പട്‌ന: മാധ്യമ പ്രവർത്തകനെയും കുടുംബത്തെയും ഭീഷണിപ്പെടുത്തി ‘ജയ്​ ശ്രീ റാം’ വിളിപ്പിച്ചതായി പരാതി. എൻഡിടിവിയിൽ മാധ്യമ പ്രവർത്തകനായ മുന്ന ഭാരതിയെയും കുടുംബത്തെയുമാണ്​ ബജ്​രംഗദൾ പ്രവർത്തകർ ഭീഷണിപ്പെടുത്തി ജയ്​ ശ്രീറാം ​എന്ന് വിളിപ്പിച്ചത്​. കാർ കത്തിക്കുമെന്ന് ഭീഷണിപ്പെടുത്തിയായിരുന്നു പ്രവർത്തകരുടെ പ്രകടനം.

ബിഹാറിലെ വൈശാലി ജില്ലയിലെ കരൺജി ഗ്രാമത്തിലൂടെ കുടംബത്തോടൊപ്പം യാത്ര ചെയ്യു​ന്പോഴായിരുന്നു മാധ്യമപ്രവർത്തകന് ദുരനുഭവമുണ്ടായത്​​. മുസാഫാർപുർ ദേശീയ പാതയിൽ കാർ പ്രവേശിച്ചപ്പോഴായിരുന്നു​ സംഭവം. ദേശീയപാതയിലെ ടോൾ ബുത്തിന്​ സമീപം യാത്രക്കാർക്ക്​ ബുദ്ധിമുട്ടുണ്ടാക്കുന്ന തരത്തിൽ ട്രക്ക്​ പാർക്ക്​ ചെയ്​തിരിക്കുന്നത്​ ചോദ്യം ചെയ്​തപ്പോഴാണ്​ മാധ്യമ പ്രവർത്തകന്​ ദുരനുഭവമുണ്ടായത്​.

​എന്തിനാണ്​ ഇത്തരത്തിൽ തടസമുണ്ടാക്കി ട്രക്ക്​ പാർക്ക്​ ചെയ്​തതെന്ന്​ ചോദിച്ചപ്പോൾ അതിനടുത്തുണ്ടായിരുന്ന യുവാവ്​ ബജ്​രംഗദൾ പ്രവർത്തകരെ ഉപയോഗിച്ച്​ കാർ കത്തിക്കുമെന്ന്​ ഭീഷണിപ്പെടുത്തുകയായിരുന്നു. തുടർന്നാണ്​ നിർബന്ധിച്ച്​ ജയ്​ ശ്രീ റാം വിളിക്കാൻ ആവശ്യപ്പെട്ടതെന്നും മുസ്ലിമായ മുന്ന ഭാരതി പറഞ്ഞു.

ആള്‍ക്കൂട്ട ആക്രമണങ്ങൾ രാജ്യത്ത് അനിയന്ത്രിതമായിരിക്കുന്നുവെന്ന് രാഷ്ട്രപതി പ്രണബ് മുഖര്‍ജി പറഞ്ഞതിന് തൊട്ട് പിന്നാലെയായിരുന്നു ഈ സംഭവം. വരും തലമുറ ഇത്തരം ചെയ്തികളെ ചോദ്യം ചെയ്യുമെന്നും ഈയൊരു സാഹചര്യത്തില്‍ രാജ്യത്തിന്റെ അടിസ്ഥാനമൂല്യങ്ങളെ സംരക്ഷിക്കാന്‍ പ്രത്യേകതാല്‍പര്യം എടുത്തേ മതിയാകൂവെന്നും പ്രണബ് മുഖര്‍ജി പറഞ്ഞിരുന്നു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook