ന്യൂഡല്‍ഹി: വിദേശ അഭിഭാഷകര്‍ക്കും നിയമ സ്ഥാപനങ്ങള്‍ക്കും ഇന്ത്യയില്‍ പ്രാക്ടീസ് അനുവദിച്ച് ബാര്‍ കൗണ്‍സില്‍ ഓഫ് ഇന്ത്യ (ബിസിഐ). നേരത്തെ ഈ നീക്കത്തെ എതിര്‍ത്തിരുന്ന ബിസിഐ വിദേശ അഭിഭാഷകരുടെയും ഇന്ത്യയിലെ വിദേശ നിയമ സ്ഥാപനങ്ങളുടെയും രജിസ്‌ട്രേഷന്‍ സംബന്ധിച്ച നിയമങ്ങള്‍ പുറത്തിറക്കി.
‘നിയമപ്രകാരം രജിസ്റ്റര്‍ ചെയ്തിട്ടുള്ള ഒരു വിദേശ അഭിഭാഷകന് ഇന്ത്യയില്‍ നിയമപരമല്ലാത്ത കാര്യങ്ങളില്‍ മാത്രം പ്രാക്ടീസ് ചെയ്യാന്‍ അര്‍ഹതയുണ്ട്…’ ഇതിനര്‍ത്ഥം വിദേശ അഭിഭാഷകര്‍ക്കും നിയമ സ്ഥാപനങ്ങള്‍ക്കും കോടതികളില്‍ ഹാജരാകാന്‍ കഴിയില്ല, ബിസിഐയില്‍ രജിസ്റ്റര്‍ ചെയ്തുകൊണ്ട് മാത്രമേ നിയമോപദേശം നല്‍കാന്‍ കഴിയൂ.
വിദേശ അഭിഭാഷകരെയോ വിദേശ നിയമ സ്ഥാപനങ്ങളെയോ ഏതെങ്കിലും കോടതികളിലോ ട്രൈബ്യൂണലുകളിലോ മറ്റ് നിയമപരമായ അല്ലെങ്കില്‍ റെഗുലേറ്ററി അതോറിറ്റികളിലോ ഹാജരാകാന്‍ അനുവദിക്കില്ല. സംയുക്ത സംരംഭങ്ങള്‍, ലയനങ്ങള്‍, ഏറ്റെടുക്കലുകള്‍, ബൗദ്ധിക സ്വത്തവകാശ വിഷയങ്ങള്‍, കരാറുകളുടെ കരട് തയ്യാറാക്കല്‍, മറ്റ് അനുബന്ധ കാര്യങ്ങള്‍ എന്നീ ഇടപാട് ജോലികള്‍ / കോര്‍പ്പറേറ്റ് ജോലികളില്‍ പരസ്പരാടിസ്ഥാനത്തില്‍ പ്രാക്ടീസ് ചെയ്യാന്‍ അവരെ അനുവദിക്കുമെന്ന് വിജ്ഞാപനത്തില്‍ പറയുന്നു.
ഒരു വിദേശ അഭിഭാഷകന്റെയോ വിദേശ നിയമ സ്ഥാപനത്തിന്റെയോ നിയമപരിശീലന മേഖലകള്‍ ബിസിഐ രൂപീകരിക്കും. ആവശ്യമെങ്കില്‍ ബാര്‍ കൗണ്‍സില്‍ ഓഫ് ഇന്ത്യക്ക് സര്‍ക്കാരുമായി കൂടിയാലോചിക്കാം. ഇന്ത്യയില്‍ രജിസ്റ്റര്‍ ചെയ്തിട്ടുള്ള ഏതെങ്കിലും പ്രത്യേക വിദേശ രാജ്യത്തെ വിദേശ അഭിഭാഷകരുടെയോ വിദേശ നിയമ സ്ഥാപനങ്ങളുടെയോ എണ്ണം ആനുപാതികമല്ലെങ്കില്‍, നിയമങ്ങള്‍ പ്രകാരം ഏതെങ്കിലും വിദേശ അഭിഭാഷകനെയോ നിയമ സ്ഥാപനത്തെയോ രജിസ്ട്രേഷൻ ചെയ്യാന്‍ ബിസിഐ വിസമ്മതിച്ചേക്കാം.
