അയോധ്യ കേസ്: ഭരണഘടനാ ബെഞ്ച് പുന:സംഘടിപ്പിച്ചു, 29 ന് വാദം കേള്‍ക്കും

ന്യൂഡല്‍ഹി: അയോധ്യ കേസ് വാദം കേള്‍ക്കാനുള്ള ഭരണഘടനാ ബെഞ്ച് സുപ്രീം കോടതി പുന:സംഘടിപ്പിച്ചു. കേസ് ജനുവരി 29 ന് വാദം കേള്‍ക്കും. ജസ്റ്റിസ് അശോക് ഭൂഷന്‍, ജസ്റ്റിസ് അബ്ദുള്‍ നസീര്‍ എന്നിവരാണ് ബെഞ്ചിലെ പുതിയ അംഗങ്ങള്‍. അഞ്ചംഗ ബെഞ്ചിലെ മറ്റ് അംഗങ്ങള്‍ ചീഫ് ജസ്റ്റിസ് രഞ്ജന്‍ ഗോഗോയ്, ജസ്റ്റിസ് എസ്എ ബോബ്‌ഡെ, ജസ്റ്റിസ് ഡിവൈ ചന്ദ്രചൂഢ് എന്നിവരാണ്.

ജസ്റ്റിസ് യുയു ലളിതിനും ജസ്റ്റിസ് എന്‍വി രമണക്കും പകരമാണ് രണ്ട് ജഡ്ജിമാരെ പുതുതായി ഉള്‍പ്പെടുത്തിയത്. നേരത്തെ ബെഞ്ചില്‍ നിന്നും യുയു ലളിത് പിന്മാറിയിരുന്നു. ഒക്ടോബറില്‍ വാദം കേള്‍ക്കാനിരുന്നത് ജനുവരിയിലേക്ക് മാറ്റി വെക്കുകയായിരുന്നു. ജനുവരി നാലിന് പുതിയ ബെഞ്ച് രൂപീകരിക്കുമെന്ന് ചീഫ് ജസ്റ്റിസ് അറിയിച്ചിരുന്നു.

നേരത്തെ, കേസില്‍ യുപി കല്യാണന്‍ സിങിന് വേണ്ടി യുയു ലളിത് ഹാജരായിരുന്നു. ഇത് അഭിഭാഷകന്‍ രാജീവ് ധവാന്‍ ചൂണ്ടിക്കാണിച്ചതോടെയാണ് അദ്ദേഹം പിന്മാറിയത്. കേസുമായി ബന്ധപ്പെട്ട് 16 ഹര്‍ജികളാണ് കോടതിയിലുള്ളത്. 15800 പേജ് സാക്ഷിമൊഴികളും 15 ട്രങ്ക്‌പെട്ടികള്‍ നിറയെ രേഖകളുമടക്കം പുതിയ ബെഞ്ച് പരിഗണിക്കും.