ഗുവാഹതി: അസമിലെ ദേശീയ പൗരത്വ രജിസ്റ്റർ (എൻആർസി) പട്ടികയിൽ നിന്ന് ‘അനർഹരുടെ’ പേരുകൾ നീക്കം ചെയ്യാൻ ഉത്തരവിട്ട് അധികൃതർ. ‘കൃത്യമായ’ പരത്വ പട്ടിക രജിസ്റ്റർ ലഭിക്കാൻ പട്ടികയിലെ എല്ലാ പേരുകളുടെയും 10-20 ശതമാനം വരെ പുനപരിശോധന ആവശ്യമാണെന്ന സംസ്ഥാന സർക്കാരിന്റെ സ്ഥിരം നിലപാടിന്റെ ഭാഗമാണിത്. സുപ്രീംകോടതിയുടെ നേരിട്ടുള്ള മേൽനോട്ടത്തിൽ കഴിഞ്ഞ ഓഗസ്റ്റിൽ പ്രസിദ്ധീകരിച്ച എൻ‌ആർ‌സിയിൽ 3.3 കോടി അപേക്ഷകരിൽ 19 ലക്ഷം പേരെ ഒഴിവാക്കിയിരുന്നു.
ഒക്ടോബർ 13 ന് എല്ലാ ഡിസിമാർക്കും എൻ‌ആർ‌സിയുടെ സ്റ്റേറ്റ് കോർഡിനേറ്റർ ഹിതേഷ് ദേവ് ശർമ്മ അയച്ച കത്തിൽ പേരുകൾ നീക്കം ചെയ്യുന്നതിനുള്ള നിർദേശങ്ങളുണ്ട്. “യോഗ്യതയില്ലാത്ത വ്യക്തികളുടെ ചില പേരുകൾ എൻ‌ആർ‌സിയിൽ ഇടം പിടിച്ചു,” എന്ന് കത്തിൽ പറയുന്നു. ഫോറിനേഴ്സ് ട്രൈബ്യൂണലുകൾ (ഡിഎഫ്) വിദേശികളായി പ്രഖ്യാപിച്ച വ്യക്തികൾ, സംശയാസ്പദ വോട്ടർമാർമാർ (ഡിവി ) ആയി തിരഞ്ഞെടുപ്പ് ഉദ്യോഗസ്ഥർ രേഖപ്പെടുത്തിയവർ, അല്ലെങ്കിൽ ഫോറിനേഴ്സ് ട്രൈബ്യൂണലുകളിലെ (പി‌എഫ്‌ടി) കേസുകൾ തീർപ്പുകൽപ്പിക്കാത്ത വ്യക്തികളും അവരുടെ പിൻഗാമികളും എന്നിവരാണ് ഇത്തരത്തിൽ “യോഗ്യതയില്ലാത്ത വ്യക്തികൾ” എന്നും കത്തിൽ വിശദീകരിക്കുന്നു.
Read More: ‘പെട്ടെന്ന് മതേതരനായോ’ എന്ന് ഗവർണർ; നിങ്ങളുടെ സർട്ടിഫിക്കറ്റ് ആവശ്യമില്ലെന്ന് ഉദ്ധവ്
എൻആർസി തയ്യാറാക്കുന്നതിനുള്ള നിയമങ്ങൾ അനുസരിച്ച്, മുകളിൽ പറഞ്ഞ വിഭാഗങ്ങളിൽ പെടുന്ന വ്യക്തികളെ എൻ‌ആർ‌സിയിൽ നിന്ന് മാറ്റിനിർത്തണമെന്ന് വ്യവസ്ഥ ചെയ്യുന്നു.
“അത്തരം പേരുകൾ ഇല്ലാതാക്കുന്നതിനായി സ്പീക്കിംഗ് ഓർ‌ഡറുകൾ എഴുതുക… വ്യക്തിയുടെ ഐഡന്റിറ്റി പ്രത്യേകമായി കണ്ടെത്തിയതിന്‌ ശേഷം” എൻആർസി ജില്ലാ ഇൻ‌ചാർജുമാരോട് ശർമ്മ നിർദ്ദേശിച്ചു.
“പരിശോധനയ്ക്ക് വ്യക്തിയുടെ ശരിയായ ഐഡന്റിറ്റി നിർബന്ധമായി ആവശ്യമായി വരും, അതിനാൽ വ്യക്തിയെ തിരിച്ചറിയുന്നതുവരെ ഭാവിയിൽ അവ്യക്തത ഉണ്ടാകില്ല,” കത്തിൽ പറയുന്നു.
“അതിനാൽ, എൻ‌ആർ‌സിയിൽ അവരുടെ പേര് വരാൻ അർഹതയില്ലാത്തവരുടെ പട്ടികയും, അത്തരം പേരുകൾ ഇല്ലാതാക്കുന്നതുമായി ബന്ധപ്പെട്ട് ഓരോ കേസുകളിലുമുള്ള ന്യായീകരണങ്ങളടങ്ങിയ സ്പീക്കിംഗ് ഓർഡറും സമർപ്പിക്കാൻ അഭ്യർത്ഥിക്കുന്നു,” എന്നും കത്തിൽ പറയുന്നു.
“അതെ, എൻ‌ആർ‌സിയിൽ നിന്ന്‘ പ്രഖ്യാപിത വിദേശികൾ ’,‘ സംശയാസ്പദമായ വോട്ടർമാർ ’ എന്നിവരുടെയും എഫ്‌ടികളിൽ കേസുകൾ നിലനിൽക്കുന്നവരുടെയും അവരുടെ പിൻഗാമികളുടെയും പേരുകൾ ഇല്ലാതാക്കുന്നതിനുള്ള പ്രക്രിയ ഞങ്ങൾ ആരംഭിച്ചു. നിരവധി ജില്ലകളിൽ നിന്നും പേരുകളുടെ പട്ടിക ഇപ്പോഴും വരുന്നുണ്ട്, മാത്രമല്ല എൻ‌ആർ‌സിയിലേക്കുള്ള അത്തരം തെറ്റായ ഉൾപ്പെടുത്തലുകളുടെ ആകെ എണ്ണത്തെക്കുറിച്ച് ഇപ്പോൾ അഭിപ്രായം പറയുന്നത് ശരിയല്ല. പൂർണ്ണമായ ലിസ്റ്റുകൾ വരേണ്ടതുണ്ട്,” ശർമ്മ ഇന്ത്യൻ എക്സ്പ്രസിനോട് സംസാരിക്കവേ പറഞ്ഞു.
അതിർത്തി ജില്ലകളിൽ നിന്നുള്ള 20 ശതമാനം പേരുകളും മറ്റിടങ്ങളിൽ നിന്നുള്ള 10 ശതമാനവും പുനപരിശോധിക്കേണ്ടതുണ്ടെന്ന നിലപാടാണ് ഈ വിഷയത്തിൽ അസം സർക്കാർ ആവർത്തിക്കുന്നത്.
“ഞങ്ങൾക്ക് ശരിയായ എൻആർസി വേണം… ഇപ്പോൾ പൂർത്തിയാക്കിയ എൻആർസി പൂർണമായും കുഴപ്പങ്ങളുള്ളതാണ്. അസമിലെ ജനങ്ങൾ ഒരിക്കലും ഈ എൻആർസി സ്വീകരിക്കില്ലെന്ന് ഞങ്ങൾ സുപ്രീംകോടതിയിൽ പറഞ്ഞു. അനധികൃത വിദേശികളുടെ പേരുകൾ ഇതിൽ ഉൾപ്പെടുത്തിയിട്ടുണ്ട്. എൻ‌ആർ‌സിയിൽ യഥാർത്ഥ ഇന്ത്യൻ പൗരന്മാരുടെ പേരുകൾ മാത്രമേ ഉൾപ്പെടുത്താവൂ,” എന്ന് അസം മുഖ്യമന്ത്രി സർബാനന്ദ സോനോവാൾ ഈ മാസം ആദ്യം ദിബ്രുഗഡിൽ നടന്ന ഒരു റാലിയിൽ സംസാരിക്കവേ പറഞ്ഞിരുന്നു. പുനപരിശോധന ആവശ്യപ്പെടുന്ന സർക്കാരിന്റെ അപ്പീൽ ഇപ്പോഴും സുപ്രീംകോടതിയിൽ തീർപ്പുകൽപ്പിച്ചിട്ടില്ലെന്നും അദ്ദേഹം പറഞ്ഞിരുന്നു.
Read More: Assam: NRC authorities to delete names of ‘ineligible persons’ from citizens register
