360 രൂപയുടെ കടത്തെച്ചൊല്ലി മർദ്ദനവും ആൾക്കൂട്ട വിചാരണയും; ബംഗ്ലാദേശിൽ ഹിന്ദു യുവാവ് ആത്മഹത്യ ചെയ്തു

ധാക്ക: ബംഗ്ലാദേശിൽ വെറും 500 ടാക്കയുടെ (ഏകദേശം 360 ഇന്ത്യൻ രൂപ) കടബാധ്യതയെച്ചൊല്ലി ഒരുകൂട്ടം ആളുകൾ പരസ്യമായി അപമാനിക്കുകയും ക്രൂരമായി മർദ്ദിക്കുകയും ചെയ്തതിന് പിന്നാലെ ഹിന്ദു യുവാവ് മരിച്ചു. ബംഗ്ലാദേശിലെ ദിനാജ്പൂർ ജില്ലയിൽ വെള്ളിയാഴ്ചയാണ് ദാരുണമായ ഈ സംഭവം നടന്നത്.

Also Read:ബംഗ്ലാദേശിൽ ഹിന്ദു യുവാവിനെ കുത്തിക്കൊലപ്പെടുത്തി; 24 മണിക്കൂറിനിടെ രണ്ടാമത്തെ കൊലപാതകം

ദേബേന്ദ്രനാഥ് എന്ന വ്യക്തിയാണ് മരിച്ചത്. കടം തിരിച്ചടയ്ക്കുന്നതിൽ വീഴ്ച വരുത്തിയെന്ന് ആരോപിച്ച് പ്രാദേശിക സ്വാധീനമുള്ള ചിലരും പണം നൽകാനുള്ളവരും ചേർന്ന് ഇദ്ദേഹത്തെ പിടികൂടുകയായിരുന്നു. ദേബേന്ദ്രനാഥിനെ ക്രൂരമായി മർദ്ദിച്ചതിന് പുറമെ, കഴുത്തിൽ ചെരുപ്പുമാല അണിയിച്ച് ഗ്രാമത്തിലൂടെ നടത്തിച്ച് പരസ്യമായി അവഹേളിച്ചതായും റിപ്പോർട്ടുകൾ വ്യക്തമാക്കുന്നു.

Also Read:ബംഗ്ലാദേശിൽ ഹിന്ദു വ്യവസായിക്ക് കുത്തേറ്റു; പെട്രോളൊഴിച്ച് തീവെച്ച് കൊല്ലാനും ശ്രമം

ഈ കടുത്ത അപമാനത്തിന് പിന്നാലെ ദേബേന്ദ്രനാഥിനെ വീട്ടിനുള്ളിൽ മരിച്ച നിലയിൽ കണ്ടെത്തുകയായിരുന്നു. പരസ്യമായ വിചാരണയിലും അവഹേളനത്തിലും മനംനൊന്ത് അദ്ദേഹം ആത്മഹത്യ ചെയ്തതാണെന്ന് ബന്ധുക്കൾ ആരോപിച്ചു. സംഭവത്തെത്തുടർന്ന് പ്രദേശത്ത് വലിയ പ്രതിഷേധം ഉയർന്നിട്ടുണ്ട്.

സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. കുറ്റക്കാർക്കെതിരെ കർശന നടപടി സ്വീകരിക്കുമെന്ന് അധികൃതർ ഉറപ്പുനൽകി. ബംഗ്ലാദേശിൽ അടുത്ത കാലത്തായി ന്യൂനപക്ഷ വിഭാഗങ്ങൾക്കെതിരെ വർദ്ധിച്ചുവരുന്ന അക്രമങ്ങളുടെയും മനുഷ്യാവകാശ ലംഘനങ്ങളുടെയും പശ്ചാത്തലത്തിൽ ഈ സംഭവം അന്താരാഷ്ട്ര തലത്തിലും ശ്രദ്ധ നേടുന്നുണ്ട്.

Also Read:ട്രംപിന്റെ താരിഫ് മുതൽ ബംഗ്ലാദേശിലെ സംഘർഷങ്ങൾ വരെ; 2026 ൽ ഇന്ത്യയുടെ വിദേശ ബന്ധങ്ങളിൽ കാത്തിരിക്കുന്നത് എന്തെല്ലാം ?

ബംഗ്ലാദേശിലെ ന്യൂനപക്ഷങ്ങളുടെ സുരക്ഷ ഉറപ്പാക്കണമെന്ന് ആവശ്യപ്പെട്ട് വിവിധ ഹിന്ദു സംഘടനകൾ പ്രതിഷേധവുമായി രംഗത്തെത്തിയിട്ടുണ്ട്. മരിച്ച ദേബേന്ദ്രനാഥിന്റെ കുടുംബത്തിന് നീതി ലഭ്യമാക്കണമെന്നും കുറ്റവാളികളെ ഉടൻ നിയമത്തിന് മുന്നിൽ കൊണ്ടുവരണമെന്നും അവർ ആവശ്യപ്പെട്ടു.

Read More:വെനസ്വേലയിലെ യുഎസ് വ്യോമാക്രമണത്തിൽ 40 മരണം; അപകടകരമായ കീഴ്‌വഴക്കമെന്ന് യുഎൻ