ന്യൂഡല്‍ഹി: ചരിത്രം കുറിച്ച് കോണ്‍ഗ്രസ്. പാര്‍ട്ടിയുടെ വനിതാ വിഭാഗമായ മഹിളാ കോണ്‍ഗ്രസിന്റെ ദേശീയ ജനറല്‍ സെക്രട്ടറിയായി ട്രാന്‍സ്‌വ്യക്തിയും മപ്രവര്‍ത്തകയുമായ അപ്‌സര റെഡ്ഡിയെ നിയമിച്ചു. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയാണ് ചരിത്രപരമായ തീരുമാനം നടപ്പിലാക്കിയത്.

മഹിളാ കോണ്‍ഗ്രസ് ദേശീയ അധ്യക്ഷയും എംപിയുമായ സുഷ്മിതാ ദേവിന്റെ സാന്നിധ്യത്തിലാണ് തീരുമാനം പ്രഖ്യാപിച്ചത്. സംഘടനയുടെ 134 വര്‍ഷത്തെ ചരിത്രത്തിലെ ആദ്യ ട്രാന്‍സ്ജെന്‍ഡര്‍ സെക്രട്ടറിയാണ് അപ്സര.

ബിജെപിയിലും എഐഎഡിഎംകെയിലും പ്രവര്‍ത്തിച്ചിട്ടുണ്ട് അപ്‌സര. 2016 ലാണ് അപ്‌സര എഐഎഡിഎംകെയിലെത്തുന്നത്. പിന്നീട് ജയലളിതയുടെ മരണത്തിന് ശേഷം പാര്‍ട്ടി വിടുകയായിരുന്നു. ശശികലയെ മുഖ്യമന്ത്രിയാക്കിയതിനെ തുടര്‍ന്നാണ് അപ്‌സര പ്രതിഷേധിച്ച് ഇറങ്ങി പോകുന്നത്.

ബിജെപിയിലും അപ്‌സര പ്രവര്‍ത്തിച്ചിരുന്നുവെങ്കിലും മാസങ്ങള്‍ക്കുള്ളില്‍ തന്നെ ഇറങ്ങി പോരുകയായിരുന്നു. സ്വതന്ത്ര ചിന്തയ്ക്ക് ഒരു സ്ഥാനവും ഇല്ലാത്ത പാര്‍ട്ടിയാണ് ബിജെപിയെന്നും അവര്‍ പറഞ്ഞിരുന്നു. മാധ്യമ പ്രവര്‍ത്തനത്തില്‍ ബിരുദമുള്ള ഇവര്‍ അന്വേഷണാത്മക മാധ്യമ പ്രവര്‍ത്തനത്തിലാണ് കൂടുതലും ശ്രദ്ധ കേന്ദ്രീകരിച്ചത്.

”അടുത്ത തിരഞ്ഞെടുപ്പില്‍ ജനങ്ങളോട് എന്ത് കഴിക്കണം, എങ്ങനെ പ്രാര്‍ത്ഥിക്കണം, എങ്ങനെ സ്‌നേഹിക്കണമെന്നടക്കം പറയുന്ന ബിജെപിയുടെ ഫാസിസത്തിനെതിരെ ശക്തമായ ക്യാമ്പയിന്‍ നടത്തും” അപ്‌സര പറയുന്നു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook