ബെയ്‌ജിങ്: വിട്ടൊഴിയാതെ കൊറോണ ഭീതി. ഏറ്റവും ഒടുവിൽ ലഭിക്കുന്ന റിപ്പോർട്ടനുസരിച്ച് ചെെനയിൽ കൊറോണ ബാധിച്ചു മരിച്ചവരുടെ എണ്ണം 600 കടന്നു. ഇതുവരെ 636 പേർ ചെെനയിൽ മാത്രം മരിച്ചതായാണ് റിപ്പോർട്ട്. കഴിഞ്ഞ 24 മണിക്കൂറിനുള്ളിൽ 70 പേർ കൊറോണ ബാധ മൂലം മരിച്ചതായും കണക്കുകൾ വ്യക്തമാക്കുന്നു.

കഴിഞ്ഞ 24 മണിക്കൂറിനുള്ളിൽ 3,100 പേർക്ക് ചെെനയിൽ കൊറോണ സ്ഥിരീകരിച്ചു. ഇതോടെ കൊറോണ സ്ഥിരീകരിച്ച ആകെ ആളുകളുടെ എണ്ണം 31,161 ലേക്ക് ഉയർന്നു. കൂടുതൽ കേസുകൾ ഇനിയും റിപ്പോർട്ട് ചെയ്യാനാണ് സാധ്യത. ഹൂബി പ്രവിശ്യയിലാണ് കൂടുതൽ പേർ മരിച്ചത്. ആരോഗ്യവകുപ്പ് ചെെനയിൽ കനത്ത ജാഗ്രത തുടരുകയാണ്.

Read Also: തോമസ് ഐസക്കിന്റെ 11-ാം ബജറ്റ്; കണക്കിൽ ‘പ്രമാണി’ കെ.എം.മാണി തന്നെ

ഇന്ത്യയിൽ കേരളത്തിൽ മാത്രമാണ് കൊറോണ സ്ഥിരീകരിച്ചിട്ടുള്ളത്. കേരളത്തിൽ മൂന്ന് വിദ്യാർഥിനികൾക്കാണ് കൊറോണ വെെറസ് ബാധയുള്ളത്. ഇവരുടെ ആരോഗ്യനില തൃപ്‌തികരമാണെന്ന് ആരോഗ്യമന്ത്രി കഴിഞ്ഞ ദിവസം പറഞ്ഞിരുന്നു.

അതേസമയം, കൊറോണ വെെറസ് ബാധയെ സംസ്ഥാന ദുരന്തമായി കേരളം പ്രഖ്യാപിച്ചിട്ടുണ്ട്. മുഖ്യമന്ത്രി പിണറായി വിജയനുമായി കാര്യങ്ങൾ ചർച്ച ചെയ്‌തെന്നും കൊറോണയെ സംസ്ഥാന ദുരന്തമായി സർക്കാർ പ്രഖ്യാപിക്കുകയാണെന്നും ആരോഗ്യമന്ത്രി കെ.കെ.ശെെലജ അറിയിച്ചിരുന്നു. ആരും പേടിക്കേണ്ട സാഹചര്യമില്ലെന്നും കൂടുതൽ ജാഗ്രത പുലർത്തുന്നതിന്റെ ഭാഗമായാണ് സംസ്ഥാന ദുരന്തമായി പ്രഖ്യാപിച്ചതെന്നും ആരോഗ്യവകുപ്പ് വ്യക്തമാക്കി.

Read Also: Horoscope Today February 07, 2020: നിങ്ങളുടെ ഇന്നത്തെ ദിവസം, രാശി ഫലം

ചെെനയിൽ നിന്നെത്തിയവർക്ക് കർശന നിർദേശങ്ങളാണ് മന്ത്രി നൽകിയത്. ചെെനയിൽ നിന്നു നാട്ടിലെത്തിയവർ നിർബന്ധമായും ആരോഗ്യവകുപ്പിനെ സമീപിക്കണം. അവർ നിരീക്ഷണത്തിലായിരിക്കണം. അക്കാര്യത്തിൽ യാതൊരു വിട്ടുവീഴ്‌ചയുമില്ല. ചെെനയിൽ നിന്നെത്തിയവർ പൊതു പരിപാടികൾക്ക് യാതൊരു കാരണവശാലും പോകരുത്. കൊറോണ ബാധയുടെ ലക്ഷണങ്ങളൊന്നും കാണിച്ചില്ലെങ്കിലും ചിലപ്പോൾ വെെറസ് ശരീരത്തിൽ ഉണ്ടായെന്ന് വരാം. വേണ്ടത്ര നിരീക്ഷണങ്ങൾക്ക് ശേഷമേ അത് പറയാൻ സാധിക്കൂ. അതുകൊണ്ട് ചെെനയിൽ നിന്നെത്തിയവർ ജാഗ്രത പുലർത്തണമെന്നും മന്ത്രി കെ.കെ.ശെെലജ പറഞ്ഞു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook