കേന്ദ്ര-സംസ്ഥാന സര്‍ക്കാരുകള്‍ക്ക് മണിപ്പൂര്‍ സംഘര്‍ഷങ്ങള്‍ ഒരു പരിധി വരെ നിയന്ത്രിക്കാനായി: മുഖ്യമന്ത്രി ബീരേന്‍ സിങ്

ന്യൂഡല്‍ഹി: മണിപ്പൂരിലെ നിലവിലെ സാഹചര്യങ്ങള്‍ കേന്ദ്ര ആഭ്യന്തര മന്ത്രി അമിത് ഷായെ ധരിപ്പിച്ച് മുഖ്യമന്ത്രി എന്‍ ബീരേന്‍ സിങ്. അമിത് ഷായുടെ നേതൃത്വത്തില്‍ സംസ്ഥാന - കേന്ദ്ര സര്‍ക്കാരുകള്‍ക്ക് സംഘര്‍ഷം ഒരു പരിധിവരെ നിയന്ത്രിക്കാന്‍ സാധിച്ചെന്നും അദ്ദേഹം പറഞ്ഞു.

ഇന്ന് രാവിലെ ഇംഫാലില്‍ നിന്നെത്തിയ ബീരേന്‍ സിങ് അമിത് ഷായെ അദ്ദേഹത്തിന്റെ വസതിയിലെത്തിയാണ് കണ്ടത്. ജൂണ്‍ 13-ന് ശേഷം സംസ്ഥാനത്ത് സംഘര്‍ഷങ്ങളില്‍ മരണം സംഭവിച്ചിട്ടില്ലെന്നും അദ്ദേഹം അറിയിച്ചു. മണിപ്പൂരിലെ സ്ഥിതിഗതികള്‍ സാധാരണ നിലയിലാക്കാന്‍ വേണ്ട നടപടികള്‍ സ്വീകരിക്കുമെന്ന് അമിത് ഷാ ഉറപ്പ് നല്‍കിയതായും മുഖ്യമന്ത്രി വ്യക്തമാക്കി.

സംസ്ഥാനത്ത് സമാധാനം പുനസ്ഥാപിക്കാനുള്ള നടപടികള്‍ തുടരാന്‍ അമിത് ഷാ നിര്‍ദേശിച്ചതായും മുഖ്യമന്ത്രി കൂട്ടിച്ചേര്‍ത്തു. മണിപ്പൂര്‍ സംഘറ്‍ഷത്തില്‍ കേന്ദ്ര ആഭ്യന്തര മന്ത്രി സര്‍വകക്ഷിയോഗം വിളിച്ചതിന് പിന്നാലെയാണ് ബീരേന്‍ സിങ്ങുമായുള്ള കൂടിക്കാഴ്ച. 18 രാഷ്ട്രീയ പാര്‍ട്ടികളും നാല് എംപിമാരും രണ്ട് മുഖ്യമന്ത്രിമാരുമാണ് മൂന്ന് മണിക്കൂര്‍ നീണ്ട യോഗത്തില്‍ പങ്കെടുത്തത്.

പ്രധാനമന്ത്രി നരേന്ദ്ര മോദി മണിപ്പൂരിലെ സാഹചര്യം നിരീക്ഷിക്കുന്നുണ്ടെന്ന് അമിത് ഷാ യോഗത്തില്‍ നേതാക്കന്മാരെ അറിയിച്ചു. സംസ്ഥാനത്ത് സംഘര്‍ഷം ആരംഭിച്ച ദിവസം മുതല്‍ പരിഹാരം കാണാനുള്ള നിര്‍ദേശവും പ്രധാനമന്ത്രി നല്‍കിയിരുന്നതായും അമിത് ഷാ പറഞ്ഞു.

മണിപ്പൂരിലെ സാഹചര്യം സാധാരണ നിലയിലേക്ക് മടങ്ങുന്നതായാണ് കേന്ദ്ര സര്‍ക്കാരിന്റെ വിലയിരുത്തല്‍. സമാധാനം പുനസ്ഥാപിക്കാനായി എല്ലാ പാര്‍ട്ടികളും ഒരുമിച്ച് നില്‍ക്കണമെന്ന നിലപാടാണ് കേന്ദ്രത്തിനുള്ളതെന്നും അമിത് ഷാ കൂട്ടിച്ചേര്‍ത്തു.