ന്യൂഡൽഹി: കേന്ദ്ര സർക്കാരിന്റെ അവസാന സമ്പൂർണ്ണ ബജറ്റ് കേന്ദ്ര ധനമന്ത്രി അരുൺ ജെയ്റ്റ്‌ലി പാർലമെന്റിൽ അവതരിപ്പിച്ചു. ഇന്ന് രാവിലെ 11 മണിക്കാണ് ലോക്‌സഭയിൽ മന്ത്രി ബജറ്റ് അവതരിപ്പിച്ചത്. 2019 ൽ അടുത്ത ലോക്‌സഭ തിരഞ്ഞെടുപ്പ് നടക്കാനിരിക്കുന്ന സാഹചര്യത്തിൽ ഇത്തവണത്തെ കേന്ദ്ര ബജറ്റിന് പ്രാധാന്യമേറെയായിരുന്നു.

ചരക്ക് സേവന നികുതി നടപ്പിലാക്കിയതിന് ശേഷമുളള ആദ്യ ബജറ്റെന്ന സവിശേഷതയും ഇത്തവണത്തെ കേന്ദ്രബജറ്റിനുണ്ട്. അടുത്ത സാമ്പത്തിക വർഷത്തിൽ 7 നും 7.5 ശതമാനത്തിനും ഇടയിൽ സാമ്പത്തിക വളർച്ച ഉന്നമിടുന്ന സാമ്പത്തിക വളർച്ച സർവ്വേ തിങ്കളാഴ്ചയാണ് പാർലമെന്റിന് മുന്നിൽ വച്ചത്. കാർഷിക മേഖലയ്ക്കും കർഷകർക്കും ഊന്നൽ നൽകിക്കൊണ്ടുളളതായിരുന്നു ഇത്തവണത്തെ ബജറ്റ്.

ബജറ്റ് 2018

12.50pm: ധനമന്ത്രിയുടെ ബജറ്റ് പ്രസംഗം അവസാനിച്ചു.

12.47pm: വിദേശ നിർമ്മിത മൊബൈൽ ഫോണുകളുടെ കസ്റ്റംസ് നികുതി 15 മുതൽ 20 ശതമാനം വരെ വർദ്ധിക്കും. 

12.45 pm: ബാങ്ക് നിക്ഷേപങ്ങളിൽ നിന്ന് ലഭിക്കുന്ന 50000 രൂപ വരെയുളള പലിശ വരുമാനത്തിന് നികുതി നൽകേണ്ട.

12.42 pm: ആദായനികുതി സ്ലാബുകളിൽ മാറ്റമുണ്ടാകില്ല.

12.38 pm: 2018-19 വർഷത്തിലെ ധനക്കമ്മി 3.3 ശതമാനമാക്കുമെന്ന് ധനമന്ത്രി.

12.35 pm: വയോജനങ്ങളുടെ ആരോഗ്യ പരിരക്ഷ ഉറപ്പാക്കുന്നതിനായി 50000 കോടി നീക്കിവച്ചു.

12.32 pm: എല്ലാ അഞ്ചുവർഷത്തിലും പാർലമെന്റംഗങ്ങളുടെ ആനുകൂല്യങ്ങൾ പരിഷ്കരിക്കും.

12.28 pm: പേഴ്സണൽ വരുമാന നികുതിയിലൂടെ അധികമായി നേടിയത് 90000 കോടി.

12.25 pm: രാജ്യത്തെ നികുതിയടക്കുന്നവരുടെ എണ്ണം 8.27 കോടി.

12.20 pm: ക്രിപ്റ്റോ കറൻസികൾ ഒഴിവാക്കാൻ സാധ്യമായതെല്ലാം ചെയ്യുമെന്ന് ധനമന്ത്രി.

12.20 pm: 24 പൊതുമേഖലാ സ്ഥാപനങ്ങളുടെ ഓഹരികൾ വിറ്റഴിക്കാനാണ് കേന്ദ്രസർക്കാർ തീരുമാനിച്ചിരിക്കുന്നത്. അതേസമയം  ദേശീയ ഭവന പദ്ധതിയിൽ റിസർവ് ബാങ്ക് ഓഫ് ഇന്ത്യയുടെ ഓഹരികൾ സർക്കാർ ഏറ്റെടുക്കും.

12.19 pm: രാഷ്ട്രപതിയുടെ വേതനം അഞ്ച് ലക്ഷം, ഉപരാഷ്ട്രപതിക്ക് നാല് ലക്ഷം, ഗവർണ്ണർമാർക്ക് മൂന്നര ലക്ഷം രൂപയും വേതനം.

12.18 pm: 80000 കോടിയുടെ പൊതുമേഖലാ ഓഹരികൾ അടുത്ത സാമ്പത്തിക വർഷത്തിൽ വിറ്റഴിക്കും

12.14 pm: പൊതുമേഖലാ സ്ഥാപനങ്ങളായ യുണൈറ്റഡ് ഇൻഷുറൻസ് കമ്പനി, ഓറിയന്റൽ ഇൻഷുറൻസ് കമ്പനി, നാഷണൽ ഇൻഷുറൻസ് കമ്പനി എന്നിവ കൂട്ടിച്ചേർത്ത് ഒറ്റ സ്ഥാപനമാക്കും.

12.11 pm: ആദ്യത്തെ മൂന്ന് വർഷം എംപ്ലോയ്മെന്റ് പ്രൊവിഡന്റ് ഫണ്ടിൽ തൊഴിലാളികളുടെ ഇപിഎഫ് വിഹിതം സർക്കാർ നൽകും.

12.09 pm: ചെറുകിട-ഇടത്തരം സംരംഭകരുടെ കിട്ടാക്കടങ്ങൾ എഴുതിതള്ളാൻ നടപടി. മുദ്ര പദ്ധതി 2019 ൽ മൂന്ന് ലക്ഷം കോടിയായി നിജപ്പെടുത്തി. നവസംരംഭകർക്ക് മൂലധനം നൽകുന്ന ഏയ്ഞ്ചൽ നിക്ഷേപകർക്ക് സഹായം.

12.08 pm: 5 കോടിയോളം ഗ്രാമീണ ജനങ്ങൾക്ക് ഇന്റർനെറ്റ് ഉപയോഗിക്കാൻ 5 ലക്ഷം കേന്ദ്രങ്ങളിൽ വൈഫൈ സേവനങ്ങൾ ലഭ്യമാക്കും.  ഡിജിറ്റൽ ഇന്ത്യ പദ്ധതികൾക്കായി 3073 കോടി.

12.07 pm: എല്ലാ തീവണ്ടികളിലും സിസിടിവിയും വൈഫൈ സേവനവും ഉറപ്പാക്കും. 4000 കിലോമീറ്റർ റെയിൽവേ ലൈൻ വൈദ്യുതീകരിക്കും.

12.06 pm: 50 ലക്ഷം യുവാക്കളുടെ തൊഴിൽ ശേഷി വികസിപ്പിക്കാൻ പ്രത്യേക പദ്ധതി.

12.04 pm: രാജ്യത്ത് എയർപോർട്ട് അതോറിറ്റിക്ക് 142 വിമാനത്താവളങ്ങളുണ്ട്. രാജ്യത്തു നിന്ന് പുറത്തേക്കുളള വിമാനയാത്രകൾ ഒരു ബില്യണാക്കി ഉയർത്താൻ എർപോർട്ട് അതോറിറ്റി ഓഫ് ഇന്ത്യയോട് ശുപാർശ ചെയ്യും.

12.00 noon: രാജ്യത്ത് 3600 കിലോമീറ്റർ റെയിൽവേ ട്രാക്ക് നവീകരിക്കാൻ പദ്ധതി. 600 റെയിൽവേ സ്റ്റേഷനുകൾ വികസിപ്പിക്കും. ബെംഗളൂരുവിൽ 160 കിലോമീറ്റർ സബർബൻ പദ്ധതിക്ക് 17000 കോടി.

11.58 am: മുംബൈ റയിൽവേയുടെ സമഗ്രവികസനത്തിന് 40000 കോടിയുടെ പദ്ധതി.

11.57 am: 9000 കോടിയുടെ ദേശീയ പാത വികസനത്തിന് പദ്ധതി. 25000ത്തിലധികം യാത്രക്കാർ വരുന്ന റെയിൽവേ സ്റ്റേഷനുകളിൽ എസ്കലേറ്റർ സൗകര്യം.

11.55 am: ഗ്രാമീണ മേഖലയിൽ 14.34 ലക്ഷം കോടി രൂപയുടെ അടിസ്ഥാന സൗകര്യ വികസനം.

11.52 am: രാജ്യത്ത് നൂറ് നഗരങ്ങളിൽ സ്മാർട്ട് സിറ്റികൾ സ്ഥാപിക്കാൻ 2.04 ലക്ഷം കോടി.10 വിനോദസഞ്ചാര നഗരങ്ങളെ വിനോദസഞ്ചാര ഐക്കണുകളായി വികസിപ്പിക്കാൻ പദ്ധതി.

11.49 am: എസ്‌സി വിഭാഗത്തിന് 279 പദ്ധതികൾ. 56619 കോടി ഇതിനായി നീക്കിവയ്ക്കും. എസ് ടി വിഭാഗത്തിന് 305 പദ്ധതികൾ 39135 കോടിയുടെ സഹായം.

11.45 am: ടിബി രോഗികൾക്ക് ന്യൂട്രീഷൻ നൽകാൻ 600 കോടിയുടെ പദ്ധതി.

11.43am: ഒരു കുടുംബത്തിന് അഞ്ച് ലക്ഷം രൂപ വരെ പ്രതിവർഷം ലഭിക്കുന്ന രീതിയിൽ പത്ത് കോടി കുടുംബങ്ങളെ ദേശീയ ആരോഗ്യ സുരക്ഷ പദ്ധതിയുടെ കീഴിൽ കൊണ്ടുവരുമെന്ന് ധനമന്ത്രി. ഇത് 50 കോടി ജനങ്ങൾക്ക് ഉപകാരപ്പെടും.

11.42 am: ഓരോ മൂന്ന് ലോക്‌സഭ മണ്ഡലങ്ങൾക്കുമായി മെഡിക്കൽ കോളേജുകൾ. ഓരോ സംസ്ഥാനത്തിലും കേന്ദ്രസർക്കാർ മെഡിക്കൽ കോളേജുകൾ വേറെയും സ്ഥാപിക്കും. 24 പുതിയ സർക്കാർ മെഡിക്കൽ കോളേജ് ആശുപത്രികൾ സ്ഥാപിക്കാനാണ് കേന്ദ്ര സർക്കാർ ശ്രമം.

11.41 am: 2022 ഓടെ രാജ്യത്തെ ആതുരമേഖലയെ ശക്തിപ്പെടുത്തുമെന്നും ഇതിനായി ആയുഷ്മാൻ ഭരത് പരിപാടി ആവിഷ്കരിക്കുമെന്നും കേന്ദ്ര ധനമന്ത്രി.

11.38 am: രാജ്യത്തെ പത്തുകോടി പാവപ്പെട്ടവർക്കായി ദേശീയ ആരോഗ്യ പരിരക്ഷ പദ്ധതി.

11.36 am: വഡോദരയിൽ റെയിൽവേ യൂണിവേഴ്സിറ്റി. ആദിവാസി വിദ്യാർത്ഥികൾക്കായി ഏകലവ്യ സ്കൂളുകൾ. 1000 മികച്ച ബിടെക് വിദ്യാർത്ഥികൾക്ക് പ്രധാനമന്ത്രിയുടെ ഫെല്ലോഷിപ്പോടുകൂടി ഉന്നത വിദ്യാഭ്യാസത്തിന് പദ്ധതി.

11.33 am: വിദ്യാഭ്യാസ മേഖലയിൽ നാല് വർഷത്തേക്ക് ഒരു ലക്ഷം കോടിയുടെ പദ്ധതി. അദ്ധ്യാപകരാകാൻ പഠിക്കുന്ന വിദ്യാർത്ഥികൾക്ക് വേണ്ടി ഇന്റഗ്രേറ്റഡ് ബിഎഡ് പദ്ധതി. വിദ്യാഭ്യാസത്തിനുളള അവകാശം ശക്തിപ്പെടുത്താൻ 13 ലക്ഷം അദ്ധ്യാപകർക്ക് പരിശീലനം നൽകും.

11.32 am: 2022 ഓടെ രാജ്യത്ത് എല്ലാവർക്കും വീട് നിർമ്മിച്ച് നൽകുമെന്ന് അരുൺ ജെയ്റ്റ്‌ലി.

11.31 am: നാഷണൽ ലൈവിലിഹുഡ് മിഷന് 5750 കോടി.

