'ബിജെപി സമൂഹത്തെ വിഭജിക്കുന്നു'; ദലിത് എംപി സാവിത്രി ഫൂലെ പാര്‍ട്ടിയില്‍ നിന്നും രാജിവച്ചു

ന്യൂഡല്‍ഹി: ബിജെപിയിലെ ദലിത് എംപി സാവിത്ര ഭായ് ഫൂലെ പാര്‍ട്ടിയില്‍ നിന്നും രാജിവച്ചു. ബിജെപി 'സമൂഹത്തില്‍ ഭിന്നതയുണ്ടാക്കുന്നു' എന്ന് ആരോപിച്ചാണ് സാവിത്രി രാജിവച്ചത്. പാര്‍ട്ടി ദലിതരോട് ചെയ്യുന്ന അതിക്രമങ്ങളെ കുറിച്ച് കഴിഞ്ഞ ദിവസം പരസ്യമായി പ്രതികരിച്ചയാളാണ് സാവിത്രി ഫൂലെ.

ഹനുമാന്‍ ദലിതനും മനുവാദികളുടെ അടിമയും ആയിരുന്നെന്ന് ഉത്തര്‍പ്രദേശിലെ ബഹ്റൈച്ചില്‍ നിന്നുളള എംപിയായ സാവിത്ര ഭായ് ഫൂലെ കഴിഞ്ഞ ദിവസം പറഞ്ഞിരുന്നു. ഹനുമാന്‍ ആദിവാസി ദലിതനാണെന്ന് യുപി മുഖ്യമന്ത്രി യോഗി ആദിത്യനാഥ് പറഞ്ഞത് വിവാദമായിരുന്നു. ഇതിന് പിന്നാലെയാണ് ബിജെപി എംപിയുടെ അഭിപ്രായപ്രകടനം. ദലിതരേയും പിന്നോക്കവിഭാഗക്കാരേയും കുരങ്ങന്മാരെന്നും രാക്ഷസന്മാരെന്നുമാണ് വിളിക്കപ്പെടുന്നതെന്നും സാവിത്രി ആരോപിച്ചു.

'ദലിതനും മനുവാദികളുടെ അടിമയും ആയിരുന്നു ഹനുമാന്‍. ഒരു ദലിതനായ മനുഷ്യനായിരുന്നു ഹനുമാന്‍. ശ്രീരാമന് വേണ്ടി എല്ലാം ചെയ്തിട്ടും എന്തിനാണ് അദ്ദേഹത്തിന് വാലും നല്‍കി മുഖം ഇരുണ്ടതാക്കി മാറ്റിയത്?, ആരാധനയോടെ എല്ലാം ചെയ്തപ്പോള്‍ ശ്രീരാമന്‍ ഹനുമാനെ മനുഷ്യനാക്കി ജനിപ്പിക്കണമായിരുന്നു, പകരം ഒരു കുരങ്ങനാക്കി മാറ്റി. അപ്പോഴും ഒരു ദലിതനായിരിക്കുന്നതില്‍ അദ്ദേഹം അപമാനിക്കപ്പെട്ടു. എന്തുകൊണ്ട് നമ്മല്‍ ദലിതരെ ഒരു മനുഷ്യനായി കണക്കാക്കുന്നില്ല?,' സാവിത്രി ചോദിച്ചു.