ഇൻഡോറിലെ മലിന ജലത്തെപ്പറ്റി ഉയർന്നത് നിരവധി പരാതികൾ; ഉദ്യോഗസ്ഥരുടെ അനാസ്ഥയിൽ പൊലിഞ്ഞത് നിരവധി ജീവനുകൾ

ഇൻഡോർ: മധ്യപ്രദേശിലെ ഇൻഡോറിൽ മലിനജലം കുടിച്ച് ആളുകൾ മരിക്കാനിടയായ സംഭവത്തിന് മാസങ്ങൾക്ക് മുൻപേ അധികൃതർക്ക് മുന്നറിയിപ്പുകൾ ലഭിച്ചിരുന്നതായി റിപ്പോർട്ട്. കുടിവെള്ളത്തിൽ ആസിഡിന്റെ അംശവും മലിനജലവും രൂക്ഷമായ ദുർഗന്ധവും അനുഭവപ്പെട്ടതിനെത്തുടർന്ന് പ്രദേശവാസികൾ നിരവധി തവണ പരാതി നൽകിയിരുന്നെങ്കിലും, അധികൃതരുടെ ഭാഗത്തുനിന്നുണ്ടായ ഗുരുതരമായ വീഴ്ചയാണ് ദുരന്തത്തിന് വഴിവെച്ചത്.

Also Read:ഇന്‍ഡോറില്‍ മലിനജലം കുടിച്ച് മരിച്ചവരുടെ എണ്ണം 13ആയി; മരിച്ചവരില്‍ അഞ്ച് മാസം പ്രായമുള്ള കുഞ്ഞും

ഭഗീരഥപുരയിലെ വാർഡ് 11-ൽ കുടിവെള്ളത്തിൽ മലിനജലം കലർന്നതിനെ തുടർന്നുണ്ടായ വിഷബാധയിൽ ഔദ്യോഗിക കണക്കുകൾ പ്രകാരം നാല് പേർ മരിക്കുകയും 200-ലധികം പേർ ചികിത്സ തേടുകയും ചെയ്തു. എന്നാൽ, മരണസംഖ്യ എട്ടാണെന്നും റിപ്പോർട്ടുകളുണ്ട്.

ദുരന്തം നടക്കുന്നതിന് രണ്ട് മാസം മുൻപ് തന്നെ മേയറുടെ ഹെൽപ്പ് ലൈനിൽ ആദ്യ പരാതി ലഭിച്ചിരുന്നു. ഒക്ടോബർ 15-ന് പ്രദേശത്തെ ക്ഷേത്രത്തിനടുത്തുള്ള കിണർ വെള്ളത്തിൽ ഓവുചാൽ വെള്ളം കലരുന്നതായി ദിനേഷ് ഭാരതി വർമ്മ എന്നയാൾ പരാതി നൽകിയിരുന്നു. നവംബർ പകുതിയോടെ, മലിനജലത്തിൽ ആസിഡിന്റെ അംശമുണ്ടെന്ന് കാണിച്ച് മറ്റൊരു താമസക്കാരിയും പരാതിപ്പെട്ടു.

Also Read:ലോറൻസ് ബിഷ്ണോയി സംഘത്തിന്റെ വൻ പണമിടപാട് റാക്കറ്റ് തകർത്തു; 91 ലക്ഷം രൂപ പിടിച്ചെടുത്തു, അഞ്ച് പേർ പിടിയിൽ

ഡിസംബറോടെ സ്ഥിതിഗതികൾ വഷളായി. ഡിസംബർ 18-ന് നർമ്മദ ജലവിതരണത്തിൽ രൂക്ഷമായ ദുർഗന്ധം അനുഭവപ്പെട്ടതായി പരാതികൾ ഉയർന്നു. ഡിസംബർ 28-ഓടെ വാർഡിലെ 90 ശതമാനം ആളുകളും ഛർദ്ദി, വയറിളക്കം, നിർജ്ജലീകരണം തുടങ്ങിയ രോഗലക്ഷണങ്ങളാൽ വലഞ്ഞു. ഡിസംബർ 29-നാണ് ആദ്യ മരണം റിപ്പോർട്ട് ചെയ്യുന്നത്.

ഉദ്യോഗസ്ഥ അനാസ്ഥയും കാലതാമസവും പുതിയ നർമ്മദ പൈപ്പ് ലൈൻ സ്ഥാപിക്കുന്നതിനായി 2024 നവംബർ 12-ന് ഫയൽ തയ്യാറാക്കിയിരുന്നുവെങ്കിലും നടപടികൾ വൈകി. 2025 ജൂലൈ 30-നാണ് ടെൻഡർ വിളിച്ചത്. ഒടുവിൽ മരണങ്ങൾ റിപ്പോർട്ട് ചെയ്യാൻ തുടങ്ങിയ 2025 ഡിസംബർ 26-നാണ് പദ്ധതിയുടെ വർക്ക് ഓർഡർ പാസാക്കിയത്. ഫയലുകൾ ഏഴ് മാസത്തോളം അനാവശ്യമായി പിടിച്ചുവെച്ചതാണ് ദുരന്തത്തിന് ആക്കം കൂട്ടിയതെന്ന് പ്രദേശത്തെ കൗൺസിലർ ആരോപിച്ചു.

Also Read:ആരവല്ലി കുന്നുകളുടെ നിർവചനത്തിൽ സുപ്രീം കോടതി ഇടപെടൽ; പഠനത്തിന് വിദഗ്ധ സമിതിയെ നിയോഗിച്ചു

സംഭവത്തിൽ കൃത്യവിലോപം ആരോപിച്ച് സോൺ 4-ന്റെ ചുമതലയുള്ള അസിസ്റ്റന്റ് എൻജിനീയറെ സസ്പെൻഡ് ചെയ്തിട്ടുണ്ട്. എന്നാൽ, തനിക്ക് മൂന്ന് സോണുകളുടെ ചുമതലയുണ്ടെന്നും ജീവനക്കാരുടെ കുറവും മേലുദ്യോഗസ്ഥരുടെ അറിവോടെയുണ്ടായ കാലതാമസവുമാണ് പ്രശ്നങ്ങൾക്ക് കാരണമെന്നുമാണ് അദ്ദേഹത്തിന്റെ വിശദീകരണം.

ദുരന്തകാരണം കുടിവെള്ള പൈപ്പ് ലൈനിന് മുകളിൽ, സേഫ്റ്റി ടാങ്കില്ലാതെ നിർമ്മിച്ച ശൗചാലയത്തിൽ നിന്നുള്ള മാലിന്യം പൈപ്പിലെ വിള്ളലിലൂടെ കുടിവെള്ളത്തിൽ കലർന്നതാണ് വിഷബാധയ്ക്ക് കാരണമായതെന്ന് പ്രാഥമിക അന്വേഷണത്തിൽ കണ്ടെത്തി. സംഭവസ്ഥലത്ത് നിന്നുള്ള സാമ്പിളുകളിൽ രോഗഹേതുവായ അണുക്കളുടെ സാന്നിധ്യം സ്ഥിരീകരിച്ചിട്ടുണ്ട്.

Read More:ഉന്നാവ് പീഡനക്കേസ്: സെൻഗാറിന് തിരിച്ചടി, ശിക്ഷ മരവിപ്പിച്ച ഉത്തരവിന് സുപ്രീം കോടതി സ്റ്റേ