ന്യൂഡൽഹി: കോവിഡ്-19 നെ തുടർന്ന് പ്രഖ്യാപിച്ച ലോക്ക്ഡൗൺ ഇളവുകളിൽ ഇ-കൊമേഴ്സ് കമ്പനികൾക്ക് പ്രവർത്തിക്കാൻ കേന്ദ്രസർക്കാർ അനുമതി കൊടുത്തിരുന്നു. എന്നാൽ ഈ അനുമതിയിൽ മാറ്റം വരുത്തിക്കൊണ്ട് പുതിയ മാർഗ്ഗ നിർദേശം പുറത്തിറക്കിയിരിക്കുകയാണ് കേന്ദ്ര ആഭ്യന്ത്രര മന്ത്രാലയം. ഇ-കൊമേഴ്സ് കമ്പനികൾ അവശ്യ വസ്തുക്കളല്ലാത്തവ വിതരണം ചെയ്യുന്നത് കേന്ദ്രം വിലക്കി. എന്നാൽ അവശ്യ വസ്തുക്കൾ വിതരണം ചെയ്യാമെന്നും വ്യക്തമാക്കിയിട്ടുണ്ട്.
ഏപ്രിൽ 15 പുറത്തിറക്കിയ മാർഗ്ഗ നിർദേശത്തിൽ കോവിഡ് തീവ്രബാധിതമല്ലാത്ത മേഖലകളിൽ ഇ-കൊമേഴ്സ് കമ്പനികളുടെ പ്രവർത്തനം പൂർണമായും പുനരാരംഭിക്കാമെന്നും കമ്പനികളുടെ വാഹനങ്ങള്‍ക്ക് അവശ്യമായ അനുമതിയോടെ നിരത്തിലിറങ്ങാമെന്നും ഉണ്ടായിരുന്നു. ഇതിലൂടെ അവശ്യമല്ലാത്ത വസ്തുക്കളുടെ വിതരണത്തിനും കമ്പനികൾക്ക് അനുമതി ലഭിച്ചിരുന്നു.
പുതിയ ഓർഡറിൽ അവശ്യ വസ്തുക്കൾ ആയതും അല്ലാത്തതും എന്താണെന്ന് വ്യക്തമാക്കിയിട്ടില്ല. അവശ്യമല്ലാത്ത വസ്തുക്കൾ വിതരണം ചെയ്യാൻ ഇ-കൊമേഴ്സ് പ്ലാറ്റ്ഫോമുകളെ അനുവദിക്കില്ലെന്നാണ് കേന്ദ്ര ആഭ്യന്തര മന്ത്രാലയ വക്താവിന്റെ ട്വീറ്റ്. എല്ലാ മന്ത്രാലയങ്ങളും സർക്കാർ വകുപ്പുകളും, സംസ്ഥാന/കേന്ദ്രഭരണ പ്രദേശ സർക്കാരുകളും, സംസ്ഥാന/കേന്ദ്ര ഭരണ പ്രദേശ അതോറിറ്റികളും ഈ നിർദേശം കർശനമായി നടപ്പിലാക്കണമെന്നും ഓർഡറിലുണ്ട്.
Read Also: Covid-19 Live Updates: ഡൽഹിയിൽ ലോക്ക്ഡൗൺ ഇളവുകൾ ഇല്ലെന്ന് മുഖ്യമന്ത്രി കേജ്‌രിവാൾ
ഏപ്രിൽ 20 നുശേഷം ഇ-കൊമേഴ്സ് കമ്പനികൾ പഴയതുപോലെ പ്രവർത്തനം തുടങ്ങാൻ തയ്യാറെടുക്കുമ്പോഴാണ് ആഭ്യന്തര മന്ത്രാലയത്തിന്റെ പുതിയ നീക്കം. കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സിന്റെ അടക്കമുളള ട്രേഡ് ഗ്രൂപ്പുകളുടെ സമ്മർദ്ദത്തെത്തുടർന്നാണ് പുതിയ നീക്കമെന്ന് വൃത്തങ്ങളിൽനിന്നും ലഭിക്കുന്ന വിവരം. പ്രാദേശിക വ്യാപാരികളെ കച്ചവടം ചെയ്യാൻ അനുവദിക്കാതിരിക്കുകയും ഇ-കൊമേഴ്സ് കമ്പനികൾക്ക് പൂർണ സ്വാതന്ത്ര്യം കൊടുക്കുകയും ചെയ്യുന്നതിലൂടെ വ്യാപാര അസന്തുലിതാവസ്ഥ ഉണ്ടാകുമെന്ന് ഇവർ ഏപ്രിൽ 18 ന് അയച്ച കത്തിൽ പറയുന്നു. സർക്കാരിന്റെ ഈ തീരുമാനത്തിൽ വ്യാപാരികൾ ഒന്നടക്കം നിരാശയിലാണെന്നും കത്തിൽ വ്യക്തമാക്കിയിരുന്നു.
Read in English: Under pressure from small traders, Centre bans e-commerce platforms from delivering non-essential items
