'ബിജെപി തകര്‍ത്ത മണിപ്പൂര്‍ കോണ്‍ഗ്രസ് വീണ്ടെടുക്കും'; പ്രധാനമന്ത്രിയെ പ്രതിക്കൂട്ടിലാക്കി രാഹുല്‍

വയനാട്: മണിപ്പൂരില്‍ നടപ്പാക്കിയതുപോലെ ഇന്ത്യയേയും വിഭജിക്കാനുള്ള ശ്രമമാണ് ബിജെപി നടത്തുന്നതെന്ന് കോണ്‍ഗ്രസ് നേതാവും വയനാട് എംപിയുമായ രാഹുല്‍ ഗാന്ധി. എം പി സ്ഥാനം തിരികെ ലഭിച്ചതിന് ശേഷം ആദ്യമായി വയനാട്ടിലെത്തിയപ്പോഴായിരുന്നു രാഹുലിന്റെ വാക്കുകള്‍.

"ഇന്ത്യയൊരു കുടുംബമാണ്, കുടുംബത്തെ ഭിന്നിപ്പിക്കുക എന്ന ലക്ഷ്യമാണ് ബിജെപിക്കുള്ളത്. മണിപ്പൂരും ഒരു കുടുംബമായിരുന്നു, അവര്‍ അത് തകര്‍ക്കാന്‍ ശ്രമിച്ചു. ജനങ്ങള്‍ തമ്മിലുള്ള ബന്ധം അവര്‍ നശിപ്പിക്കുന്നു. അവര്‍ തകര്‍ക്കാന്‍ ശ്രമിച്ചത് ഞങ്ങള്‍ പടുത്തുയര്‍ത്തു. മനുഷ്യരെ ഒന്നിപ്പിക്കും, കുടുംബം കൂടുതല്‍ ശക്തമാക്കും. മണിപ്പൂരിനെ ഭിന്നിപ്പിച്ചെന്നും തകര്‍ത്തെന്നുമാണ് ബിജെപി കരുതുന്നത്. മണിപ്പൂരിനെ ഞങ്ങള്‍ വീണ്ടെടുക്കും. മണിപ്പൂര്‍ ചാമ്പലാക്കാന്‍ നിങ്ങള്‍ക്ക് രണ്ട് മാസം വേണ്ടി വന്നു. പക്ഷെ മണിപ്പൂരില്‍ വീണ്ടും സമാധാനം കൊണ്ടുവരാന്‍ ഞങ്ങള്‍ക്ക് അഞ്ച് വര്‍ഷം വേണ്ടി വന്നേക്കാം. എങ്കിലും ഞങ്ങള്‍ അത് സാധ്യമാക്കും. ഇത് ബിജെപിയും കോണ്‍ഗ്രസും തമ്മിലുള്ള പോരാട്ടമാണ്," രാഹുല്‍ വ്യക്തമാക്കി.

"മണിപ്പൂരില്‍ എല്ലായിടത്തും കൊലപാതകവും ബലാത്സംഗവും നടക്കുന്നു. പ്രധാനമന്ത്രി രണ്ട് മണിക്കൂറും 13 മിനുറ്റും പാര്‍ലമെന്റില്‍ സംസാരിച്ചു. എന്നാല്‍ മണിപ്പൂരിനെക്കുറിഞ്ഞ് പറഞ്ഞത് കേവലം രണ്ട് മിനുറ്റ് മാത്രമായിരുന്നു. മോദിയും കേന്ദ്ര മന്ത്രിമാരും തമാശ പറയുകയും ചിരിക്കുകയും ആനന്ദിക്കുകയും ചെയ്തു", രാഹുല്‍ കൂട്ടിച്ചേര്‍ത്തു.

ഇന്ത്യയെന്ന ആശയം മണിപ്പൂരില്‍ കൊലചെയ്യപ്പെട്ടെന്നും രാഹുല്‍ പറഞ്ഞു. "ഇന്ത്യ എന്ന ആശയം പ്രതിനിധീകരിക്കുന്നത് ജനങ്ങള്‍ക്കിടയിലെ സമാധാനനിലയായിട്ടാണ്. അവിടെ സംഘര്‍ഷവും വെറുപ്പും കൊലപാതകവും ബലാത്സംഗവും ഉണ്ടെങ്കില്‍ അത് ഇന്ത്യയല്ല," രാഹുല്‍ വ്യക്തമാക്കി.

"മണിപ്പൂരില്‍ ആയിരങ്ങളാണ് കഷ്ടതകള്‍ അനുഭവിക്കുന്നത്. വീടുകള്‍ കത്തിച്ചാമ്പലാക്കി, സഹോദരിമാര്‍ ബലാത്സംഗത്തിനിരകളായി, പലരുടേയും സഹോദരന്മാരും പിതാക്കന്മാരും കൊലചെയ്യപ്പെട്ടു. ആരോ മണിപ്പൂരിന് മുകളിലേക്ക് മണ്ണെണ്ണ ഒഴിച്ചതിന് ശേഷം തീയിട്ട പോലെയാണ് സാഹചര്യം," രാഹുല്‍ ചൂണ്ടിക്കാണിച്ചു.