ന്യൂഡൽഹി: സമൂഹമാധ്യമങ്ങളിൽ പ്രചരിക്കുന്ന ആധികാരികത ഇല്ലാത്തെ സന്ദേശങ്ങൾ വിശ്വസിക്കരുതെന്ന് കേന്ദ്ര ആഭ്യന്തരമന്ത്രി രാജ്നാഥ് സിംഗ്. ആധികാരികത ഇല്ലാത്ത സന്ദേശങ്ങൾ മറ്റുള്ളവരിലേക്ക് പ്രചരിപ്പിക്കരുതെന്നും , ഇങ്ങനെയുള്ള പ്രചരണങ്ങൾ തെറ്റിദ്ധാരണ പരത്തുമെന്നും അദ്ദേഹം പറഞ്ഞു. ന്യൂഡൽഹിയിൽ സശസ്ത്ര സീമാബെൽ ഇന്‍റലിജന്‍റസ് യൂണിറ്റിന്‍റെ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം.
ഇന്‍റലിജൻസ് വിഭാഗത്തിലെ ജവാൻമാരോടും പറയാനുള്ളത് ഇതാണ്, നിജസ്ഥിതി ഉറപ്പുവരുത്താതെ സന്ദേശങ്ങൾ വിശ്വസിക്കുകയോ സാമൂഹത്തിന് ദോഷകരമാകുന്ന തരത്തിൽ പ്രചരിപ്പിക്കുകയോ ചെയ്യരുത്- രാജ്നാഥ് സിംഗ് പറഞ്ഞു. എന്ത് സന്ദേശം ലഭിച്ചാലും അത് സത്യമാണോ എന്ന് എല്ലാവരും ഉറപ്പ് വരുത്തണമെന്നും അദ്ദേഹം മുന്നറിയിപ്പ് നൽകി.
സോഷ്യൽ മീഡിയയിലെ ബിജെപി വിരുദ്ധ പ്രചാരണങ്ങളെ കരുതിയിരിക്കണമെന്നും നേരിടണമെന്നും അടുത്തിടെ ബിജെപി ദേശീയ അധ്യക്ഷൻ അമിത് ഷാ യുവ പാർട്ടി പ്രവർത്തകരോട് ആഹ്വാനം ചെയ്തിരുന്നു. ഇതിനു പിന്നാലെയാണ് രാജ്നാഥ് സിംഗിന്‍റെ പരാമർശം.
Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook
