നിയമവിരുദ്ധമായി ഇല്ലാതാക്കി/ പിരിച്ചുവിട്ടതിനെ തുടർന്നാണ് മറ്റൊരു ബോർഡ് രൂപീകരിച്ചതെന്ന് എഫ്‌ഐആറിൽ ആരോപിക്കുന്നു. കേസിൽ അമാനത്തുള്ള ഖാനെതിരെ കുറ്റപത്രം സമർപ്പിച്ചിട്ടുണ്ട്.

ജസ്വന്ത് സിങ്

പഞ്ചാബ് എഎപി എംഎൽഎ ജസ്വന്ത് സിങ് ഡയറക്ടറായ ഒരു കമ്പനിയുമായി ബന്ധപ്പെട്ട് 40.92 കോടി രൂപയുടെ വായ്പാ തട്ടിപ്പ് നടത്തിയെന്ന കേസിൽ സിങ്ങുമായി ബന്ധമുണ്ടെന്ന് ആരോപിക്കപ്പെടുന്ന സ്ഥലങ്ങളിൽ ഈ വർഷം മേയിൽ സിബിഐ പരിശോധന നടത്തി. അന്വേഷണം ഇപ്പോഴും തുടരുകയാണ്. കുറ്റപത്രം സമർപ്പിച്ചിട്ടില്ല.

ടി ആര്‍ എസ്

കെ ചന്ദ്രശേഖര റാവു

തെലങ്കാന മുഖ്യമന്ത്രി കെ ചന്ദ്രശേഖര്‍ റാവുവിനെതിരെ 2006ല്‍ കേന്ദ്ര തൊഴില്‍ മന്ത്രിയായിരിക്കെ ഇ എസ് ഐ ആശുപത്രികളുടെ നിര്‍മാണ കരാര്‍ നല്‍കിയതിലെ ക്രമക്കേടുമായി ബന്ധപ്പെട്ട കേസ് സി ബി ഐ അന്വേഷിക്കുന്നു. ഈ കേസില്‍ 2015 ഒക്ടോബറില്‍ സിബിഐ ചോദ്യം ചെയ്തു. ആന്ധ്രാപ്രദേശ് ഫിഷറീസ് ഡിപ്പാര്‍ട്ട്മെന്റ് അന്നത്തെ എക്സിക്യൂട്ടീവ് എന്‍ജിനീയറായിരുന്ന സൂര്യനാരായണയുടെ പേരും സി ബി ഐയുടെ എഫ് ഐ ആറിലുണ്ട്. അനധികൃത സ്വത്ത് സമ്പാദിച്ചെന്നാരോപിച്ച് ഈ ഉദ്യോഗസ്ഥന്‍ സംസ്ഥാനത്ത് നേരത്തെ തന്നെ അന്വേഷണം നേരിട്ടിരുന്നു. കേസുമായി ബന്ധപ്പെട്ട് റാവുവിന്റെ പ്രൈവറ്റ് സെക്രട്ടറി, അന്നത്തെ ഇ എസ് ഐ സി ഡയറക്ടര്‍ ജനറല്‍, അന്നത്തെ ഫിനാന്‍സ് കണ്‍ട്രോളര്‍ എന്നിവരെ സി ബി ഐ ചോദ്യം ചെയ്തിരുന്നു. 2020 ഓഗസ്റ്റില്‍ സി ബി ഐ സമര്‍പ്പിച്ച കുറ്റപത്രത്തില്‍ കെ സി ആറിനെ ഒഴിവാക്കിയിട്ടുണ്ട്.

