Trump threatens Colombia: കൊളംബിയയിൽ സൈനിക നടപടിക്ക് തയ്യാർ; ഭീഷണി മുഴക്കി ഡൊണാൾഡ് ട്രംപ്

Trump New military operation for Colombia: വാഷിങ്ടൺ: ലാറ്റിൻ അമേരിക്കൻ രാജ്യമായ കൊളംബിയക്കെതിരെ സൈനിക നടപടി സ്വീകരിക്കാൻ മടിക്കില്ലെന്ന സൂചന നൽകി യുഎസ് പ്രസിഡന്റ് ഡൊണാൾഡ് ട്രംപ്. കൊളംബിയക്കെതിരായ പുതിയ സൈനിക ഓപ്പറേഷനെക്കുറിച്ച് മാധ്യമപ്രവർത്തകർ ചോദിച്ചപ്പോൾ, അത് "നല്ല കാര്യമായി തോന്നുന്നു" എന്നായിരുന്നു ട്രംപിന്റെ മറുപടി. എയർഫോഴ്സ് വൺ വിമാനത്തിൽ വെച്ച് മാധ്യമങ്ങളോട് സംസാരിക്കുകയായിരുന്നു അദ്ദേഹം.

Also Read: 2036 ഒളിമ്പിക്സിന് ആതിഥേയത്വം വഹിക്കാൻ ഇന്ത്യ പൂർണ്ണ ശക്തിയോടെ തയ്യാറെടുക്കുകയാണെന്ന് പ്രധാനമന്ത്രി മോദി

കൊളംബിയൻ പ്രസിഡന്റ് ഗുസ്‌താവോ പെട്രോയെ രൂക്ഷമായ ഭാഷയിലാണ് ട്രംപ് വിമർശിച്ചത്. "കൊളംബിയ ഇപ്പോൾ ഗുരുതരമായ അവസ്ഥയിലാണ്. മയക്കുമരുന്ന് നിർമ്മാണവും അമേരിക്കയിലേക്കുള്ള അതിന്റെ കടത്തും ഇഷ്ടപ്പെടുന്ന ഒരാളാണ് ആ രാജ്യം ഭരിക്കുന്നത്," ട്രംപ് ആരോപിച്ചു. മയക്കുമരുന്ന് മാഫിയക്കെതിരായ യുദ്ധത്തിന്റെ ഭാഗമായി മെക്സിക്കോയിലേക്കും കൊളംബിയയിലേക്കും സൈനിക ഓപ്പറേഷൻ വ്യാപിപ്പിക്കുന്നത് പരിഗണനയിലാണെന്നും അദ്ദേഹം വ്യക്തമാക്കി.

Also Read: വെനസ്വേലൻ ജനതയുടെ സുരക്ഷയ്ക്കും ക്ഷേമത്തിനും മുൻഗണന; യുഎസ് ആക്രമണത്തിൽ ആശങ്ക പ്രകടിപ്പിച്ച് ഇന്ത്യ

വെനസ്വേലൻ പ്രസിഡന്റ് നിക്കോളാസ് മഡുറോയെ പുറത്താക്കാനായി നടത്തിയ സൈനിക നീക്കങ്ങൾക്ക് പിന്നാലെയാണ് കൊളംബിയക്കെതിരെയും കടുത്ത നടപടികൾ ഉണ്ടാകുമെന്ന സൂചന ട്രംപ് നൽകുന്നത്. അന്താരാഷ്ട്ര തലത്തിൽ വലിയ ചർച്ചകൾക്ക് ഈ പ്രസ്താവന വഴിവെച്ചിട്ടുണ്ട്. കൊളംബിയയിൽ യുഎസ് സൈന്യത്തെ വിന്യസിക്കുന്നതിനെക്കുറിച്ച് നേരിട്ട് ചോദിച്ചപ്പോഴാണ് "അതെനിക്ക് നല്ല കാര്യമായി തോന്നുന്നു" എന്ന് ട്രംപ് ആവർത്തിച്ചത്.

Also Read: ഒഡീഷയിൽ കരിങ്കൽ ക്വാറിയിൽ പാറയിടിഞ്ഞ് വൻ അപകടം; നിരവധി മരണം

അതേസമയം, യുഎസ് സ്റ്റേറ്റ് സെക്രട്ടറി മാർക്കോ റൂബിയോ സമാനമായ വിഷയത്തിൽ ഇതിനുമുമ്പ് പ്രതികരിച്ചിരുന്നു. ലാറ്റിൻ അമേരിക്കൻ രാജ്യങ്ങളുടെ സഹകരണത്തോടെ മാത്രമേ ഇത്തരം നീക്കങ്ങൾ ഉണ്ടാവൂ എന്നാണ് അദ്ദേഹം പറഞ്ഞിരുന്നത്. എന്നാൽ ട്രംപിന്റെ ഏറ്റവും പുതിയ പ്രസ്താവന ലാറ്റിൻ അമേരിക്കൻ മേഖലയിൽ പുതിയ രാഷ്ട്രീയ അനിശ്ചിതത്വങ്ങൾക്ക് കാരണമായേക്കും.

Read More:കേരളമുൾപ്പെടെ എല്ലാ സംസ്ഥാനങ്ങൾക്കും വന്ദേ ഭാരത് സ്ലീപ്പർ ട്രെയിനുകൾ അനുവദിക്കും: അശ്വിനി വൈഷ്ണവ്