11.30 am: അടുത്ത സാമ്പത്തിക വർഷത്തിൽ രാജ്യത്ത് സ്വച്ഛ് ഭാരത് മിഷനിലൂടെ രണ്ട് കോടി കൂടുതൽ ശൗചാലയങ്ങൾ നിർമ്മിക്കും. ഗ്രാമീണ മേഖലയിലും ശുചിത്വ പരിപാടികൾക്ക് സാമ്പത്തിക സഹായം.

11.28 am: ഉജ്ജ്വല യോജന വഴി 8 കോടി സ്ത്രീകൾക്ക് സൗജന്യ ഗ്യാസ് കണക്ഷൻ.

11.25 am: ഡൽഹിയിലെ വായു മലിനീകരണത്തിന്റെ തോത് കുറയ്ക്കാൻ പഞ്ചാബ്, ഉത്തർപ്രദേശ്, ഹരിയാന, ഡൽഹി സർക്കാരുകൾക്ക് സഹായം.

11.24 am: ആനിമൽ ഹസ്ബന്ററി ഫണ്ട്, ഫിഷറി ഡവലപ്മെന്റ് ഫണ്ട് എന്നിവയ്ക്കായി 10000 കോടി.

11.23 am: കർഷകർക്ക് വേണ്ടി റീട്ടെയിലായി മിതമായ നിരക്കിൽ സൗരോർജ്ജം വാങ്ങുന്നതിന് സംസ്ഥാന സർക്കാരുകൾക്ക് സഹായം നൽകും.

11.22am: കാർഷിക മേഖലയിൽ ഡിജിറ്റലൈസേഷൻ ശക്തിപ്പെടുത്തും.

11.21 am: കാർഷിക മേഖലയ്ക്ക് അടുത്ത സാമ്പത്തിക 11 ലക്ഷം കോടിയുടെ സാമ്പത്തിക സഹായം

11.20 am: ബാംബൂ മേഖലയ്ക്ക് 1290 കോടിയുടെ പ്രത്യേക പദ്ധതി.

11.19 am: ഭക്ഷ്യ സംസ്കരണ മേഖലയിൽ 8 ശതമാനത്തിലേറെയാണ് വളർച്ച. ഇതിനെ ഒന്നുകൂടി ഊർജ്ജിതമാക്കാൻ ഇടപെടും. ഉള്ളി, ഉരുളക്കിഴങ്ങ് എന്നിവയുടെ ആവശ്യം മുൻനിർത്തി ഇവയുടെ ഉൽപ്പാദനം, സംസ്കരണം, ശേഖരണം വിതരണം എന്നിവയ്ക്കായി ഓപ്പറേഷൻ ഗ്രീൻ അലോക്കേഷന് വേണ്ടി 500 കോടി മുതൽമുടക്കും.

11.18 am: അഗ്രി മാർക്കറ്റുകൾക്കായി 2000 കോടി നീക്കിവയ്ക്കും. വിളകൾക്ക് 50 ശതമാനം താങ്ങുവില ഉറപ്പാക്കും.

11.17 am: രാഷ്ട്രീയമായ തിരിച്ചടികളെ കുറിച്ച് ആകുലപ്പെടാതെ ആത്മാർത്ഥമായാണ് ഈ സർക്കാർ പ്രവർത്തിക്കുന്നതെന്ന് കേന്ദ്ര ധനമന്ത്രി അരുൺ ജെയ്റ്റ്‌ലി.

11.16 am: ജെയ്റ്റ്‌ലിയുടെ വാദങ്ങളെ പരിഹസിച്ച് പ്രതിപക്ഷത്തിന്റെ കമന്റ്. കർഷകരുടെ വരുമാനം വർദ്ധിച്ചെന്ന് പറഞ്ഞതാണ് പ്രതിപക്ഷത്തെ പ്രകോപിപ്പിച്ചത്.

11.15 am: കർഷകരോടും സാധാരണക്കാരോടും ഉത്തരവാദിത്തം പുലർത്തുന്ന സർക്കാരാണിതെന്ന് അരുൺ ജെയ്റ്റ്‌ലി. വിളകൾക്ക് മികച്ച വില ഉറപ്പുവരുത്താനുളള പദ്ധതികൾ ഫലം കണ്ടുവെന്നും ഉയർന്ന വരുമാന വർദ്ധനവ് കർഷകർക്ക് ഉണ്ടായെന്നും ധനമന്ത്രി അരുൺ ജെയ്റ്റ്‌ലി.