സ്വതന്ത്രന്‍

സ്വതന്ത്ര രാജ്യസഭാ എംപിയും വ്യവസായിയുമായ വിജയ് മല്യയ്ക്കെതിരെ 2015ലും 2016ലും 10,000 കോടിയിലധികം രൂപയുടെ വായ്പാ തിരിച്ചടവ്, പണം വകമാറ്റല്‍ എന്നീ രണ്ട് കുറ്റങ്ങളില്‍ സി ബി ഐ കേസെടുത്തിരുന്നു. ബാങ്കുകളുടെ കണ്‍സോര്‍ഷ്യത്തില്‍നിന്ന് അദ്ദേഹത്തിന്റെ എയര്‍ലൈനായ കിങ്ഫിഷര്‍ എയര്‍ലൈന്‍സാണ് വായ്പകള്‍ നേടിയത്. 2009-10 മുതല്‍ വായ്പാ തിരിച്ചടവ് മുടങ്ങി. കള്ളപ്പണം വെളുപ്പിക്കല്‍ ആരോപിച്ച് മല്യയ്ക്കെതിരെ ഇ ഡി അന്വേഷണം നടത്തുകയും അതിനുശേഷം അദ്ദേഹത്തിന്റെ സ്വത്തുക്കള്‍ കണ്ടുകെട്ടുകയും ലിക്വിഡേറ്റ് ചെയ്യുകയും ചെയ്തു. 2016 മാര്‍ച്ചില്‍ മല്യ യു കെയിലേക്കു പോയി. അതിനുശേഷം, രണ്ട് അന്വേഷണ ഏജന്‍സികളും അദ്ദേഹത്തിനെതിരെ കുറ്റപത്രം സമര്‍പ്പിച്ചു. യു കെ കോടതിയില്‍ അദ്ദേഹത്തെ കൈമാറുന്നതിനുള്ള നടപടികള്‍ വിജയിക്കുകയും ചെയ്തു. എന്നാല്‍, മല്യയെ ഇതുവരെ ഇന്ത്യയിലേക്ക് തിരികെ കൊണ്ടുവരാന്‍ കഴിഞ്ഞിട്ടില്ല.

2010ല്‍ മല്യ രാജ്യസഭയിലേക്കു തിരഞ്ഞെടുക്കപ്പെട്ടപ്പോള്‍ കര്‍ണാടകയിലെ ജെ ഡി (എസ്)-ബി ജെ പി എംഎല്‍എമാര്‍ അദ്ദേഹത്തിന് വോട്ട് ചെയ്തതായി പറയപ്പെടുന്നു.

ബി ജെ പി

ലക്ഷ്മികാന്ത് ശര്‍മ

ബി ജെ പി നേതാവും മധ്യപ്രദേശ് സര്‍ക്കാരിലെ മുന്‍ സാങ്കേതിക വിദ്യാഭ്യാസ മന്ത്രിയായ ലക്ഷ്മികാന്ത് ശര്‍മ്മ പ്രവേശന പരീക്ഷയിലെ കോപ്പിയടിയുമായി ബന്ധപ്പെട്ട വ്യാപം അഴിമതിയിലെ പ്രധാന പ്രതികളില്‍ ഒരാളായിരുന്നു. കോടതി ഉത്തരവിനെ തുടര്‍ന്ന് 2015-ല്‍ സംസ്ഥാന പൊലീസില്‍ നിന്നും സി ബി ഐ കേസ് ഏറ്റെടുത്തു. 2018-ല്‍ അദ്ദേഹത്തെ ചോദ്യം ചെയ്യുകയും കുറ്റപത്രം സമര്‍പ്പിക്കുകയും ചെയ്തു. 2021-ല്‍ ശര്‍മ്മ കോവിഡ് ബാധിച്ച് മരിച്ചു. കേസില്‍ അന്വേഷണം തുടരുന്നു.

സുരേന്ദ്ര പട്വ

ബാങ്ക് വായ്പ തട്ടിപ്പ് നടത്തിയെന്ന കേസില്‍ ഭോജ്പൂരില്‍നിന്നുള്ള ബിജെപി എം എല്‍ എയായ സുരേന്ദ്ര പട്വയെക്കതിരെ 2021 ഒക്ടോബറില്‍ സിബിഐ കേസെടുത്തു. എംഎല്‍എയുടെ കമ്പനിയായ പട്വ ഓട്ടോമോട്ടീവ് എടുത്ത 36 കോടി രൂപ വായ്പയുമായി ബന്ധപ്പെട്ടതാണ് കേസ്. കുറ്റപത്രം സമര്‍പ്പിച്ചിട്ടില്ല.

കുല്‍ദീപ് സിങ് സെന്‍ഗര്‍

പ്രായപൂര്‍ത്തിയാകാത്ത പെണ്‍കുട്ടിയെ ബലാത്സംഗം ചെയ്ത കുറ്റത്തിന് 2017-ല്‍ ഉത്തര്‍പ്രദേശിലെ ഉന്നാവോയില്‍ നിന്നുള്ള ബി ജെ പിയുടെ എം എല്‍ എയെ 2018-ല്‍ സി ബി ഐ അറസ്റ്റ് ചെയ്തു. സെന്‍ഗാറിന്റെ സ്വാധീനം കാരണം ലോക്കല്‍ പോലീസ് സ്റ്റേഷനില്‍ എഫ് ഐ ആര്‍ രജിസ്റ്റര്‍ ചെയ്യുന്നതില്‍ ആദ്യം പരാജയപ്പെട്ടെന്ന് അതിജീവിതയുടെ കുടുംബം ആരോപിച്ചിരുന്നു. അതിജീവിതയുടെ അച്ഛന്‍ പൊലീസ് കസ്റ്റഡിയില്‍ ദുരൂഹ സാഹചര്യത്തില്‍ മരിച്ചു. 2019-ല്‍ ഈ കേസില്‍ സെന്‍ഗാറിനെ ജീവപര്യന്തം ശിക്ഷിച്ചു. അതേ വര്‍ഷം തന്നെ, അതിജീവിതയുടെ കാര്‍ അപകടത്തില്‍പ്പെടുകയും ഗുരുതരമായി പരുക്കേല്‍ക്കുകയും ചെയ്തു. കാറപടകം സംബന്ധിച്ച കേസിലും അന്വേഷണം നടക്കുകയാണ്. ഈ കേസിലും സെന്‍ഗാര്‍ നിരീക്ഷണത്തിലാണ്.

മോഹിത് കാംബോജ്

ബി ജെ പിയുടെ മുംബൈ യൂണിറ്റ് ജനറല്‍ സെക്രട്ടറി മോഹിത് കംബോജിനും മറ്റുള്ളവര്‍ക്കുമെതിരെ 2020-ല്‍ ബാങ്ക് ഓഫ് ഇന്ത്യയെ 67.22 കോടി രൂപയുടെ തട്ടിപ്പ് നടത്തിയെന്നാരോപിച്ച് സി ബി ഐ കേസെടുത്തു. 2013-നും 2018-നും ഇടയില്‍ ഒരു സ്വര്‍ണാഭരണ കയറ്റുമതിക്കാരന്‍ നടത്തിയ വഞ്ചനാപരമായ ഇടപാടുകള്‍ സംബന്ധിച്ചാണു കേസ്. 2015-ല്‍ സ്ഥാനമൊഴിയുന്നതിനു മുമ്പ് കമ്പനിയുടെ മാനേജിങ് ഡയറക്ടറായിരുന്നു കംബോജ്. അന്വേഷണം ഇപ്പോഴും തുടരുന്നു.

നാഷണല്‍ കോണ്‍ഫറന്‍സ്

ഫാറൂഖ് അബ്ദുല്ല

ജമ്മു കശ്മീര്‍ ക്രിക്കറ്റ് അസോസിയേഷന് (ജെ കെ സി എ) ബി സി സി ഐ നല്‍കിയ ഗ്രാന്റിലെ ക്രമക്കേടുമായി ബന്ധപ്പെട്ട് മുന്‍ ജമ്മു കശ്മീര്‍ സംസ്ഥാനത്തിന്റെ മുന്‍ മുഖ്യമന്ത്രി ഫാറൂഖ് അബ്ദുല്ല സി ബി ഐ അന്വേഷണം നേരിടുകയാണ്. കേസില്‍ നാഷണല്‍ കോണ്‍ഫറന്‍സ് അധ്യക്ഷനെ ഒന്നിലധികം തവണ ചോദ്യം ചെയ്തിട്ടുണ്ട്. ബി സി സി ഐയുടെ ഗ്രാന്റില്‍നിന്ന് ജെ കെ സി എയ്ക്കുള്ള തുകയില്‍നിന്നു 43 കോടി രൂപ വകമാറ്റിയെന്നാരോപിച്ചാണ് 2018ല്‍ അബ്ദുള്ളക്കെതിരെ സി ബി ഐ കുറ്റപത്രം സമര്‍പ്പിച്ചിരുന്നു. അബ്ദുള്ള ജെ കെ സി എ പ്രസിഡന്റായിരിക്കെ 2002-നും 2011-നും ഇടയില്‍ പണം വകമാറ്റിയെന്നാണ് ആരോപണം.

