നികുതി വെട്ടിപ്പ്: നികുതി മുഴുവനായും അടയ്ക്കാം, അന്വേഷണങ്ങളുമായി സഹകരിക്കുമെന്ന് ബിബിസി

ന്യൂഡല്‍ഹി: ബ്രിട്ടീഷ് ബ്രോഡ്കാസ്റ്റിംഗ് കോര്‍പ്പറേഷന്‍ (ബിബിസി) കഴിഞ്ഞ കുറച്ച് വര്‍ഷങ്ങളായി ഇന്ത്യയില്‍ വരുമാനം കുറവാണെന്ന് കാണിച്ച് കുറച്ച് നികുതി അടയ്ക്കാന്‍ ശ്രമിച്ചതായി ആദായനികുതി വകുപ്പിനെ അറിയിച്ചതായി സര്‍ക്കാര്‍ ഉദ്യോഗസ്ഥര്‍ പറഞ്ഞു. അതേസമയം ബിബിസി നികുതി അടച്ച് മൂല്യനിര്‍ണ്ണയ പ്രക്രിയ അവസാന ഘട്ടത്തിലെത്തിയ ശേഷമെ ബിബിസിയുടെ കത്തിന്റെ ഉദ്ദേശ്യം അറിയാനാകുവെന്നും ഉദ്യോഗസ്ഥര്‍ പറഞ്ഞു.

നികുതി വെട്ടിപ്പ് ആരോപിച്ച് ഫെബ്രുവരിയിലാണ് ബിബിസിയുടെ ഡല്‍ഹിയിലെയും മുംബൈയിലെയും ഓഫീസുകളില്‍ ആദായ നികുതി വകുപ്പ് പരിശോധന നടത്തിയത്. പരിശോധനയില്‍ വരുമാനം വകമാറ്റിയതുള്‍പ്പെടെ നിരവധി പൊരുത്തക്കേടുകള്‍ കണ്ടെത്തിയതായി അധികൃതര്‍ അറിയിച്ചിരുന്നു. ''ഇന്ത്യന്‍ നികുതി അധികാരികളുടെ അന്വേഷണങ്ങളുമായി ബിബിസി പൂര്‍ണ്ണമായി സഹകരിക്കുന്നു, അത് തുടരും. പ്രക്രിയ നടന്നുകൊണ്ടിരിക്കുന്നു, അവസാനിക്കാന്‍ സമയമെടുക്കും. തീര്‍ച്ചയായും ബിബിസി അതിന്റെ നികുതി ബാധ്യതകളെ വളരെ ഗൗരവത്തോടെയാണ് കാണുന്നത്. ഇന്ത്യന്‍ എക്സ്പ്രസുമായി ബന്ധപ്പെട്ടപ്പോള്‍, ബിബിസി വക്താവ് പറഞ്ഞു. സെന്‍ട്രല്‍ ബോര്‍ഡ് ഓഫ് ഡയറക്ട് ടാക്സിനോട് (സിബിഡിറ്റി) ഇത് സംബന്ധിച്ചുള്ള ചോദ്യങ്ങളില്‍ നികുതി വകുപ്പ് വ്യക്തിഗത കേസുകളില്‍ അഭിപ്രായം പറയുന്നില്ലെന്ന് ഒരു ഉദ്യോഗസ്ഥന്‍ പറഞ്ഞു.

ഫെബ്രുവരിയില്‍, ആദായനികുതി വകുപ്പ് പുറത്തിറക്കിയ പ്രസ്താവനയില്‍ ബിബിസിയുടെ പേര് പരാമര്‍ശിക്കാതെ, ''ജീവനക്കാരുടെ മൊഴി, ഡിജിറ്റല്‍ തെളിവുകള്‍, രേഖകള്‍ എന്നിവയിലൂടെ നിര്‍ണായകമായ തെളിവുകള്‍ കണ്ടെത്തുന്നതിന് സര്‍വേകള്‍ കാരണമായെന്നും ഇവ പരിശോധിക്കുകയാണെന്നും അറിയിച്ചിരുന്നു.

'വിവിധ ഇന്ത്യന്‍ ഭാഷകളില്‍ (ഇംഗ്ലീഷ് ഒഴികെ) ഉള്ളടക്കത്തിന്റെ ഗണ്യമായ ഉപഭോഗം ഉണ്ടായിരുന്നിട്ടും, വിവിധ ഗ്രൂപ്പ് സ്ഥാപനങ്ങള്‍ കാണിക്കുന്ന വരുമാനം / ലാഭം ഇന്ത്യയിലെ പ്രവര്‍ത്തനങ്ങളുടെ സ്‌കെയിലിന് ആനുപാതികമല്ലെന്ന് സര്‍വേ വെളിപ്പെടുത്തി. 'സര്‍വേയ്ക്കിടെ, സ്ഥാപനത്തിന്റെ പ്രവര്‍ത്തനവുമായി ബന്ധപ്പെട്ട നിരവധി തെളിവുകള്‍ വകുപ്പ് ശേഖരിച്ചു, ഇത് ഗ്രൂപ്പിന്റെ വിദേശ സ്ഥാപനങ്ങള്‍ ഇന്ത്യയിലെ വരുമാനമായി വെളിപ്പെടുത്താത്ത ചില പണമടയ്ക്കലുകള്‍ക്ക് നികുതി അടച്ചിട്ടില്ലെന്ന് സൂചിപ്പിക്കുന്നു,' പ്രസ്താവനയില്‍ പറഞ്ഞു.

2002ലെ ഗുജറാത്ത് കലാപത്തെക്കുറിച്ച് ബ്രിട്ടീഷ് ബ്രോഡ്കാസ്റ്റര്‍ ജനുവരി 17ന് ഡോക്യുമെന്ററി പുറത്തിറക്കി ആഴ്ചകള്‍ക്ക് ശേഷമാണ് ബിബിസിക്കെതിരെ ആദായ നികുതി വകുപ്പിന്റെ നടപടി. ജനുവരി 20 ന്, ഡോക്യുമെന്ററി പങ്കിടുന്ന ലിങ്കുകള്‍ നീക്കം ചെയ്യാന്‍ യൂട്യൂബിനും ട്വിറ്ററിനും കേന്ദ്ര സര്‍ക്കാര്‍ ഉത്തരവിട്ടിരുന്നു. ഡോക്യുമെന്ററി 'ഇന്ത്യയുടെ പരമാധികാരത്തെയും അഖണ്ഡതയെയും തുരങ്കം വയ്ക്കുന്നു' എന്നും രാജ്യത്തിന്റെ ' വിദേശ രാജ്യങ്ങളുമായുള്ള സൗഹൃദ ബന്ധങ്ങളെ പ്രതികൂലമായി ബാധിക്കാന്‍' സാധ്യതയുണ്ടെന്നും ഉദ്യോഗസ്ഥര്‍ പറഞ്ഞു.