11.13 am: വിദേശ നിക്ഷേപം വർദ്ധിച്ചുവെന്നും ലോകത്തെ ഏഴാമത്തെ സാമ്പത്തിക ശക്തിയായി ഇന്ത്യ വളർന്നുവെന്നും ധനമന്ത്രി.

11.10 am: ഈ വർഷത്തെ ബജറ്റ് രാജ്യത്തെ കർഷകരെയും സാധാരണക്കാരെയും പുരോഗതിയിലേക്ക് നയിക്കാൻ ലക്ഷ്യമിട്ടുളളതാണ്. കൃഷിക്കും വിദ്യാഭ്യാസത്തിനും വികസനത്തിനും ഊന്നൽ നൽകും.

11.07 am: അടുത്ത സാമ്പത്തിക വർഷത്തിൽ 7.4 ശതമാനം സാമ്പത്തിക വളർച്ച സാധ്യമാകുമെന്ന് പ്രതീക്ഷിക്കുന്നതായും ധനമന്ത്രിയുടെ പ്രസംഗം.

11.05 am: ഡിമോണിറ്റൈസേഷൻ പണ വിനിമയ നിരക്കിൽ വലിയ കുറവു വരുത്തിയെന്നും ഡിജിറ്റൽ പണമിടപാടുകൾക്ക് സഹായിച്ചുവെന്നും ധനമന്ത്രി. ചരക്ക് സേവന നികുതി രാജ്യത്തെ സാമ്പത്തിക വളർച്ചയ്ക്ക് ശക്തിപകർന്നെന്നും ധനമന്ത്രി.

11.03 am: സ്പീക്കർ സുമിത്ര മഹാജൻ ധനമന്ത്രി അരുൺ ജെയ്റ്റ്‌ലിയെ ബജറ്റ് അവതരിപ്പിക്കാൻ ക്ഷണിച്ചു.

11.00 am: പാർലമെന്റിൽ സഭാ നടപടികൾക്ക് തുടക്കം. സ്പീക്കർ സുമിത്ര മഹാജൻ സംസാരിക്കുന്നു.

10.50 am: പ്രധാനമന്ത്രി നരേന്ദ്ര മോദി പാർലമെന്റിലെത്തി. കേന്ദ്രമന്ത്രിമാരായ സ്മൃതി ഇറാനി, രാം വിലാസ് പാസ്വാൻ എന്നിവരും പ്രധാനമന്ത്രിക്കൊപ്പം.

10.24 am: ബജറ്റിന് മുന്നോടിയായുളള കേന്ദ്ര മന്ത്രിസഭയോഗത്തിന് തുടക്കം. പാർലമെന്റിൽ ബജറ്റ് അവതരിപ്പിക്കുന്നതിന് തൊട്ട് മുൻപായാണ് മന്ത്രിസഭ യോഗം ചേർന്നത്.

10.16 am: കേന്ദ്ര ബജറ്റിന് മുൻപ് അരുൺ ജെയ്റ്റ്‌ലിക്കും എൻഡിഎ സർക്കാരിനും എതിരെ സീതാറാം യെച്ചൂരിയുടെ ട്വീറ്റ്. “ഈ സർക്കാരിന് കീഴിൽ തൊഴിലില്ലായ്മ ഉയർന്നു എന്നതിനെ ഒരു വ്യാജ വാഗ്ദാനത്തിനും തള്ളക്കളയാനാകില്ല”, ട്വീറ്റിൽ പറയുന്നു.

9.55 am: അരുൺ ജെയ്‌റ്റ്‌ലി പാർലമെന്റിലെത്തി.

9.50 am: അരുൺ ജെയ്‌റ്റ്‌ലി പാർലമെന്റിലേക്ക്.

9.42 am: രാഷ്ട്രപതി ഭവനിൽ ധനമന്ത്രിക്കും സംഘത്തിനും രാഷ്ട്രപതിയുടെ ഊഷ്‌മള സ്വീകരണം.

9.20 am: ധനമന്ത്രി അരുൺ ജെയ്‌റ്റ്‌ലി രാഷ്ട്രപതി ഭവനിലേക്ക്. ബജറ്റ് അവതരണത്തിന് മുൻപ് രാഷ്ട്രപതി രാംനാഥ് കോവിന്ദിനെ സന്ദർശിക്കുന്നു.

Get Malayalam News and latest news update from India and around the world. Stay updated with today's latest News news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