ഹിലാല്‍ റാതര്‍

നാഷണല്‍ കോണ്‍ഫറന്‍സ് നേതാവും മുന്‍ ജമ്മു കശ്മീര്‍ ധനമന്ത്രിയുമായ അബ്ദുള്‍ റഹീം റാതറിന്റെ മകന്‍ ഹിലാല്‍ റാത്തറിനെതിരെ 177 കോടി രൂപയുടെ ബാങ്ക് തട്ടിപ്പ് കേസിന് 2020 മാര്‍ച്ചില്‍ സി ബി ഐ കേസെടുത്തു. ബാങ്ക് തട്ടിപ്പ് നടത്തിയെന്ന് ആരോപിക്കപ്പെടുന്ന സ്ഥാപനത്തിന്റെ പാര്‍ട്ണറായ ഹിലാല്‍, ജെ-കെ ബാങ്കിലെ തിരിച്ചറിയാന്‍ സാധിച്ചിട്ടില്ലാത്ത ഉദ്യോഗസ്ഥര്‍ എന്നിവര്‍ക്കെതിരെ ഏജന്‍സി കേസെടുത്തു. കേസ് ആദ്യം ജമ്മുകശ്മീര്‍ പൊലീസിന്റെ അഴിമതി വിരുദ്ധ ബ്രാഞ്ച് അന്വേഷിച്ചു. ഗൂഢാലോചനയിലെ ‘അന്താരാഷ്ട്ര ബന്ധങ്ങള്‍’ കാരണം പിന്നീട് സി ബി ഐക്കു കൈമാറി. അന്വേഷണം നടക്കുന്നു.

റോഷ്നി ഭൂമി തട്ടിപ്പ് കേസ്

2020 ഒക്ടോബറില്‍ ജമ്മു-കശ്മീര്‍ ഹൈക്കോടതി സി ബി ഐക്കു കൈമാറിയ റോഷ്‌നി ഭൂമി തട്ടിപ്പ് കേസില്‍ നാഷണല്‍ കോണ്‍ഫറന്‍സ്, പി ഡി പി, കോണ്‍ഗ്രസ് എന്നീ പാര്‍ട്ടികളിലുള്ള ഒന്നിലധികം രാഷ്ട്രീയക്കാര്‍ നിരീക്ഷണത്തിലാണ്. ഷോപിയാന്‍ മേഖലയില്‍ അനധികൃതമായി വനഭൂമി കൈവശം വച്ചുവെന്നാരോപിച്ച് കോണ്‍ഗ്രസ് നേതാവും മുന്‍ ജമ്മു കശ്മീര്‍ മന്ത്രിയുമായ താജ് മൊഹിയുദ്ദീനെതിരെ സി ബി ഐ കേസെടുത്തിട്ടുണ്ട്. കേസുമായി ബന്ധപ്പെട്ട് 2021 ജൂലൈയില്‍ നാഷണല്‍ കോണ്‍ഫറന്‍സ് (എന്‍ സി) നേതാവ് മെഹബൂബ് ഇഖ്ബാലിന്റെ ജമ്മുവിലെ വീട്ടില്‍ സി ബി ഐ റെയ്ഡ് നടത്തി. കുറ്റപത്രം സമര്‍പ്പിച്ചിട്ടില്ല.

പി ഡി പി

ഹസീബ് ദ്രബു

ഈ വര്‍ഷം മേയില്‍ മുന്‍ പിഡിപി നേതാവും ജമ്മു കശ്മീര്‍ ബാങ്ക് മുന്‍ ചെയര്‍മാനുമായ ഹസീബ് ദ്രബുവുമായി ബന്ധപ്പെട്ട സ്ഥലങ്ങളില്‍ സി ബി ഐ പരിശോധന നടത്തിയിരുന്നു. 2010-ല്‍ ജെ ആന്‍ഡ് കെ ബാങ്കിന് ഇന്റഗ്രേറ്റഡ് ഓഫീസിനായി മുംബൈയില്‍ 180 കോടി രൂപയ്ക്ക് കെട്ടിടം വാങ്ങിയതില്‍ ക്രമക്കേട് ആരോപിച്ചാണ് 2021 നവംബറില്‍ കേസ് രജിസ്റ്റര്‍ ചെയ്തത്. ജമ്മു കശ്മീര്‍ ബാങ്കിന്റെ പ്രവര്‍ത്തനത്തില്‍ സാമ്പത്തിക ക്രമക്കേടുകള്‍ ആരോപിച്ച് ഒന്നിലധികം കേസുകളാണ് സിബിഐ അന്വേഷിക്കുന്നത്. കേസില്‍ കുറ്റപത്രം സമര്‍പ്പിച്ചിട്ടില്ല.

Stay updated with the latest news headlines and all the latest News news download Indian Express Malayalam App.

Web Title: Full list cbi casebook during nda rule express investigation