ന്യൂഡല്‍ഹി: ബാബ്‌റി മസ്ജിദ്- രാമക്ഷേത്ര ഭൂമി തര്‍ക്കവിഷയത്തില്‍ മതവിദ്വേഷം പരത്തുന്ന പരാമര്‍ശത്തിന് ആര്‍ട്ട് ഓഫ് ലിവിങ് സ്ഥാപകന്‍ ശ്രീ ശ്രീ രവിശങ്കറിനെതിരെ പൊലീസ് കേസെടുത്തു. ഹൈദരാബാദ് ദര്‍സ ജിഹാദ് ഒ ഷഹാദത്ത് സെക്രട്ടറി സലാഹുദ്ദീന്‍ അഫാനാണ് പരാതി നല്‍കിയത്.

രാമക്ഷേത്ര പ്രശ്നം പെട്ടെന്ന് പരിഹരിച്ചില്ലെങ്കില്‍ ഇന്ത്യ മറ്റൊരു സിറിയ ആയി മാറുമെന്നായിരുന്നു രവിശങ്കര്‍ പറഞ്ഞത്. സമൂഹത്തിലെ ഒത്തൊരുമ ഇല്ലാതാക്കാനും മുസ്‌ലിം മതവികാരം വ്രണപ്പെടുത്താനുമാണ് അദ്ദേഹത്തിന്റെ പരാമര്‍ശമെന്ന് പരാതിയില്‍ പറയുന്നു.

ഇന്ത്യാ ടുഡേയ്ക്ക് നല്‍കിയ അഭിമുഖത്തിലായിരുന്നു ശ്രീ ശ്രീ വിവാദ പരാമര്‍ശം നടത്തിയത്. മുസ്ലിംങ്ങള്‍ അയോധ്യയ്ക്ക് മേലുളള അവകാശവാദം ഉപേക്ഷിക്കണമെന്നാണ് രവിശങ്കര്‍ പറഞ്ഞത്. അയോധ്യ മുസ്ലിംങ്ങളുടെ വിശ്വാസത്തിന് വേണ്ടിയുളള സ്ഥലമല്ലെന്നും നല്ല രീതിയില്‍ പിന്‍വാങ്ങണമെന്നും അദ്ദേഹം ആവശ്യപ്പെട്ടു. ‘വളരെ നല്ല രീതിയില്‍ തന്നെ മുസ്ലിംങ്ങള്‍ അയോധ്യയ്ക്ക് മേലുളള അവകാശവാദം ഉപേക്ഷിക്കണം. അയോധ്യ എന്ന് പറയുന്നത് നിങ്ങള്‍ക്ക് പ്രാര്‍ത്ഥിക്കാനുളള ഇടമല്ല. അത് മനസ്സിലാക്കി പെരുമാറണം. ഇല്ലെങ്കില്‍ ഇന്ത്യ മറ്റൊരു സിറിയ ആയി മാറും’ രവിശങ്കര്‍ വ്യക്തമാക്കി.

ശ്രീരാമനെ മറ്റൊരു സ്ഥലത്ത് ജനിപ്പിക്കാന്‍ തങ്ങള്‍ക്ക് ഇപ്പോള്‍ സാധ്യമാകില്ലല്ലോയെന്നും അദ്ദേഹം ചോദിച്ചു. മുഗള്‍ കാലത്ത് പണിത പളളി 1992 ഡിസംബര്‍ 6നാണ് ഹിന്ദു തീവ്ര സംഘങ്ങള്‍ പൊളിച്ചുമാറ്റിയത്. ഇവിടെ ആശുപത്രി പോലെയുളള സന്നദ്ധ കേന്ദ്രങ്ങള്‍ പണിയണമെന്ന നിര്‍ദേശത്തേയും രവിശങ്കര്‍ തളളിക്കളഞ്ഞു. രാമന്റെ ജന്മസ്ഥലമാണെന്ന് അവകാശപ്പെടുന്നിടത്ത് എങ്ങനെ ആശുപത്രി പണിയാന്‍ കഴിയുമെന്ന് അദ്ദേഹം ചോദിച്ചു.

അയോധ്യ തര്‍ക്കം കോടതിക്ക് പുറത്ത് തീര്‍ക്കാനായി കഴിഞ്ഞ അഞ്ച് വര്‍ഷമായി രവിശങ്കര്‍ ശ്രമം നടത്തുന്നുണ്ട്. അയോധ്യ, ബെംഗളൂരു, ലക്‌നൗ, ഡല്‍ഹി, ഹൈദരാബാദ്, ചെന്നൈ തുടങ്ങിയിടത്തെ 500ഓളം നേതാക്കളുമായി രവിശങ്കര്‍ ചര്‍ച്ച നടത്തിയിട്ടുണ്ട്. എന്നാല്‍ തന്റെ ശ്രമങ്ങളെ കുഴപ്പം ആഗ്രഹിക്കുന്ന ഒരുകൂട്ടം തകര്‍ക്കുകയാണെന്നും അദ്ദേഹം ആരോപിച്ചു. എല്ലാ വിഭാഗവും കോടതി ഉത്തരവിനോട് അനുകൂലിക്കില്ലെന്നും രവിശങ്കര്‍ പറഞ്ഞു.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