വാദം കേള്‍ക്കാന്‍ ജഡ്ജിയില്ല: അയോധ്യ കേസ് ചൊവ്വാഴ്‍ച്ച പരിഗണിക്കില്ല

ന്യൂഡല്‍ഹി: അയോധ്യ കേസ് സുപ്രീംകോടതി ജനുവരി 29ന് പരിഗണിക്കില്ല. ഭരണഘടനാ ബെഞ്ചിലെ ജസ്റ്റിസ് എസ്.എ ബോബ്‌ഡെ അവധിയിലായതിനെ തുടര്‍ന്നാണിത്. പുതുക്കിയ തീയതി പിന്നീട് സുപ്രീംകോടതി വെബ്‌സൈറ്റില്‍ പ്രസിദ്ധീകരിക്കും.

ജസ്റ്റിസുമാരായ അശോക് ഭൂഷണ്‍, എസ് അബ്ദുല്‍ നസീര്‍ എന്നിവരെ ഉള്‍പ്പെടുത്തി പുനഃസംഘടിപ്പിച്ച അഞ്ചംഗ ബെഞ്ചാണ് ചൊവ്വാഴ്ച കേസ് പരിഗണിക്കാനിരുന്നത്. ചീഫ് ജസ്റ്റിസ് രണ്‍ജന്‍ ഗോഗോയിയുടെ കൂടെ ബോബ്ഡെയും ഡി.വൈ ചന്ദ്രചൂഡും ആണ് വാദം കേള്‍ക്കേണ്ടിയിരുന്നത്. ബെഞ്ചില്‍ അംഗമായിരുന്ന എന്‍.വി രമണയെ നേരത്തേ നീക്കം ചെയ്തിരുന്നു.

ജസ്റ്റിസ് യു.യു ലളിത് കേസില്‍ നിന്നും കഴിഞ്ഞയാഴ്ച്ച പിന്മാറിയിരുന്നു. അയോധ്യയിലെ വിവാദഭൂമി സുന്നി വഖഫ് ബോര്‍ഡിനും നിര്‍മോഹി അഖാഡക്കും രാംലല്ലക്കുമായി വിഭജിച്ചു നല്‍കിയ അലഹബാദ് ഹൈക്കോടതി വിധി ചോദ്യം ചെയ്തുള്ള അപ്പീലുകളാണ് സുപ്രീംകോടതിയിലുള്ളത്.